Haxha: Kam presion politik

[Guri i madh]

Haxha: Kam presion politik


Arsim Rashiti | 15-07-2010 10:52 CET
Prishtinë. Shyqyri Haxha, kryeshef ekzekutiv i PTK-së, e ka pranuar publikisht se ka presion politik për të punësuar njerëz në PTK. Ai ka thënë se e përkrah privatizimin e kësaj ndërmarrjeje, duke u ankuar edhe për shumë vështirësi që po i krijohen në punën e tij.
“Jam në presion tepër të madh politik për shkak të thirrjeve të ndryshme për punësim në PTK. Duhet të hiqen interferencat dhe politika, në mënyrë që të zhvillohet kompania”, ka thënë kreu i PTK-së, në një takim të operatorëve të telefonisë mobile me zyrtarët e Autoriteti Rregullativ i Telekomunikacionit (ART) dhe të Komisionin për Ekonomi. Haxha ka thënë se brenda vitit PTK humb mbi 20 milionë euro nga operatorët ilegalë, duke shtuar se borxhe ndaj kësaj korporate janë rreth 40 milionë euro, duke e fajësuar ART-në për mosefikasitet dhe moszbatim të ligjit për telekomunikacionin.
“Joefikasiteti i ART-së në zgjidhjen e shumë kontesteve mes operatorëve të licencuar dhe të palicencuar është një parregullsi tejet e madhe. ART nuk e ka kryer detyrën e vet”, ka thënë ai, duke shtuar se operatorët ilegalë po veprojnë para syve të ART-së, ku bëjnë terminim të


trafikut dhe po u shkaktojnë humbje të mëdha kompanive mobile dhe buxhetit të Kosovës. “Në terminimin ilegal të trafikut PTK-së i shkaktohet humbje diku 1.2 milion euro në muaj”, ka pohuar ai. Ai ka theksuar se nga muaji mars i këtij viti kanë arritur të kursejnë 450 mijë euro në muaj. Haxha ka kundërshtuar zyrtarë të qeverisë, se ulja e të hyrave të PTK-së po ua ul vlerën kompanisë duke e përkrahur privatizimin e saj.
“Dëmi më i madh PTK-së iu ka bërë në vitin 2008 kur ish- menaxhmenti i kompanisë ka ulur tarifën e thirrjeve prej 50 për qind, ku është dëmtuar buxheti i Kosovës për 50 për qind nga të hyrat e PTK-së”, ka thënë ai.
Në këtë takim, edhe Merita Kostanica, nga telefonia mobile “Ipko”, ka thënë se ART-ja nuk është duke i respektuar rregullat.
“ART-ja nuk e ka respektuar ligjin, por ka sjellë vendime që janë në kundërshtim me ligjin, duke i shkaktuar ‘Ipko’-s probleme të mëdha dhe duke mos e lërë të fokusohet në zhvillim të tregut”, ka thënë ajo.
Ndërsa Ekrem Hoxha, drejtor i Bordit të ART-së, i cili nuk ishte prezent deri në fund të debatit, ka thënë se ligji është i mirë, Rregullatori është funksional dhe efikas me kompetencat dhe autorizimet që i ka.

[Guri i madh]

Qeveria demanton Haxhën


Enis Veliu | 16-07-2010 16:32
Prishtinë. Deklaratat e drejtori të Postë Telekomit të Kosovës se po përballet me presione të shumta politike për të punësuar njerëz të rinj në PTK, i ka demantuar zëdhënësi i Qeverisë së Kosovës, Meli Krasniqi.
Ai ka thënë se asnjë herë as kryeministri, por as ndonjë ministër nuk ka bërë presione mbi drejtorin për të punësuar njerëz në këtë kompani publike.
“Nuk është e vërtetë. Qeveria ka kërkuar nga ai që të mos punësojë njerëz të rinj në këtë kompani publike, e jo ta rrisë numrin e punëtoreve” tha zëdhënësi Krasniqi. Deklarata e Haxhës ka ardhur në mbledhjen e rregullt zë Komisionit për Ekonomi ku operatorët e telefonisë mobile janë takuar me zyrtarë të Autoritetit Rregullativ të Telekomunikacionit.
“Jam në presion tepër të madh politik për shkak të thirrjeve të ndryshme për punësim në PTK. Duhet të hiqen interferencat dhe politika në mënyrë që të zhvillohet kompania”, ka thënë drejtori PTK-së Shyqri Haxha.
Zyrtarët e partive opozitare deklaratat e drejtorit i konsiderojnë si heqje e përgjegjësisë para dështimeve të shumta. Myzejene Selmani, kryetare e Komisionit Parlamentar për Ekonomi thotë se drejtori i PTK-së në vendin ku është tash ka ardhur përmes grupeve politike të cilat tash ai po i denoncon.
“Ai nuk ka ardhur në pozitën e punës përmes një gare fer. Kur e ka pranuar atë punë ai i ka ditë


edhe obligimet që do t’i kryejë. Dhe tash në fund kur e ka parë që nuk ka zgjidhje thotë se ka shumë presione politike për të futur njerëz në punë”, tha ajo. Në anën tjetër Arton Demhasaj, këshilltar ligjor në organizatën ÇOHU!, thotë se kjo që ka deklaruar Haxha nuk është asgjë tjetër pos shfajësim për situatën kaotike që mbizotëron në këtë kompani
“Organizata ÇOHU! disa herë me herët ka potencuar se në PTK po punësohen njerëz pa baza ligjore. Tash kur po përmendet privatizimi i PTK-së dhe kur kanë filluar hetimet dhe bastisjet ne PTK për keqpërdorimet e mëdha që kanë ndodhur ne kompaninë publike më profitabile në vend, kryeshefi i saj shfajësohet që ka pasë presion politik për mbipunësim të njerëzve në ketë kompani, mirëpo ku ish deri tani Haxha që nuk ka pranuar që ka presion politik në ketë kompani sa i përket punësimit dhe keqpërdorimeve tjera sidomos të dhënia e tenderëve”, tha ai.
Sipas tij, pos te tjerash kjo kompani ka shërbyer për pasurimin e shumë zyrtarëve të lartë të vendit tonë, dhe sipas tij pasi kanë plaçkitur aq sa kanë pasur dëshirë tash po dëshirojnë ta shesin për t’i fshehur keqpërdorimet që i kanë bërë.
“Nëse Haxha ka pasur presione është dashur të lajmërojë organet kompetente të drejtësisë për ketë presion politik, ose të japë dorëheqje dhe të tregojë me emra se kush janë ata zyrtarë që kanë ushtruar presion politik në të për mbipunësim dhe keqpërdorime tjera”shtoi ai.