Nuk ndihmon fusnota!

[Hajra]

Refuzohet tenisi, nuk ndihmon fusnota


Driton Latifi | 08-03-2012 10:18 CET


Federata e Tenisit e Kosovës (FTK) ka marrë refuzimin e radhës nga Federata Evropiane e Tenisit (Tennis Europe – TE) për anëtarësim në këtë shtëpi evropiane të tenistëve.
FTK-ja më 5 janar ka dorëzuar aplikacionin për pranim në TE, kurse mbledhja e bordit ekzekutiv të TE-së është mbajtur më 7 shkurt në Zurich të Zvicrës, ku anëtarësimi i Kosovës ka qenë një ndër pikat e rendit të ditës.
Meqenëse Federata kosovare nuk kishte informuar me asnjë shkresë në lidhje me mbledhjen në fjalë, presidenti i FTK-së, Shkelzen Domi kishte vendosur t’i shkruante një letër presidentit të TE-së, Jacques Dupre në lidhje me momentin e ri pas bisedimeve Kosovë – Serbi dhe marrëveshjes për përfaqësim të Kosovës më fusnotë, por as kjo nuk kishte kryer punë.
“Meqenëse nuk kishte përgjigje, informova presidentin e tenisit evropian, Dupre në lidhje me zhvillimet më të reja, sidomos sa i përket marrëveshjes së përfaqësimit rajonal të Kosovës me fusnotë, duke sqaruar gjithë kuptimin e saj”, tha Domi.
“Besoj dhe shpresoj se edhe Bordi i Tennis Europe do ta marrë ne konsiderat këtë moment të ri dhe do të na pranojë nën ombrellen e vet si Kosova*”, i kishte shkruar ndër të tjera Dupresë, Domi.
Megjithatë, përgjigjja kishte ardhur para dy ditësh, negative me arsyetime.
“Me datën 6 mars 2012, më erdhi letra nga kryetari i Tennis Europe, Jacque Dupre, ku si herëve tjera, me keqardhje, po na informon se nuk po e mbështesin aplikimin tonë, deri sa Komiteti Olimpik Ndërkombëtar nuk e pranon Komitetin Olimpik te Kosovës”, tha Domi. TE është dashur që kërkesën e Kosovës për anëtarësim ta procedojë në kuvendin e rregullt që këtë vit mbahet në fund të muajit mars.
“Sidoqoftë, ne jemi të vetëdijshëm dhe duke përcjellur zhvillimet e reja dhe përparimet politike dhe të nivelit sportiv. Shpresojmë se së shpejti do të jemi të mundësi të shqyrtojmë zgjedhje të reja dhe dëshirojmë të përkrahim zhvillimin e tenisit në rajonin e Kosovës”, thuhet në letrën e Dupresë, e cila i është përcjellur edhe presidentit të federatës botërore të tenisit (ITF), Ricci Bitti.
Kosova është pjesë e programeve zhvillimore të Tennis Europe, si shtete tjera të pranuara, ndonëse nuk figuron si e tillë në faqen zyrtare të TE-së. FTK-ja në saje të këtyre programeve ka përfituar ndihmë në rekuizita dhe në licencimin e trajnerëve dhe arbitrave.