SOT KURRSESI NUK GUXOJMË TË GABOJMË

[LUMI_007]

SOT KURRSESI NUK GUXOJMË TË GABOJMË

Nuk ka dyshim se kombi shqiptar është populli më i sulmuar, më i masakruar dhe më i nëpërkëmbur në Evropë. Edhe sot kombi shqiptar është populli më i copëtuar në Evropë dhe ndër më të rrezikuarit në botë. Megjithëkëtë, edhe pse ish okupatorët, shtetet e tyre mike e forca të tjera të rrezikshme gjenden në aksione kundër Kosovës e interesave jetike të kombit, sot Kosova, shteti e populli shqiptar, për herë të parë gjatë historisë po gëzojnë përkrahjen e drejtuesve kryesorë të bashkësisë ndërkombëtare. Të kujtojmë se ditën e votimeve në Kosovë, më 23 tetor 2004, përfaqësuesi i Zyrës së Amerikës në Prishtinë, diplomati Filip Goldberg, vizitoi dhe prezentoi në disa vendvotime. Dukej qartë dëshira e përfaqësuesit të Amerikës për të ndihmuar që votimet të jenë të qeta dhe të zhvillohen pa probleme. Prandaj, përkrahjen e shteteve mike sot duhet ta kuptojmë dhe menaxhojmë për të mirën e Kosovës e të interesave kombëtare. Por, gjithsesi duhet kuptuar që armiqtë gjenden në aksione kundër Kosovës e kundër popullit shqiptar. Pastaj, në çdo shtet zgjedhjet e drejtuesve të rinj mund të ofrojnë ndryshime e përcaktime të tjera politike. Ndërkaq, plasartijet brenda Aleancës Perëndimore kanë për të shkaktuar dëme të paparashikuara në marrëdhëniet ndërkombëtare duke ashprësuar së pari situatën në Ballkan e në Evropën Juglindore. Ndërkaq, me rastin e largimit nga Prishtina për në Berlin, përfaqësuesi i zyrës së Gjermanisë në Prishtinë, z.Piter Rundorf kishte deklaruar: “Në disa shtete Gjermania zhvillon mësimin e gjermanishtes. Kam ndier kënaqësi kur nga Berlini më arritën 12 diploma për shqiptarë të Kosovës si nxënës shembullor. Mirëpo, populli i Kosovës duhet t’i dijë aftësitë e individit dhe ta vlerësojë se deri ku mund të arrijë me të. Gjithashtu, duhet të punoni shumë më shumë dhe të tregoni kujdes më të madh për rininë e shkëlqyeshme të Kosovës”.

Sigurisht, çdo popull ka trathtarë e mbeturina të tjera. Por, përveç hutaqve, robëria shekullore në gjirin e popullit shqiptar ka krijuar më shumë karrierizëm, mosdurim e urrejtje nga të cilat lindin konfrontime të papërmbajtura ndërmjet shqiptarëve. Fatkeqësisht e për çdo turp, nga këto mjerime, shpshherë angazhimet kryesore shqiptarët i kanë transferuar nga frontet e luftërave me armiqtë në urrejtje dhe në konfrontime të ashpra ndërshqiptare. Dihet gjithashtu, që gjatë historisë asnjë popull nuk kishte atdhetarë e trima ashtu siç kishin shqiptarët. Ndërkaq, populli shqiptar nuk kishte ose në të shumtën e rasteve nuk i prinin njerëzit me aftësi të dalluara politike. Ekzistojnë e mund të bëhen transparente dokumente autentike nga të cilat mund të shihet që kemi pasur mundësi ta shpëtonim popullin shqiptar nga sulmet ose t’i zvogëlonim masakrat shfarosëse të cilat e goditën gjatë luftrave më 1998/1999. Gjithashtu, përveç faktorëve ndërkombëtarë, edhe mungesa e strategjisë dhe organizimi i duhur e kanë ndihmuar ndarjen e Mitrovicës dhe të Veriut të Kosovës. A kemi tani strategji të domosdoshme për bisedime në tubimet ndërkombëtare për pavarësinë e Kosovës?!

