Pse nuk dua të jem kryeministër?

[Guri i madh]

26 shkurt 2002 Pse nuk dua të jem kryeministër?

Intervistë e Hashim Thaçit dhënë gazetës “Zëri”
Prishtinë, 26 shkurt 2002 “Unë kam deklaruar edhe më herët se nuk dua të jem kryeministër, e rikonfirmoj edhe sot. Pas luftës kanë ndodhur deformime të mëdha në Kosovë. Apriori është paragjykuar. Unë kam kërkuar gjithmonë që në Kosovë të funksionojë ligji, rendi, toleranca. Kam kërkuar garanci dhe mbështetje nga ndërkombëtarët për formimin e komisionit për verifikimin e pasurisë së personaliteteve publike të dhjetëvjetëshit të fundit deri sot, pastaj komisionin për hetimin e krimit ekonomik dhe politik, sepse këto fenomene ekzistojnë. Dikush i frikësohet transparencës. Unë nuk dua të jemë ombrellë e prapaskenave dhe e konstruksioneve që bëhen në emër të fenomeneve të lartpërmendura”. Kështu ka thënë Hashim Thaçi kryetar i PDK-së në një intervistë të botuar të martën në të përditshmen “Zëri”.
- Në bisedat e këtij niveli është e pashmangshme çështja e ndërtimit të institucioneve të dala pas zgjedhjeve. Kaluan tre muaj dhe në Kosovë nuk janë ndërtuar institucionet. A mund të flasim për arsyet kryesore pse gjatë këtyre tre muajve nuk u arrit të zgjidhen këto institucione, sidomos institucionet kyçe, krijimi i qeverisë, zgjedhja e kryeministrit dhe e kryetarit të Kosovës?
Thaçi: Zgjedhjet e përgjithshme treguan se qytetarët e Kosovës gjithnjë e me tepër dinë t’i vlerësojnë zgjedhjet e lira, të ndërtojnë jetën plurale, shoqërinë civile, tolerancën qytetare dhe se e kuptojnë përgjegjësinë e tyre në krijimin e institucioneve demokratike. Pas përfundimit të zgjedhjeve më 17 nëntor, PDK-ja ka kërkuar që të gjendet modus për një qeverisje të koalicionit të gjerë ku do të bënin pjesë PDK, AAK, LDK, si dhe minoritarët. Kjo formë e qeverisjes sipas marrëveshjes do të sillte shumë favore për Kosovën dhe synimet e saja për të ardhmen. Por, ndodhi ajo që ndodhi, ngurtësi, sjellje autoritare, përpjekje për monopol partiak mbi institucionet nga partia e cila fitoi më tepër vota në zgjedhjet e pergjithshme, që më tepër paraqet reflektim nostalgjikësh të një nomenklature të mendësisë totalitare të sistemit të djeshëm të rrënuar politik mbi konceptin e pushtetit që e donë gjithsesi. Rezultati i zgjedhjeve tregoi se në Kosovë asnjë parti nuk ka fituar zgjedhjet në kuptimin që të mund të vendoste e vetme në krijimin e institucioneve, andaj çka ndodhi. Lidershipi i partisë me më shumë vota, duke mos reflektuar nga realiteti, por duke u joshur nga egoja e pushtetit, do të synonte deri në agresivitet verbal, që me çdo kusht ta arrijë këtë. Fatmirësisht, demokracia parlamentare ka disa rregulla që duhet të respektohen. Opinioni ka përcjellë seancat tona në Parlament, ato vërtet që nga takimi i parë ishin më tepër një turp sesa një çast historik për vendin tonë, në vend se të ndodhte e kundërta?! Nuk pretendoj t’i ikë përgjegjësisë apo më së paku të neglizhoj pasojat negative nga kjo gjendje e krijuar, por në botën parlamentare pluraliste, siç e kemi ne, në rastet kur një parti politike fiton më tepër vota, por nuk fiton dhe shumicën, atëherë i takon asaj vetë të gjejë partnerët e vet për të