Dokufest- festivali ndërkombëtar i filmit në Prizren

[rilinda]

Në festival do të shfaqen 104 filma artistikë nga 48 shtete të botës, nëntë prej të cilëve nga Kosova dhe Shqipëria...

Para gjashtë vjetësh, një grup të rinjsh hapën edicionin e parë të festivalit të filmit, "Docufest", me dëshirën që Prizreni të ishte qendër kulturore e Kosovës. Ndërkohë pjesëmarrja në këtë aktivitet është rritur dhe ka përmasa ndërkombëtare.
"Të nxitojmë sepse kemi 104 filma nga 48 shtete të cilët do të shfaqen brënda këtyre shtatë netëve"- tha drejtori artistik, Veton Nurkollari, në hapjen solemne të festivalit në kopshtin veror të kinemasë së Prizrenit. Ndër të 800 filma konkurues, juria profesionale ka përzgjedhur 104. Në konkurrencën ndërkombtare do të shfaqen 31 dokumentarë, 22 filma të metrazhit të shkurtër si dhe 13 filma të animuar. Në konkurrencën ballkanike do të shfaqen 12 dokumentarë, prodhime të Kroacisë, Serbisë, Bosnje-Hercegovinës dhe Maqedonisë.
Në konkurrencën kombëtare do të shfaqen 9 filma nga Kosova dhe Shqipëria, ndërsa në konkurrencën për fëmijë do të shfaqen 7 filma. Ndër të 12 filmat e programeve speciale të "Dokufestit" do të shfaqet edhe filmi austriak "Eksperimenti në hartë", i regjisores (Barbara Kajzer) Barbara Keiser, i cili nga kritikët vlerësohet si "një përmbledhje politike, një paraqitje simbolike e përçarjes së Jugosllavisë së vjetër". Në në një hartë të paemëruar dhe në vargun e shteteve të ish-Jugosllavisë, trembëdhjetë vjenezë përpiqen të përcaktojnë konturet e sakta kombëtare. Në fund të festivalit "Docufest 2007", juria profesionale do të bëjë vlerësimin e filmave. Prodhimet më të mira do të nderohen me çmime.

Në kuadër të "Dokufest" është organizuar edhe edicioni pestë i ekspozitës ndërkombëtare të fotografisë dokumentare "Dokuphoto". Kjo ekspozitë është mbajtur të dielën në mbrëmje po në kinemanë "Lumëbardhi". Kësaj radhe në të janë prezantuar 15 fotografë nga Kosova, Turqia dhe Armenia, madje me koncept të ndryshuar përmes "slide-show"-t dhe të përcjellë me muzikë. Sipas Veton Nurkollarit, drejtor artistik në "Dokufest", nën kujdestarinë e së cilës është realizuar ekspozita, në të janë paraqitur dy slide show me fotografi konceptuale të bazuara në projekte të caktuara. Përmbledhja e parë e fotografive dokumentare e kuruar nga fotografi Andrew Testa, është bërë enkas për revistën prestigjioze të fotografisë "OjodePez", numri i së cilës i është dedikuar pamjeve nga Kosova. Përveç Testës, në këtë revistë janë paraqitur edhe fotografët kosovarë, Ferdi Limani, me temën "Të Zhdukurit", pastaj Atdhe Mulla me "Peizazhet", Fisnik Dobreci me "Të jesh Rom", ndërkohë që Samir Karahoda me objektivin e tij ka paraqitur "Tifozët", Flaka Kuqi ka sjellë pamje nga "Më të varfërit" dhe Ermal Meta me "Jetën tradicionale". Nga ana tjetër, përmbledhja e dytë e fotografive dokumentare para artdashësve në Prizren është shfaqur nga projekti i përbashkët i 5 fotografëve turq dhe 5 armenë, të titulluar "Merhabarev". "Ky është një projekt i përbashkët i fotografëve armenë dhe turq, ku grupi i të parëve ka vizituar dhe fotografuar Stambollin, ndërsa grupi i fotografëve turq ka kapur pamje nga Ereveni", tha pas ekspozitës, Nurkollari. Në fund ai ka shtuar se në këtë edicion të "Dokuphoto"-s, janë prezantuar edhe fotografitë e serisë alternative "Lex" të fotografit Jeton Karahoda, që për koincidencë ka hapur ekspozitën në të njëjtën mbrëmje në Londër. Fotografitë e Karahodës kanë pasur për tematikë memoriet, portretin, dhe objektet që duket se paraqesin jetët tona që janë të shkëputura nga realiteti.

