ATA - Daci, PDK dhe ORA

[EveryWare]

Kolumne, botuar në "Jáva" - 144, Prishtinë

Shkruan: Bardhyl Metaj

Për demokracinë shpjegohet se, veç tjerash, është edhe një mekanizëm i cili u mundëson njerëzve që lirshëm të vendosin se kush është fajtor për të gjitha. Me votën e tyre.
Dhe, meqë në Kosovë nuk janë në rend zgjedhjet, por zgjidhjet, për shumëkë mbetet i pakuptueshëm ky tensionim dhe barikadizim në dy blloqe politike, si dhe lufta e egërsuar verbale e cila, sipas nevojës, ndihmohet edhe me ndonjë bombë!
Përmes mediumeve tashmë është bërë “krejt normale” që njëri bllok politik, sikur ushtritë në front, t’i çojnë fjalë tjetrit me përshëndetjen: Pushka - Top t’u boftë!
Megjithatë, blloqet e polarizuara, LDK-AAK dhe PDK-ORA, kanë arritë një konsensus politik i cili, fatkeqësisht, pa dashtë me e nënçmue këtë arritje, reduktohet “vetëm” në identifikimin e fajtorit kujdestar.
Në këtë pikë konsensuale, ndërkaq, bashkohemi edhe ne. Ne që jemi jashtë blloqeve. Fajtor për të gjitha, bile edhe për ato probleme që akoma nuk i kemi identifikuar, kanë të njëjtin emërues: Ata!
Mirëpo, derisa Partitë kur thonë “Ata” mendojnë në Bllokun tjetër, Ne kur themi “Ata” mendojmë në të dyja Blloqet! Pozitë dhe Opozitë! Pse?
Thuhet me të drejtë se probleme ka vetëm aty ku mungojnë zgjidhjet! Dhe, nëse për shumicën e problemeve Partitë tona, ato të pozitës dhe opozitës, po thonë plot gojë se kanë zgjidhje të shumta, atëherë rrjedhimisht do të duhej t’i kishim punët shumë mirë. Veçanërisht kur e dimë se ekzistojnë mekanizmat, institucionet dhe instrumentet e nevojshme demokratike për kanalizimin dhe ekzekutimin e tyre.
Ku po ngec, pra, puna?!
Si duket, disa nga “Ata” nuk janë zanatlinj të mirë dhe s`ju shkon përdore kjo puna me mekanizmat, institucionet dhe instrumentet e demokracisë... S`ju shkon përdore kjo farë pune plot rregulla, procedura, statute, të drejta të njeriut, pluralizëm, debat, Standarde, Solana, Tri shtyllat e Shtetit, e edhe ma shumë shtylla të UNMIK-ut, etj, etj. Janë “lodhë” burrat, e kanë nis e po i “mshojnë shqip”!

DACI

Prej cilit nga blloqet apo personalitetet me fillue? Ta zëmë, nga ana e Dacit?
Akademiku ynë i nderuar sikur “harron” se opozita të vetmin vend ku në mënyrë legjitime, të drejtpërdrejtë dhe institucionale, mund të “zbardhë” projektet, refleksionet dhe energjitë kreative, por edhe të korrigjojë e faktografojë, lëshimet dhe dështimet e Qeverisë, është Parlamenti. Apo ka ndonjë vend tjetër? Sepse, sigurisht pa dëshirën e opozitës, ai do t’i sheh “Ata”, por edhe shumëkë, atje ku nuk e kanë vendin - në rrugë! Në protestë e cila, siç ngjanë tek ne, degjeneron apo e merr tjetërkush në dorë dhe, rrjedhimisht, e shohim pastaj edhe në CNN, EuroNews, rezoluta...Kështu nuk komunikohet dhe debatohet me opozitën. Asaj duhet dhënë kohën dhe hapësirën e duhur për debat. Debati në Parlament për Opozitën është instrumenti më i fuqishëm politik!