qeverisur. Por tek ne çfarë ndodhi? Partia që nuk ka shumicën e duhur na ballafaqon me një avaz të një koncepti dështakësh fatalistë të bartur nga e kaluara. Dy mandate parlamenti (1992-99) i krijoi dhe të dyja pa i konstituar i eliminoi, duke mos pasur apo së paku ofruar një zgjidhje, nuk ofron koncept alternativ, asnjë qëndrim konstruktiv që do të mund të ofronte zgjidhje, pos një koncepti të ngurtë, jorealist në rrethana të tanishme, që më tepër bllokon, në bazë të koncept-egos unë jam unë dhe ti e të gjithë të tjerë duhet të bëheni unë. Edhe pse partia-lider e di se pa bashkëpunim me të tjerët nuk mund të krijojë institucionet, thuajse nuk dëshiron apo nuk do ta kuptojë se duhet të zgjedhë koalicion me faktorë relevantë të forcave parlamentare siç janë, PDK-ja, AAK-ja dhe partitë e respektuara të minoriteteve joserbe apo me koalicionin serb “Kthimi” (“Povratakun”), secili subjekt ka projektet dhe synimet e veta që konsistojnë me perspektivat e tyre për të ardhmen e tyre politike, LDK-ja duhet të zgjedhë, e të mos na mbajë peng të gjithëve. Ne jemi deklaruar se nuk ndërrojmë partnerët për bashkqeverisje. Sa i përket PDK-së, unë dhe bashkëmendimtarët e mi kemi krijuar parti politike jo për t’ia shtuar apo zbukuruar koloritin formal partiak Kosovës, apo votuar pa koncept për dikë, kemi obligime para qytetarëve, por nuk i kemi borxh asnjë subjekti politik. PDK-ja ka identitet origjinal politik mbi të cilin kemi fituar votat, me ritëm stabil ngritjeje në elektorat, pa barriera e ndikime të sistemit të kaluar dështak politik. Ne jemi kontinuiteti i konceptit politik demokratik modern, të filluar qysh herët, vizioni ynë është në mënyrë të vendosur i orientuar nga zhvillimi dhe përsosja e demokracisë në Kosovë, në përputhshmëri me vlerat më demokratike dhe më humane të botës së zhvilluar, civilizimit perëndimor. E potencoj, është shqetësues fakti kur një parti me më tepër vota të elektoratit nuk ka aftësi dhe kreativitet veprimi e menaxhimi të këtyre votave, aq sa të afrojë rreth platformës së vet ndonjë parti tjetër, së paku një. Këtu shtrohet pyetja pse ndodh kjo?! Kemi të bëjmë me paaftësi, mendje përjashtuese, krizë bashkëpunimi, kryeneqësi agresive të tipit snobist ballkanik, e cila po e çon vendin në një situatë paradoksale?! Kreu i këtij grupimi politik kërkon nga komuniteti ndërkombëtar të shtyhen edhe zgjedhjet lokale, të cilat duhet të mbahen në vjeshtën e këtij viti, kërkon ndryshimin e disa paragrafeve të Kornizës Kushtetuese që kanë të bëjnë vetem me zgjedhjen e presidentit, e nuk pajtohet assesi që t’i hyjë ndryshimeve thelbësore të kësaj kornize, që lidhen esencialisht me të ardhmen e Kosovës. Në vijim të kësaj, që po ashtu vërteton dyshimin tim se fjala është për mendje ekskluzive, e cila kërkon mosrespektimin e procedurës demokratike dhe të periudhës së përcaktuar, kufizuese, për zgjedhjet e lira. Vërtet është për të dyshuar në aftësinë institucionale të këtij soji politik. Situatën që po e kalojmë unë e definoj kështu: në Kosovë kemi ndeshje konceptesh autoritare, me prirje të theksuara përjashtimi të të tjerëve, dhe të atyre demokratike, me prirje kohezive të spektrit politik dhe qytetar ndër ne.
