Shqiptarët,Për Shqiptarët&Bota

[Pupi]

Presidenti Topi bisedoi me Papa Bendikti XVI edhe për Kosovën
Presidenti i Shqipërisë, Bamir Topi, u prit sot paradite në një audiencë të veçantë nga Ati i Shenjtë, Papa Benedikti XVI. Kreu i shtetit shqiptar vlerësoi marrëdhëniet e hershme dhe shumë të mira të Shqipërisë me Selinë e Shenjtë, shprehu mirënjohjen për ndihmesën e vyer dhe rolin që Vatikani ka luajtur për ringjalljen shpirtërore, morale dhe edukuese të popullit shqiptar, si edhe në mënyrë të veçantë për lumturimin e Nënë Terezës. Presidenti Topi nënvizoi rolin moderues të Shqipërisë dhe faktorit shqiptar në interes të paqes dhe qëndrueshmërisë së rajonit të Ballkanit. Ai u ndal në rëndësinë e zgjidhjes sa më të shpejtë të çështjes së Kosovës dhe fitimit të pavarësisë së merituar të saj, për të vendosur përfundimisht paqen dhe qetësinë në Ballkan dhe për ta orientuar atë drejt integrimit në familjen e madhe europiane. Ati i Shenjtë theksoi lidhjet jo vetëm gjeografike, por edhe historike e kulturore të Shqipërisë me familjen europiane, aspiratën e saj për t'u bërë pjesë edhe institucionalisht e kësaj familjeje dhe uroi që kjo aspiratë e kahershme e popullit tonë të përmbushet sa më shpejt. Presidenti Topi, në emër edhe të mbarë popullit shqiptar e ftoi Atin e Shenjtë, Papën Benedikt XVI që të vizitojë vendin tonë, ftesë e cila u mirëprit me kënaqësi dhe mori përgjigje pozitive nga Shenjtëria e Tij për t'u zhvilluar në një moment të përshtatshëm të axhendës së Tij. Presidenti Bamir Topi zhvilloi një takim me Sekretarin e Shtetit të Vatikanit, Kardinalin Bertone, i cili pasi shprehu mirënjohjen dhe vlerësimin për rolin e Selisë së Shenjtë në zhvillimin e marrëdhënieve shumë të mira me Shqipërinë, theksoi shembullin e rrallë të Shqipërisë ku harmonia dhe toleranca ndërfetare mbizotërojnë marrëdhëniet mes tri feve që praktikohen në Shqipëri, por edhe në Kosovë. Kryetari i Shtetit shqiptar evidentoi rolin moderues të Shqipërisë dhe faktorit shqiptar në rajon, duke u ndalur në rëndësinë e zgjidhjes sa më të shpejtë të çështjes së Kosovës si një shtysë për vendosjen përfundimtare të paqes dhe qëndrueshmërisë në Ballkan e më gjerë. Në fund të vizitës së tij zyrtare dyditore në Selinë e Shenjtë, Presidenti Topi u takua dhe pati një bisedë të ngrohtë e tepër miqësore edhe me Imzot Vinçenco Palian të Komunitetit të Sant Exhidios, kontributi i të cilit për krijimin e kushteve të lirisë fetare dhe demokracisë, si dhe ndihmesa humanitare e shëndetësore, kanë qenë shumë të ndjeshme në Shqipëri, Kosovë, Maqedoni, etj., që nga viti 1990.
(QIK)