PDK

Po opozita jonë? Nëse bazohemi në votën (besimin) e popullit, pas katër palë zgjedhjeve, atëherë bëjmë fjalë më shumë për historinë e “dështimeve të saj” në luftën për pu-shtet... dhe, kështu, u tha shumëçka!
Por, që në fillim, bllokun opozitar PDK-AAK duhet trajtuar ndaras!
Udhëheqës të PDK-ës, veçanërisht z. Jakup Krasniqi dhe “kohët e fundit” z. Ramë Buja, kanë hisen më të madhe në tensionimin dhe barikadimin nëpër blloqe politike, si dhe në luftën e egërsuar verbale. Është thënë dhe argumentuar mjaft për deformimet, edhe në numrin e kaluar, veçanërisht në shkrimin analitik të Xhafer Shatrit! Por, tensionimi ka pasë edhe një episod!
Sulmi dhe kampanja e sofistikuar mediale ndaj Ramush Haradinajt dhe pastaj Qeverisë së tij, si dhe krijimi i atmosferës makabre të gjoja “tradhtisë së tij ndaj bashkëluftëtarëve dhe idealeve të luftës”, pa i harruar edhe përqeshjet mbi gjoja jokompetencën dhe luhatshmërinë e tij !
PDK-ja, parti e themeluar nga individë të aftë e të dëshmuar, si udhëheqës largpamës të UÇK-ës në rrethana të vështira të luftës, dhe si parti e dytë më e madhe dhe më me ndikim në Kosovë, është njëkohësisht edhe vlerë e veçantë kombëtare. Dhe, këtu duhet pasë respekt të gjithë! Ajo në gjirin e saj ka shumë intelektualë dhe individë kreativ e serioz, të cilët duhet ta lirojnë dhe mbrojnë Partinë e vet nga funksionarë të cilët nuk dinë të kalkulojnë politikisht, prandaj spekulojnë me fatin e saj. Dhe, jo vetëm të saj.

ORA

Fytyrat më të “hutuara”, pa qartësi orientimi dhe pa profil në këtë “karambollazh demokratik” të pas zgjedhjeve, janë ato të grupacionit “Ora”. Ky grupacion, i themeluar nga personalitete si Veton Surroi, por edhe Ylber Hysa e ndonjë tjetër, figura të mirënjohura për kreativitet e sens politik, qasje konceptuale dhe shkathtësi në Relacionet Publike, në diçka më shumë se 100 ditë, kanë dizajnuar dëshpërimin më të madh për shumëkë! Ndoshta ngaqë kemi prit nga “Ata” që, përmes nismave dhe potencës kreative, të zbusin përleshjet frontale mes LDK dhe PDK-ës!
Krejt çka kemi në kujtesë nga “Ora” është se edhe një herë më shumë “përmbajnë Dokumentin, iniciativën, qasjen apo diskutimin e radhës të PDK-ës”! Dhe, këtu nuk ka asgjë të keqe por, po ashtu, nuk ka edhe iniciativë, qartësi orientimi dhe profil politik vetanak! Sikur të ishin - Dega Urbane e PDK-ës!
Faqja e tyre zyrtare në Internet - ku mund të gjesh vetëm funksione dhe shpjegime të lanuna përgjysmë – pasqyron, siç duket, besnikërisht dëshpërimin e tyre si Parti me rezultatet e zgjedhjeve, por edhe dëshpërimin tonë me rezultatet e tyre - pas zgjedhjeve! Nga deklaratat e fundit, po përmend përshëndetjen për z.Dacin, e cila mund të jetë e shumëkujt tjetër, por jo edhe e Veton Surroit: Pushka - Top t’u boftë!

Nobelisti dhe ish kryeministri i njohur britanez, Winston Churchill, thoshte diçka që vlen për të gjithë që përmendëm më lartë: “I mençmi nuk i bën të gjitha gabimet vet. Ai ju jep shanse edhe tjerëve”!
[/b]