- Opinioni ka konsideruar se pas tërheqjes së AAK-së nga kërkesa për ndonjërin nga tri postet e para dhe pajtimit, në parim, në bisedat e zhvilluara në Zyrën Amerikane, që posti i kryetarit t’i takojë LDK-së, kurse ai i kryeministrit PDK-së, të jetë tejkaluar kriza e krijimit të institucioneve. Megjithatë, doli se pajtimi nuk është arritur ende. Pse?
Thaçi: PDK-ja filozofinë e vet të bashkëpunimit me subjektet e tjera politike e bazon në orientimet programore, konceptuale dhe politiken e saj koherente. Marrëveshja në Zyrën Amerikane nuk kishte të bënte për apo kundër X, Y personalitetit apo liderit, por ishte pajtueshmëri midis tri partive politike më të mëdha të vendit, e arritur me ndërmjetësim ndërkombëtar. Marrëveshja midis partive nuk duhet të arrihet për liderët e tyre, por për çështje madhore, pastaj është çështje krejt tjetër se cili lider i kësaj apo asaj partie dëshiron që të jetë i propozuar për postet udhëheqëse. Unë respektoj procedurat demokratike të demokracisë së brendshme të entitetit politik që e udhëheqi. - PDK ju ka propozuar juve për kryeministër, ndërkohë që gjatë kësaj kohe sikur është pritur nga PDK-ja rikonfirmimi i përditshëm i kësaj kandidature apo ndryshimi i saj, çka mendojmë se nuk është në rregull në parim? Thaçi: Nuk jam ithtar i lidhjes së proceseve për emra të veçantë, edhe pse janë disa rregulla në procedura zgjedhore, është e drejtë e organeve që të propozojnë kandidatët e vet për postet më me përgjegjësi institucionale në nivel të vendit dhe në kuadër të saj një propozim të këtillë e ka bërë edhe Kryesia e PDK-së, Këshilli Drejtues dhe Grupi Parlamentar i PDK-së për kryetarin e saj, që ka qenë, thashë, në kundërshtim me vullnetin tim për momentin aktual të angazhimeve të mia politike.
- D.m.th. nuk duhet të pritet ndryshimi i kandidaturës së Hashim Thaçit për kryeministër nga PDK-ja?
Thaçi: Shikoni, unë ripërsëris se nga organet drejtuese të PDK-së ekziston propozimi për kryeministër, përkundër kundërshtimit tim. Kjo, theksoj unë, është shumë parimore dhe respekt i madh për mua. Në të njëjtën kohë, më lejoni të them se me gjithë respektin për organet që më kanë propozuar duke më besuar këtë post, unë vazhdoj të insistoj se nuk është e domosdoshme që kryetari i PDK-së të jetë edhe kryeministër i Kosovës. Unë kam deklaruar edhe më herët se nuk dua të jem kryeministër, e rikonfirmoj edhe sot. Pse nuk dua të jem kryeministër? Pas luftës kanë ndodhur deformime të mëdha në Kosovë. Apriori është paragjykuar. Unë kam kërkuar gjithmonë që në Kosovë të funksionojë ligji, rendi, toleranca. Kam kërkuar garanci dhe mbështetje nga ndërkombëtarët për formimin e komisionit për verifikimin e pasurisë së personaliteteve publike të dhjetëvjetëshit të fundit deri sot, pastaj komisionin për hetimin e krimit ekonomik dhe politik, sepse këto fenomene ekzistojnë. Kam kërkuar që së bashku t’i identifikojmë në mënyrë që organet e drejtësisë të mirren me këto çështje jetike për Kosovën. Këtë mbështetje nuk e kam gjetur deri më sot nga organet kompetente. Dikush i frikësohet transparencës. Unë nuk dua të jemë ombrellë e prapaskenave dhe konstruksioneve që bëhen në emër të fenomeneve të lartpërmendura. Me këtë filozofi nuk ndërtohet rendi demokratik. E ripotencoj, koncepti i liderit dhe mbetjes