Shqipëria naftë me bollëk

[Dilaver]

Industria e naftës në Shqipëri ka filluar të rigjallërohet si pasojë e investimeve të huaja, kryesisht atyre kanadeze. Megjithëse zë një peshë të vogël në rezervat botërore të naftës, shteti shqiptar ngjallur interesin e shumë kompanive të huaja, të cilat për vite me radhë kanë eksploruar për naftë në tokën shqiptare. Sipas një raporti të CIA-s, rezulton se Shqipëria ka një rezervë nafte, që mund të nxirret lehtësisht prej rreth 185.5 milionë fuçi, shifër kjo e barabartë me afro 30 milionë tonë. Në fakt, kjo sasi është e barabartë me konsumin botëror të vetëm dy ditëve, por ekspertët thonë se fuqitë e mëdha interesohen për naftën e vendeve të vogla, për shkak se duan ta blejnë atë në një kohë kur tregjet nuk janë shumë të turbulluara dhe me një çmim të favorshëm për të rritur rezervat e tyre. Për tre vjet, prodhimi i naftës është rritur me 100 mijë tonë, teksa për vitin 2006 arriti në 550 mijë tonë. Ndërkohë që mendohet se këtë vit kjo sasi të rritet edhe më shumë. Sasia prej 550 mijë tonësh naftë bruto që prodhon Shqipëria aktualisht në një vit është e barabartë me rreth 150-160 mijë tonë naftë nga ajo që përdoret për automjetet. Aktualisht, nafta e prodhuar në Shqipëri tregtohet jashtë shtetit me rreth 35 dollarë, për shkak se nafta e Patos- Marinzës, ku operon kjo kompani, është bituminoze.