[rilinda]

Filmi "9 Star Hotel" i mori dy çmime

Filmi "9 Star Hotel", i regjisorit Ido Haar, u shpërblye me dy çmime në edicionin e gjashtë të festivalit "Dokufest" në Prizren. Ky film fitoi çmimin e dokumentarit më të mirë dhe filmit më të mirë për të drejtat e njeriut. Regjisori nga Izraeli në këtë film trajton fatin e mijëra palestinezëve të cilët punojnë ilegalisht si punëtorë në ndërtimtari. Pas udhëtimit të lodhshëm dhe të rrezikshëm, të ngarkuar me mbuloja dhe çanta, ata kalojnë kodra për në vendet ku mund të gjejnë punë. Gjatë natës flenë nëpër kaçuba, në shtëpiza të improvizuara dhe dhomëza si arkivol, që paraqesin një kontrast të zymtë me kompleksin e apartamenteve luksoze që ndërtojnë gjatë ditës.
Ndarja e çmimeve nga juria, në mbrëmjen e fundit të festivalit është pritur me performancën e krijuesve të vendit. Regjisorja nga Holanda, njëherësh edhe anëtare e jurisë në festival, Aliona van der Horst, tha: "Konkurrenca ka qenë shumë e fortë, prandaj edhe juria e ka pasur shumë të vështirë të përcaktohet për ndarjen e çmimeve për filmat më të mirë." Sipas saj, konkurrenca ka ndikuar që në këtë edicion të festivalit të ketë edhe vlera më të qëndrueshme artistike. Në edicionin e gjashtë të festivalit ndërkombëtar "Dokufest", në Prizren, në konkurrencën kombëtare çmimin e parë e mori filmi "Vdekja solemne", i regjisorit Ilir Kabashi. "Shpërblimi që merret në 'Dokufest' ka një rëndësi të posaçme për një krijues të ri." - tha Kabashi, pas marrjes së çmimit.
Drejtori i programit në "Dokufest", Veton Nurkollari, tha se organizatorët janë shprehur të kënaqur me rrjedhën e festivalit. "Ajo ka qenë shumë e rëndësishme për festivalin dhe ne si organizatorë. Publiku ka mbetur i kënaqur me cilësinë e filmave të shfaqur gjatë tërë javës." Sipas tij, kualiteti i filmave të shfaqur në "Dokufest 6", ka qenë shumë më i lartë sesa në edicionet e viteve të kaluara. "Ka qenë një fat dhe mundësi e rrallë për publikun që në vendin e tyre t'i shohin filmat më të mirë të huaj."
Edicioni i gjashtë i festivalit "Dokufest", u mbyll të dielën me rishfaqjen e filmave fitues.

[rilinda]

FILMAT FITUES NË "DOKUFEST":
Dokumentari më i mirë- "9 Star Hotel", i regjisorit Ido Haar
Mirënjohje speciale- "Losers and winners", i regjisorit Ulrike Franke, Michael Loeken;
Dokumentari më i mirë i shkurtër- "No Man Is an Islan", Sonja Linden;
Mirënjohje speciale- "Talk to me", i Mark Craig;
Filmi më i mirë i shkurtër- "The Tube With a Hat", i Radu Jude;
Mirënjohje speciale 1- "Make a Wish", Cherien Dabis;
Mirënjohjë speciale 2- "Soft", i Simon Ellis;
Filmi më i mirë i animuar- "Soldat", i Davit Peros Bonnot;
Dokumentari më i mirë prej Ballkanit- The Mosquito Problem and Other Stories", i Andrey Paounov;
Mirënjohje speciale- "The Flag", i Koken Ergun;
Dokumentari më i mirë kombëtar- "Vdekja Solemne", i Ilir Kabashit;
Shpërblimi për Dokukids- "For a Few Marbles More", i Jelmar Hufen;
Filmi më i mirë për të drejtat e njeriut dhe deversitet- "9 Star Hotel", i Ido Haar.