As unë nuk kam pritur formimin e shpejtë të institucioneve të Kosovës. Për të mos u vonuar si atëherë pas zgjedhjeve të mëparshme, miqtë e Kosovës po e pëlqejnë formimin e shpejtë të këtyre institucioneve. Mirëpo, sipas numërit të votuesve,pas Lidhjes Demokratike vjen Partia Demokratike. Pastaj, për të arritur rezultate pozitive në veprimtarinë e tyre, institucionet,e sidomos Qeveria, duhet të gëzojnë përkrahjen e mbarë popullit të Kosovës. Në këto rrethana në të cilat gjendet Kosova, tani nuk duhet të ketë pozitë dhe opozitë. Por, është esenciale dhe shpëtimtare që të gjithë të veprojmë së bashku në rrugë të duhur. Prandaj, luten drejtuesit e institucioneve të sotme dhe zyrtarët relevantë ndërkombëtarë që në këto institucione e resore të tjera të përfshijnë edhe njerëz nga PDK-ja. Gjthashtu, luten të gjithë individët e faktorët e brendshëm e të jashtëm që seriozisht t’i luftojnë të gjitha orvatjet për diskriminim e konfrontime. Shqiptarët nga të tri partitë kryesore politike duhet vëllezërisht e bashkarisht t’i pamundësojnë xhelozitë dhe urrejtjet në të gjitha nivelet e institucioneve të Kosovës.

Me siguri, duhet ta kuptojmë si kurrë më parë që armiqtë e shumtë, të ndihmuar nga shtete e forca kundër stabilitetit e paqes, tani janë të gatshëm të ndërmarrin çdo aksion për t’i përçarë e konfrontuar shqiptarët në Kosovë, sidomos prijësit e dalur nga lufta e UÇK-së. Qëllimet e aksionet e këtilla kurrsesi dhe në asnjë mënyrë nuk guxojnë të na mashtrojnë, ato me të gjitha mjetet duhet t’i asgjësojmë. Nuk duhet të ketë asnjë dyshim që konfrontimet mes prijësve të luftës, por edhe të liderëve të Kosovës e të partive politike, forcat e egra antikosovare kanë për t’i shfrytëzuar për të akuzuar sa më shumë shqiptarë. Kështu, mund të dërgojnë në Hagë më shumë individë të pafajshëm. Pastaj, në këtë fazë të zhvillimeve rreth Kosovës dhe të rrethanave ndërkombëtare, populli shqiptar duhet të tregojë mençuri, vigjilencë, bashkëpunim dhe të ruajë qetësinë.

Dr.R.Xhema
Prishtinë,më 29 dhjetor 2004

[bagjaku]

ideja është , se në cilën situatë të jemi të arsyeshëm për të koordinuar punët si individualishtë , si komunitet apo edhe si shoqëri që të reflektoj brenda faktorit politik shqipëtar , kur po kalojmë në sfida të një epoke të rëndësishme për të ardhmen tonë. nuk mund të jemi vetëm kritik dhe të mos jemi pjesë e procesit , por duhet që të krijojmë një mekanizëm veprues që të mund të krijojmë një vizion më të avancuar për të arritur një reflektim serioz branda shqipëtar por edhe jashtë në komunitetin nderkombëtar , e di se lindë vetëvetiu pyetja se a duhet sakrifikuar për hir të ndërkombëtarve interesat kombëtare ..... besoj se nuk ka koment , por si të veprohet .
tani , është koha e ndryshimeve , por si të fillohet .....
mendoj se duhet filluar nga uni personal , sa jami të gatshëm për të arritur një reflektim pozitiv brenda shoqërisë , duke i bashkangjitur vlera , guxim dhe finalizim të suksesëshëm .
nuk dua ta precizoj një analizë të mirëfilltë , por duhet të sundojë arsyeja dhe komunikimi i mirëfilltë duke argumentuar në të mirën kombëtare .
nuk duhet gjykuar verbalishtë , me paragjykime , njëanshmëri , apo lokalizëm etj etj...
krijoni realitete të reja , mos hezitoni veproni arsyeshëm , po mos dëmtoni me vetëdije ....