peng ndaj të tillit është fenomen negativ për formacionin politik dhe për një shoqëri, unë do të angazhohem që në Kosovë të triumfojë koncepti i vlerës politike e kombëtare. Unë vlerësoj se për kohën që po kalojmë, të jemë kryetar i PDK-së, duke vazhduar reformat që kam filluar e që kanë synim profilizimin e partisë sipas standardeve të partive moderne demokratike perëndimore, është një angazhim shumë i rëndësishëm për mua dhe vendin. Të qenit kryetar i PDK-së, i partisë që ka objektiv në vijim reformat në shoqërinë kosovare dhe udhëheqjen me proceset demokratike në Kosovë, është nder dhe përgjegjësi e madhe. Kosovën e presin sfida të mëdha dhe perspektiva pozitive për të ardhmen e saj, por kërkohet ndërtimi i një koncept të ri dhe infrastrukturë e re kuadrosh dhe ideshë që ta realizojnë këtë platformë. Ne nuk duhet të jemi pasiv as iluzorë se të tjerët do t’i kryejnë punët tona. Bashkësia ndërkombëtare ka qenë dhe është mjaft e impenjuar në Kosovë me prezencën e vet dhe ndihmën e gjithanshme që po i jep procesit që po kalojmë, por kosovarët duhet të jenë dhe më aktivë, të shfrytëzojnë këto favore, në të ardhmen jo të largët do të kemi zhvillime të mëdha e të rëndësishme në rajon dhe botë. Kosova dhe strukturat e saja politike e institucionale duhet të jenë të gatshme dhe të afta t’i presin dhe ballafaqohen me sukses me këto procese.

[Guri i madh]

- Në këtë kontekst pas të gjitha këtyre përpjekjeve për t'i ndërtuar institucionet e Kosovës, si do ta kishit vlerësuar kontributin sidomos të diplomatëve të vendeve të pesëshes të cilët kanë qenë të involvuara në këtë proces. Nganjëherë krijohet përshtypja se po të mos ishte iniciativa e Zyrës Amerikane nuk do të kishte takime të tilla?
Thaçi: Fillimisht, jemi takuar edhe pa ndërmjetësimin e zyrave diplomatike, në procesin e mëvonshëm këto zyra kanë luajtur rol aktiv dhe konstruktiv, në veçanti Zyra Amerikane dhe Britanike, pastaj Franceze, Italiane dhe Gjermane. Propozimet e tyre për ndërtimin e institucioneve të Kosovës kanë qenë sugjerime më tepër miqësore. Në këtë drejtim PDK-ja ka qenë shumë e hapur për bashkëpunim, kemi kërkuar çdo herë që para se të shkojmë në mbledhjet e Parlamentit të Kosovës të arrijmë një marrëveshje paraprake, në mënyrë që në Parlamet të votohet për marrëveshje, e pastaj të hapet debati për personalitete të cilat do t'i zënë vendet e presidentit dhe kryeministrit etj. Kryetari i Kosovës duhet të dalë nga koncensusi i spektrit politik e qytetar i vendit, po ashtu edhe kryeministri duhet të jetë një njeri që është dinamik, aktiv dhe shumë i përgjegjshëm, që e udhëheq procesin drejt reformave të gjithëmbarshme. PDK-ja ka raporte konstruktive me të gjitha partitë politike të Kosovës, ka një ngurtësi të pakuptueshme në raport me PDK-në nga partia që kësaj radhe ka fituar më së shumti vota. Sugjerimi im është që ekspertët e partive parlamentare-bashkëqeverisëse të ulen dhe të bisedojnë, të hartojnë programin qeveritar dhe të votohet në pako për progamin qeveritar. Kjo, d.m.th. të kemi një lidhje të përkohshme, që në gjuhën moderne politike quhet KOALICION, që zakonisht nuk bëhet për t’i kënaqur egot personale të liderëve të partive, por për të mbrojtur interesa të njëjta ose për të arritur një qëllim të përbashkët në nivel vendi.
