Leter e hapur: Institucioneve te Republikes se Kosoves

[Berisha-boy]

Kryetarit te Republikes se Kosoves, z. Fatmir Sejdiu
Kryetarit te Kuvendit te Republikes se Kosoves, z. Jakup Krasniqi
Kryeministrit te Republikese se Kosoves, z. Hashim Thaqi






Te nderuar perfaqesues te institucioneve te Republikes se Kosoves,Jemi plotësisht të vetëdijshëm se bërja dhe ndërtimi i shtetit të ri të Kosovës është e meritë e vullnetit dhe qëndresës politike të popullit të Kosovës por edhe e vendosmërisë Tuaj, që këtë vullnet ta jetësoni para qytetareve Tuaj. Shprehim admirimin tonë për hapat e ndërmarre nga ana e institucioneve të Kosovës, që Ju përfaqësoni, në ndërtimin e lirisë dhe demokracisë për të gjithë qytetarët e Kosovës, duke dëshmuar kështu përkushtimin Tuaj për një shtet të lirë dhe demokratik për të gjithë qytetarët, pa dallim etnie, përkatësie gjinore apo fetare.
Kosova sot, e gjendur në hapat e parë të ecjes së sajë si shtet, më shumë se kurrë më parë ka nevojë për vizione të qarta mbi të ardhmen e vet. Vendimet më të cilat po përballen institucionet e Kosovës do të duhet të mbështetën në vlerat e përbashkëta të qytetarëve të sajë në mënyrë që ato promovojnë liritë dhe të drejta njerëzore. Nëse me vlerat e tilla nuk shërbehemi në ndërtimin e demokracisë në vend, atëherë kemi rrezikuar që të arriturat tona të deri tanishme t`i dëmtojmë seriozisht. Një komb, një popull e para së gjithash një bashkësi qytetare do të ndjehet e pajtuar me të kaluarën e sajë, e sigurt në të tashmen dhe me shpresë për të ardhmen, vetëm nëse ajo mbështetë në vlerat unitariste, të cilat duke i pranuar bëhen edhe përfaqësuese të dinjitetit të sajë.
Disa prej neneve (25, 26 dhe 37) të Kushtetutes se sapomiratuar mendojme se prekin vlerat e themelore të familjes dhe shoqërisë, dhe demtojne seriozisht te ardhmen e shoqërisë kosovare. Me këto nene, në emër të lirisë, atakohet në mënyrë te ashper dhe të pa drejtë e drejta themelore për jetë e çdo qenje njerëzore. Ndërtimi i premisave për legalizimin e abortit tregon mospërfillje për të drejtën themelore për jetë të çdo qenie njerëzore, pa marr parasysh zhvillimin e tij fizik, mental dhe shpirtëror, të njohur nga çdo kod fetar dhe të mbrojtur po ashtu dhe nga kartat e të drejtave të njeriut. Në anën tjetër nga po këto nene i hapet rruga çdo kujt që në mënyrë të padrejtë, të lidh martesë edhe brenda të njëjtës gjini, duke rrënuar kështu vlerat themeltare dhe të patjetërsueshme mbi të cilat është ndërtuar shoqëria njerëzore - në martesën e shenjtë në mes burrit dhe gruas.
Me këtë jo vetëm që fyhen vlerat shpirtërore (religjioze) të çdo kosovari por bëhet e pa sigurt e ardhmja jonë si shtet që mbron dhe jo shkel të drejtat e qytetarëve të vet! Rrezikojmë, që kështu, lirinë e fituar ta shndërrojmë në instrument që tkurr dhe jo zhvillon të drejtat tona.
Tash kur familja jonë ka të gjitha premisat të ndërtoj të ardhme të shëndosh, miratimi i neve të tilla, shkatërron pakthyeshëm shpresën e njeriut për të arritur idealet e veta. Nuk kemi të drejtë dhe nuk guxojmë që në emër të “barabarësisë”, të vëmë shenjë e barazimit në mes të mirës dhe të keqes. Liria paraqet infrastrukturën për të zgjedhur kah e mira ose e keqja. Por shoqëria jonë, do të duhej, më mirë tash se dikur, t`i thotë jo të ardhmes së vet të pasigurt dhe të mbështetet në vlerat e veta të dëshmuara.
Prandaj, nisur nga ajo që konstatuam më lartë, shprehim brengosjen tonë të thellë se vlerat tona njerëzore, religjioze, shoqërore dhe tradicionale janë rrezikuar seriozisht me miratimin e neneve kushtetuese që ndërtojnë mekanizma për legalizimin e abortit dhe hapin rrugën për martesa brenda gjinisë. Kërkojmë nga Ju, që duke shfrytëzuar kapacitetin Tuaj ligjor dhe vendimmarrës, të amandamentoni sa më parë Kushtetutën e sapo miratuar nga Kuvendi i Kosovës, duke i zëvendësuar nenet e lartpërmendura me nene që mbrojnë jetën dhe familjen.
Jemi plotësisht të bindur se një gjë e tillë do ta përmirësonte ligjin themeltar të shtetit tonë por po ashtu do t`iu njihte Ju meritën e pakontestueshme në mbrojtjen dhe promovimin e lirive dhe të drejtave të qytetarëve që iu kanë votuar.
Shpresojmë shumë që kjo letër t`Ju shërbej si nxitje që detyrimet dhe përgjegjësitë Tuaja t`i ushtroni në mbrojtje të vlerave njerëzore!







Me nderime,

Dom Anton Kqira (Detroit, MI)
Imam Idriz Kosova (Chicago, Ill)
Dom Ndu Gjergji (Detroit, MI)
Imam Shuaib Gurguri (Detroit, MI)
Dom Pjeter Popaj (New York, NY)






PS:Nese teme nuk e ka vendi e duhur ne kete forum (PAVARËSIA E KOSOVËS) ju lutem zhvendosni ne forumin qe i takon!