Cfare duhet te dime per bakterin Escherichia coli..

[Jana]

Bakteret escherichia coli nuk janë të panjohura. Ato paraqiten në zorrët e bagëtive, para së gjithash te gjedhi, delet dhe dhitë, por edhe te kafshët e egra. Përmes florës në zorrë ato mund të përfundojnë në qumështin apo mishin e kafshëve. Po ashtu, uji i ndotur mund të jetë shkaktar i infeksioneve EHEC.
Ekspertët e BE-së të Shëndetësinë e kanë quajtur valën e infektimeve në Gjermani si një prej më të rëndave të këtij lloji në mbarë botën. Ndërkaq, edhe në Europë po shtohet paniku nga bakteri escherichia-coli. Pas Gjermanisë, ku numri i viktimave shkoi në 14, ai rezulton të jetë përhapur edhe në Suedi, Danimarkë, Britani, Holandë e Austri. Qendra Europiane për Parandalimin dhe Kontrollin e Sëmundjeve flet për disa të prekur në këto vende, mes të cilëve edhe fëmijë nën 5 vjeç, ndërsa 87 për qind e rasteve të regjistruara janë të rritur, ku 68 për qind e tyre, femra.


Çfarë është escherichia coli?
Është një lloj bakteri me variante të ndryshme. Normalisht jeton në zorrët e njeriut dhe të kafshëve dhe nuk jep shqetësime. Disa forma të tij mund të shkaktojnë infeksione dhe diarre. Çfarë ka të ndryshme nga ai që ka goditur veriun e Gjermanisë?
Ky lloj escherichia coli (e. coli) identifikohet me numrin 104. Rastet e tij në Europë, më përpara kanë qenë shumë të rralla. Është në gjendje të shkaktojë sëmundje, sepse prodhon një helm të fuqishëm vero-citotoksina (vtec): kjo substancë vepron si helm. Zhvillohet në zorrë pastaj përmes mukozës, kalon në gjak dhe godet veshkat duke provokuar komplikacione shumë të rënda: sindromin e uremisë hemolitike. Pasoja më e keqe është isuficenca renale akute që kërkon dializë.


Escherichia zakonisht prek vetëm fëmijët?
Po, normalisht manifestohet në forma të rënda vetëm te fëmijët. Të rinjtë infektohen dhe “zhvillojnë” një sëmundje gastroenterite shumë të rëndë, por pa komplikacione renale. Bakteri 104, është i veçantë nga ata të studiuar deri më tani.


Si merret infeksioni nga e. coli?
Përmes konsumimit të ushqimeve apo ujit të kontaminuar. Gjedhët mund ta transmetojnë përmes mishit apo qumështit. Nëse kafsha është mbartëse e bakterit patogjen mund të kontaminojë gjithë produktet dhe ambientin ku jeton. Ky infeksion është zoonotik, pasi burimi kryesor i tij janë gjedhët dhe dhentë, ku plehu i tyre që shpërndahet si i ujshëm në vendet e kultivimit të produkteve me orgjinë bimore, si sallata, spinaqi, kastravecët, i kontaminon këto produkte ushqimore duke e kaluar infeksionin te njeriu.
Si parandalohet infeksioni
Higjiena është mbrojtja e vetme për të parandaluar çdolloj infeksioni ushqimor. Duhet të evitosh konsumin e qumështit të papërpunuar sidomos nga ana e fëmijëve dhe të moshuarve dhe mishin e papjekur (sidomos atë të fast-food-ve). Fëmijët duhen mbajtur larg nga ambientet e kontaminuara nga feçet e deleve dhe gjedhëve. Mos u lani në ujë të ëmbël. Për sa u përket frutave dhe perimeve, duhen larë me shumë kujdes: nuk është nevojshme t’i heqësh nga regjimi ushqimor. Ekspertët po ashtu rekomandojnë që në parim të gjitha produktet ushqimore, si perimet ashtu edhe mishi para konsumimit të nxehen në temperaturë prej 70 gradë të paktën për dhjetë minuta. Në këtë mënyrë vriten bakteret.
Cilat janë simptomat
E para është diarreja, që brenda pak orësh bëhet hemorragjike. Duhet të alarmohemi vetëm kur merr këto karakteristika dhe shfaqen shenja gjaku. Atëherë duhet të drejtohemi menjëherë te mjeku. Simptomat janë të ndryshme nga koliti bakterial klasik. S’ka temperaturë dhe ka dhimbje të forta barku. Shpesh ky lloj infeksioni ngatërrohet me apandesitin. Diarreja nga escherichia coli në pjesën më të madhe të rasteve zgjidhet vetëm brenda 4-5 ditëve. Në rastet më të këqija helmi qarkullon duke shkaktuar anemi dhe insuficencë renale.
Si kurohet?
Për fat të keq nuk ka kurë specifike, terapia me antibiotikë, ashtu si me gastroenteritet nuk është efikase, madje mund të përkeqësojë situatën. “Nëse shkatërrohen bakteret me antibiotikë, atëherë lirohen më shumë qeliza helmuese dhe ashpërsohen simptomat. Pra kjo është absolutisht kundërproduktive. Dhe kjo është arsyeja pse antibiotikët për fat të keq nuk janë në asnjë mënyrë mundësi e terapisë për rastet me infeksionet EHEC”, thonë mjekët. Prandaj mjekëve nuk u mbetet tjetër veç mundësisë për të zbutur simptomat. Në këtë mes ndihmojnë infuzionet, të cilat kompensojnë humbjen e lëngjeve te pacientët, te pacientët me simptoma të rënda, pastrimi i gjakut përmes dializës mund të parandalojë dëmtimin e përhershëm të veshkave.