- Është folur gjithashtu se PDK-ja do të mund të ndërrojë kandidatin për president, në vend të zonja Flora Brovinës do të kandidoheni Ju. A ka diçka të vërtetë rreth kësaj çështjeje?
Thaçi: Kjo më bën të qesh, mua dhe gjithë opinionin që më njohin. Ka qenë dhe është iniciativë e imja t’u ofroj njerëzve mbrenda partisë sime përgjegjësi të larta, pastaj dr. Flora Brovina nuk u kandidua nga unë rastësisht, ajo është një figurë që sot më së shumti e meriton të jetë presidente e Kosovës, unë jam i bindur për këtë. Kam përshtypjen se ekziston një çoroditje në këtë drejtim se ku qëndron problemi i zgjidhjes, më duket se e elaborova më gjerë këtë në pyetjen e juaj të parë.
- Megjithatë është shkruar për Ju dhe për Rugovën, si personalitete që po e mbani peng procesin?
Thaçi: Unë jam njeri që nuk i iki përgjegjësisë, ashtu si dhe dua që dhe të tjerët rreth meje ta kuptojnë se posti më afër se privilegji i momentit është sakrificë, dhe shans për të treguar veten në sfidat e përgjegjësisë. Kam pranuar të jem kryeministër i vendit gjatë bombardimeve të NATO-s dhe në një periudhë të shkurtër pas luftës. Kjo ka qenë koha më e vështirë që ka kaluar Kosova dhe qytetarët e saj ndonjëherë. Si mandatar i qeverisë, tri herë e kam kaluar kufirin ilegalisht në rrethana lufte, jam përpjekur të jem afër qytetarëve të mi në momente të rënda dhe të mos shkëputem nga ndikimi në diplomaci. Unë nuk i ika përgjegjësisë në udhëheqjen për çlirimin e Kosovës, isha aktiv, për të mos thënë i vetmi nga politikanët shqiptar, në terren që me përgjegjësi u ballafaqova nga pala shqiptare me ndërkombëtarët dhe ardhjen e tyre në Kosovë, e konsideroj sukses të jashtëzakonshëm jo vetëm timin, por dhe të të gjithë kosovarëve, që askush nga ndërkombëtarët nuk humbi jetën me fajin e kosovarëve. E kam bartur peshën e rëndë të periudhës së pasluftës, e di se shumë njerëz të thirrur në emër të luftës kanë shfrytëzuar periudhën e pasluftës për pazare të tyre, më vjen mirë se gjërat po kristalizohen dhe po shihet se kush e bëri luftën për çlirim dhe kush përfitoi nga ajo, ka pasur deformime dhe keqpërdorime gjatë dhe pas lufte, por, megjithatë, bashkarisht me ndërkombëtarët nuk lejuam deformime ekstreme që do të mund të na vënin në një situatë ekstreme negative. Me UNMIK-un ndërtuam strukturat e përbashkëta administrative. Këtë proces të vështirë të tranzicionit shumëkush e kupton drejt, ashtu siç ka dhe të atillë që më kritikojnë. Është e pamundshme dhe utopike të mendosh të mbulosh të tëra interesat që mund të ekzistojnë në një vend, por ballafaqim imi si kryeministër me tërë këto sfida në atë kohë nuk ka qenë dhe aq i lehtë as dhe me privilegje për mua. Morali politik i liderëve mund të vlerësohet veç e veç e jo kuturu. Unë dhe Rugova jemi dy botëra të ndryshme, sepse i takojmë gjeneratave dhe koncepteve të ndryshme, pastaj kemi rrugë të ndryshme të futjes sonë në politikë si nga forma, ashtu dhe rrethanat, pastaj labirinthet e veprimeve tona janë shumë të ndryshme. Në aspektin e politikës së sotshme nuk është e zakonshme që një kryetar partie kur fiton votat e mjaftueshme apo në koalicion të mos kandidohet për postet institucionale thuani Ju, por unë them se kjo jozakonshmëri ndodh në demokracitë e brishta ballkanase, e jo në demokracitë perëndimore. Në asnjë paragraf të statutit të PDK-së nuk thuhet se kryetari duhet të kandidohet për president apo kryeministër, por as edhe nuk mohohet kjo e drejtë për kryetarin. Unë i respektoj këto norma dhe rregulla që i ka aprovuar Kongresi i partisë, por nuk pretendoj assesi, që këto norma t’i kanunizoj.
