Presidenti Sejdiu viziton Shqipërinë, pritet të marrë titullin "Honoris Causa"

[Dilaver]

Presidenti i Kosovës, Fatmir Sejdiu, i cili do të zhvillojë një vizitë zyrtare dyditore në Shqipëri, sot dhe nesër (27-28 Qershor), do të zhvillojë takime të shumta me zyrtarët më të lartë të vendit dhe disa prej drejtuesve të partive politike. Sipas axhendës së bërë publike dje nga zyra e shtypit pranë Presidentit, takimin e parë zoti Sejdiu do ta zhvillojë me Presidentin Moisiu, ndërsa më pas, të dy presidentët do të japin një deklaratë të përbashkët për shtyp. Më tej, zoti Sejdiu do të pritet në një takim të veçantë nga kryeministri Sali Berisha, ndërsa më pas është parashikuar një takim me Kryetaren e Kuvendit, Jozefina Topalli. Gjatë pasdites së sotme, Presidenti i Kosovës do të flasë para Kuvendit të Shqipërisë dhe më pas do të ketë një takim të veçantë me Kryetarin e LSI-së, Ilir Meta.
Në ditën e dytë të vizitës në Shqipëri, zoti Sejdiu do të takohet me Kryetarin e PS-së, Edi Rama, dhe më pas në Rektoratin e Tiranës, ku do t'i akordohet dhënia e Titullit "Honoris Causa".
Gjithashtu, në axhendën zyrtare të zotit Sejdiu është parashikuar një vizitë në Memorialin e Skënderbeut në qytetin e Lezhës si dhe një vizitë në Portin e Lezhës, ku Presidentit Sejdiu do t'i bëhet një ekspoze mbi punimet që po kryen dhe perspektivën e zhvillimit të portit.

Rilindja Demokratike

[Dilaver]

Fjala e Presidentit të Kosovës, para Kuvendit

Shanset e mira të rinjohjeve shqiptare


Fatmir SEJDIU
Kam nderin e veçantë që t'i drejtohem këtij institucioni të lartë të demokracisë së Shqipërisë. Nderi, por edhe kënaqësia bëhen edhe më të mëdha kur të kihen parasysh koha që u desh të kalonte para se Kosova dhe Shqipëria të mund të komunikonin lirshëm dhe normalisht.

Në qershorin e vitit 1878, para 128 vjetësh, prijësit shqiptarë të katër vilajeteve u mblodhën në Prizren, në qytetin e bukur të Kosovës, për të krijaur Lidhjen Shqiptare të Prizrenit, që përmblodhi aspiratat pavarësiste të shqiptarëve që kishin lënguar nën sundimin qindravjeçar otoman.

Viti 1912, viti i shpalljes së Pavarësisë së Shqipërisë, ka mbetur në historinë kombëtare me shijen e ëmbël dhe të hidhur përnjëherësh: u kurorëzua shtetësia shqiptare e gjysmës së kombit, gjysma tjetër mbeti jashtë. Thelbi i asaj gjysme tjetër është Kosova e sotme, shteti që po e bëjmë sot, gati njëqind vjet më vonë.

Krahas rezistencës së fuqishme të dekadave të tëra më parë, me ngulm të veçantë Kosova nisi rrugën e demokracisë e të pavarësisë në fund të viteve '80, kur nën drejtimin e Dr. Ibrahim Rugovës, njeriut të urtë e intelektualit shembullor, u formua Lidhja Demokratike e Kosovës, i pari formacion jo komunist autokton në hapësirat shqiptare të Ballkanit pas Luftës së Dytë Botërore.

Më 2 korrik 1990, Kuvendi i Kosovës shpalli Deklaratën Kushtetuese, që ne në Kosovë i themi Deklarata e Pavarësisë. Në shtator të vitit 1991 u mbajt Referendumi për pavarësinë e Republikës së Kosovës. Më 24 Maj 1992 u mbajtën zgjedhjet e para parlamentare dhe presidenciale në Kosovë. Dr.Ibrahim Rugova u zgjodh Kryetari i parë i zgjedhur demokratikisht i Kosovës. Më 1998 u mbajtën zgjedhjet e dyta në Kosovë.

Rruga e Kosovës për liri, demokraci e pavarësi sikur edhe lufta e Ushtrisë Çlirimtare të Kosovës, sollën në qershorin e vitit 1999 lirinë tonë të gjakur për shekuj, për të cilën derdhën dije, djersë e gjak, breza të tërë shqiptarësh. Liria e Kosovës bëhet edhe më e çmueshme, sepse është rezultat i përkrahjes vendimtare dhe ndihmës bujare të miqve tanë, SHBA dhe UE në rend të parë, dhe shumë të tjerëve që krijuam në kohën e demokracisë sonë të brendshme në Kosovë.

Katër palë zgjedhjet qëndrore dhe vendore që janë mbajtur në Kosovën e lirë kanë dëshmuar vlerat demokratike dhe kulturën shtetërore që kemi ndërtuar në këto 16-17 vjet në Kosovë.

Tashti mbetet ta kurorëzojmë pavarësinë e Kosovës, që besojmë se do të bëhet sivjet, në mbarim të procesit ndërkombëtar, të cilit i prin Presidenti Marti Ahtisari, në emër të Kombeve të Bashkuara.
Me pavarësimin e Kosovës, projekt që mishëron ëndrrën shekullore të popullit të Kosovës dhe idealizmin e pragmatizmin politik të Ibrahim Rugovës, Presidentit historik të Kosovës, por edhe me ëndrrat e parealizuara do të bëhen realitet në proceset integruese Evro-atlantike, që është përcaktimi i fuqishëm i të dyja vendeve tona. Integrimi dhe bashkimi me Unionin Evropian dhe NATO-n me vlerat e përbashkëta dhe veçantitë që kemi ne, Kosova dhe Shqipëria, popujt tanë, shqiptarët dhe pakicat është imperativ tani.
Kosova do të ketë kujdes të veçantë ndaj komuniteteve pakicë, duke i trajtuar të gjithë ata dhe pa dallim në pajtim me standartet më të larta ndërkombëtare. Synimi ynë parësor është ndërtimi i një Kosove të pavarur e sovrane, e cila nderon dhe ruan veçantitë kulturore dhe etnike të secilit.

Kosova dhe Shqipëria kanë shanset e mira të rinjohjeve shqiptare, por edhe të shqiptarëve me popuj që i rrethojnë, duke mësuar njëra prej tjetrës nga ato që janë bërë mirë apo keq përgjatë historisë, sidomos në punë të mbajtjes së shtetit dhe të ndërtimit të demokracisë.

Rroftë Kosova!

Rroftë Shqipëria!

Ju faleminderit