Radhët e gjata për një vizë në BE, të turpshme

[Kalt]

Europarlamentarja Doris Pack tha se BE duhet të ndryshojë sistemin e vizave me vendet e Ballkanit Perëndimor
Doris Pak: Radhët e gjata për një vizë në BE, të turpshme

A.R
http://www.shekulli.com.al/images/0.gif
TIRANË- Europarlamentarja Doris Pack e ka konsideruar të turpshme situatën e regjimit të vizave që vendet e Bashkimit Evropian aplikojnë për qytetarët e vendeve të Ballkanit Perëndimor. Pack është shprehur në një intervistë për agjencinë “Evropa e Lirë”, se janë të turpshme radhët e gjatë të qytetarëve në pritje për të marrë një vizë nga ambasadat e vendeve të BE-së. Sipas saj, në vendet e BE-së duhet të ketë një ndryshim tërësor të regjimit të vizave për vendet e Ballkanit Perëndimor. Kryetarja e delegacionit të Parlamentit Evropian për Evropën Juglindore, tha se moshapja e dyerve nga BE-ja për këto vende tregon moskorrektësi. Sipas Pack, është e turpshme që qytetarët e Ballkanit duhet të vazhdojnë të presin në radhë të gjata për ditë të tëra për një vizë. “Kur flitet për lëvizjen e lirë, unë ndjehem e turpëruar që nuk mundëm të krijonim një sistem vizash që do ishte praktik. Mendoj se qytetarëve në fjalë duhet t’u japim mundësinë të hyjnë në Bashkimin Evropian pa pasur nevojë të presin në radhë të gjata për ditë e ditë të tëra. Mendoj se sistemi i vizave duhet të realizohet në një mënyrë më të mirë. Problemi qëndron te shtetet anëtare të BE-së“, tha Pack. Ajo shton më the se ndryshimi i sistemit të vizave duhet bërë sa më parë, pasi vendet e rajonit duan të shohin dritë në fund të tunelit përfshi dhe hyrjen e lirshme në vendet e BE-së. Ndërkaq, lidhur me perspektivën evropiane të Ballkanit Perëndimor, Pack ka vënë në dukje një fare “dështimi” të vetë BE-së, gjë që po shtyn edhe procesin e anëtarësimit të vendeve të tjera. “Aktualisht kemi 10 vende të reja e priten dhe dy të tjera që kërkojnë të anëtarësohen. Por problemi qëndron te ne si BE. Të tjerët bëjnë shumë përpjekje për reforma, por jo edhe ne. BE-ja harroi të bënte reformat e veta. Jemi sot 25 vende anëtare, kurse instrumentet i kemi sikur kemi qenë gjashtë. Ne na duhet të gjejmë rrugën e daljes nga kjo gjendje në dy vitet e ardhshme, pasi na duhen instrumentet, të cilat do të ndihmojnë zgjerimin e mëtejshëm”, - tha Pack. Por sipas saj, zgjerimi do të ketë kufij, e pas Rumanisë e Bullgarisë, më vonë do te jetë radha e vendeve të Ballkanit Perëndimor, por nuk do të shkohet më tej.



08/06/2006
Gazeta Panorama