- Kur jemi te ndihma e faktorëve ndërkombëtarë, mund të thuhet se është një faktor i ri, administratori i ri Shtajner. Ju keni pasur një takim me të dhe sa mendoni se mund të ndihmojë ai në tejkalimin e kësaj që quhet krizë apo ngecje në ngritjen e institucioneve dhe cili është faktikisht mendimi juaj për të, sepse me Hekerupin keni pasur marrëdhënie të tensionuara?
Thaçi: Është një fatkeqësi mentaliteti në Kosovë, ngatërrohen raportet e individit me konceptet. Unë jam në politikë, ngase e kam ndërtuar konceptin, politikën dhe vizionin tim, e jo politika mua. Koncepti im politik dhe kombëtar, pos suksesit për çlirimin e Kosovës, sot përkrahet nga elektorati i fuqishëm në Kosovë. Me z.Hekerup mundemi fare thjesht të pijmë miqësisht kafe në Evropë apo në Kosovë, por në aspektin politik marrëdhëniet e mia me Hekerupin kanë qenë mospajtim parimor nga makinacionet që ai ka krijuar. Kozmopolitizmi i tepruar krijon irealizëm që unë nuk e kam në natyrë dhe as si koncept. Z.Shtajner e ka një pasqyrë shumë të mirë nga ish- kryeadministratori se si nuk duhet punuar. Përshtypjet e mia janë se ai do të angazhohet maksimalisht që sa më parë të ndërtojmë institucionet, ashtu që t'i hyjmë bashkërisht një reformimi më të përgjithshëm institucional dhe shoqëror kosovar.
- Në çfarë mase është devalvuar vota e 17 nëntorit me moszgjedhjen qe tre muaj të institucioneve, kur dihet se zgjedhjet kanë qenë shumë demokratike…?
Thaçi: Po qe se e analizojmë procesin e tranzicionit në Evropën Juglindore, atëherë mund të them se Kosova ka ecur shumë më shpejt dhe më suksesshëm se shumë shtete të rajonit. Duhet kuptuar drejt se jemi në fazën fillestare të ndërtimit të rendit demokratik dhe nuk mund të gjejmë lehtë zgjedhje të përkryer, por unë vazhdoj të besoj se zgjedhjet në Kosovë ishin më demokratiket në dhjetëvjetëshin e fundit në rajon. Kemi mekanizma politikë që ende veprojnë me mentalitetin e së kaluarës, të cilat nuk e kuptojnë apo nuk duan te akceptojnë jetën plurale si duhet, kompromisin, transparencën e punës, jetën e brendshme demokratike. PDK-ja që nga fillimi i ka kushtuar rëndësi të madhe demokracisë së brendshme partiake, në mënyrë që të hapim perspektivë për ndërtimin e institucioneve demokratike në nivel të vendit. Ne nuk e përjashtojmë askë nga bashkëpunimi, nuk merremi me diferencime. PDK-ja për interesa të askujt nuk do të bie në pozita altruiste, por edhe nuk është e joshur për egoizëm, pranojmë t’i hyjmë procesit të altruizmit politik reciprok. Më duhet të theksoj për herë të parë, e ndiej edhe obligim. Qytetarët e Kosovës me votën e tyre më 17 nëntor, rrëzuan skemat e parapërgatitura nga qarqe të caktuara, skema këto që nuk ishin në përputhshmëri më vullnetin e qytetarëve të Kosovës, skematikët „profesionistë“ besonin në vazhdimin e inercionit elektoral kosovar. Procesin janë duke e mbajtur peng hartuesit e atyre projekteve dashakeqëse dhe antidemokratike, çdoherë që jemi afër marrëveshjeve ata nervozohen, bëhen agresivë dhe përmes mekanizmave të ndyshëm arrijnë të ndikojnë në prishjen e marrëveshjeve, ata ende nuk pajtohen që janë përbaltur ato skema, u takojnë arkivave. PDK-ja është e përcaktuar që bashkarisht me ndërkombëtarët të punojë në ndërtimin e pushtet ligjor e demokratik, e jo pushtet të imponuar (të forcës) apo sipas tipit meritokrat

[Guri i madh]

. - A kanë të drejtë ata që flasin për PDK-në dhe LDK-në si dhe për liderët e tyre të armiqësuar mes vete?
Thaçi: Njerëzit vërtet duhet të mos jenë të kënaqur me raportet ndërpartiake në Kosovë. Por, po punohet shumë në ndërtimin e raporteve konstruktive, fatkeqësishtë ka dhe faktor brenda nesh që po mundohen ta mbajnë të gjallë këtë frymë mospajtuese duke ndarë rajone e komuna me këto etiketime. Këto tendenca kanë dështuar dhe do të dështojnë sigurisht edhe në të ardhmen. Unë nuk jam i armiqësuar me asnjë njeri, nuk jam ai i cili e konsideron asnjë parti politike apo lider si armik. Me forcat e tjera politike unë synoj të gjej më tepër pika të cilat mund të na ofrojnë, e jo ato që na ndajnë. Ne jemi konkurrentë politikë dhe asgjë më tepër. Bashkëpunimi PDK-LDK është i domosdoshëm jo vetëm në këtë fazë që po e kalojmë, por edhe në të ardhmen. Nga ky bashkëpunim fiton Kosova dhe qytetarët e saj. Askush nuk ka pse t’i frikësohet këtij bashkëpunimi. Tek të dy partitë ekzistojnë njerëz të ngurtë që hezitojnë për bashkëpunim me njëri- tjetrin. Këtu duhet të manifestohet një lidership i guximshëm dhe i arsyeshëm nëse synojmë ndërtimin e skenës politike kosovare me vlera dhe arsye të shëndosha. PDK-ja do të rrezikojë edhe humbjen e caktuar të votave, por nuk do të pranojë logjikën e mbylljes në vetvete. Do të bashkëpunojmë më të gjithë, kemi ndërtuar partneritet të besueshëm me të gjitha partitë parlamentare shqiptare e minoritare, në ndërkohë që vazhdojmë të refuzohemi vetëm nga kreu i LDK-së, por jo dhe LDK-ja. Kjo, mendoj unë, është krejt e pakuptueshme.
- Kur mendoni se mund të pritet një tejkalim i bllokadës institucionale. Deklaratat tuaja dhe të Rugovës (fjala është për takimet e para) kanë qenë shumë optimiste pas takimit me kryeadministratorin Shtajner?
Thaçi: Është në natyrën time të jem optimist. Zërat e arsyeshëm brenda partisë që ka fituar më tepër vota, po bëhen gjithnjë e më të vetëdijshëm për këtë dhe po bëjnë presion tek lidershipi i tyre. Kjo shihet hapur, kjo është e mirë, shumë shpejt do të ofrohet një zgjidhje që rrjedh nga domosdoshmëria e krijimit të institucioneve. Është e vërtetë se jemi vonuar pak, besoj kjo vonesë do të ndikojë në skenën politike kosovare pozitivisht në të kuptuarit e rolit të kompromisit dhe të marrëveshjeve politike. Siç thashë më herët, ne jemi në fillim të procesit të ndërtimit të institucioneve demokratike dhe çdo fillim i ka vështirësitë e veta.
- Domethënë, sipas kësaj Kosova ka shumë më tepër gjasa të krijojë qeveri, të zgjidhen institucionet me marrëveshje, sesa të vihet në situatë që të imponohet një qeveri teknike ose eventualisht të mendohet për zgjedhje të reja në Kosovë?
Thaçi: Qeveritë teknike vijnë zakonisht kur një vend është në gjendje të jashtëzakonshme. Kosova nuk është në një gjendje të tillë, është vendi më i qetë në rajon ku situata është më stabile se në IRJ të Maqedonisë, Serbi, Mal të Zi e besa edhe në Shqipëri. Më tepër se dy vjet kaluan nga mbarimi i luftës së përgjakshme dhe tashmë kemi partitë politike që kanë legjitimitet, po ashtu i kemi institucionet lokale. Kosova është duke kaluar një fazë të rëndësishme të procesit demokratik shoqëror e institucional. Partitë politike kosovare janë të vetmet që në bashkëpunim me ndërkombëtarët kanë të drejtën për të formuar institucionet e Kosovës. Çdo tendencë për imponim vetëm sa do të komplikonte proceset politike.
- Cili është qëndrimi juaj rreth arrestimeve të fundit të disa ish-pjesëtarëve të UÇK-së dhe ndaj protestave në të cilat ndodhën edhe disa ekscese?
Thaçi: Qëndrimet e PDK-së i janë të njohura opinionit publik të brendshëm dhe atij ndërkombëtar. Kjo kërkon një studim shumë të thellë edhe nga forcat politike kosovare edhe nga komuniteti ndërkombëtar, në mënyrë që të kuptohet më drejt koha para luftës, gjatë saj, por edhe pas luftës. Kam punuar më tërë qenien time për nxjerrjen e ligjeve, dhe për mua ligji është mbi të gjithë kur përdoret drejt, por edhe kur do të ketë deformime të ligjeve, gjithmonë do të flas shumë hapur, i pëlqeu dikujt kjo apo jo. Nuk do të lejoj që askush të fshihet pas emrit tim, qoftë ai njeri i ish-UÇK-së, nëse vërtet vepron kundër ligjit, ashtu si dhe do të jem përherë në mbrojtje të dinjitetit dhe të drejtave të qytetarëve që mund të jenë cenuar, në këtë kontekst është dhe arrestimi i nxituar dhe spektakular i tre luftëtarëve të lirisë.
- Si i komentoni përpjekjet e Beogradit për një lloj balansimi me gjykimin e kryekriminelit në Hagë, duke përmendur emra si Thaçi, Haradinaj, Çeku?
Thaçi: Opinioni është mësuar që të përmendet emri im dhe i njerëzve të tjerë dhe jam shumë i lumtur që kam qenë njëri ndër ata që kanë udhëhequr politikisht rezistencën kundër pushtuesit serb, në veçanti sepse në këtë angazhim kam fituar mbështetjen ndërkombëtare. Serbia gjithmonë kur ka probleme të veta të brendshme, mundohet të tërheqë vëmendjen në Kosovë. Kështu vazhdon edhe tash. Ajo nuk mund të pajtohet leht me realitetin demokratik kosovar. Ne duhet të ecim përpara sa më shpejt që është e mundur, pavarësisht prej pengesave.

[fadil]

guri madhe pse po e ngarkon palidhje forumin, kur per intervistat e Hashim Thaqit eshte nje teme e veqant.

[Guri i madh]

guri madhe pse po e ngarkon palidhje forumin, kur per intervistat e Hashim Thaqit eshte nje teme e veqant.



kto jan intervistat e thaqit qe i ka dhan në kohen e Gurit



mos u merakos se edhe atje postoj po bondi mi ka shkul vesht flak po me qesin