Shaban Polluzha [Arkivi]

Hajra

15-04-12, 16:30

http://www.zeri.info/fotografia.php?id=51322

Shaban Polluzha - heroi i mbetur jashtë historisë
Fadil Sertolli | 15-04-2012 13:19 CET

I shpallur hero i Kosovës me dekret presidencial, Shaban Polluzha edhe 70 vjet pas vrasjes ende nuk figuron në tekstet e historisë të arsimit fillor dhe atij të mesëm.

Ndonëse me veprat e tij ai u bë pjesë e historisë, por jo edhe asaj të shkruar, Shaban Polluzha mbeti vetëm në tregimet e të moshuarve, disa prej të cilëve edhe morën pjesë në betejat e komanduara nga ai kundër pushtuesit serbo-jugosllav.

Trimëria dhe strategjia e tij luftarake jehon vetëm si legjendë në opinionin gjithëshqiptar, por jeta, vepra dhe rënia e Polluzhës nuk është futur në librat shkollorë.

Megjithëkëtë, institucionet janë kujtuar për të. Më 20 shkurt 2009, me rastin e 64- vjetorit të vrasjes së Shaban Polluzhës, në Prishtinë, në një akademi përkujtimore, nën kujdesin e kryeministrit të Republikës së Kosovës, Hashim Thaçit, është lexuar dekreti, përmes të cilit ish-presidenti i Kosovës, Fatmir Sejdiu, i dha Shaban Polluzhës urdhrin “Hero i Kosovës”, për punën dhe kontributin e tij, për lirinë dhe pavarësinë e Kosovës. E, këto merita nuk bëjnë pjesë në librat shkollorë. Asnjë tekst historie në arsimin parauniversitar nuk përmend emrin e tij.

Ministria e Arsimit, Shkencës dhe Teknologjisë e Kosovës nuk është deklaruar për këtë lëshim historik. Ministri Ramë Buja nuk ka marrë mundin të thotë madje ndonjë fjalë, edhe pse është pyetur nga gazeta. Buja për më shumë se një javë nuk iu është përgjigjur telefonatave të “Zërit” as sms-ve në telefonin e tij personal. Edhe në takim me gazetarin, ministri Buja ka sugjeruar të pyeten këshilltarët e tij për këtë temë. Përderisa i pari i arsimit nuk ka dhënë përgjigje për këtë, ekspertë të arsimit vlerësojnë se mosprezantimi i figurës së Shaban Polluzhës në librat e historisë është një mangësi dhe dëm i madh për popullin e Kosovës.

Eksperti i Arsimit, Halim Hyseni, thotë se Polluzha ka luftuar për mbrojtjen e identitetit tonë nacional dhe nuk mund t’i mohohet nga askush. “Largpamësia e tij ka qenë me kohë dhe sikur ta kishin pasur të tjerët atë largpamësi të tij, në kohën që jemi edhe tani, sigurisht që gjendja e shqiptarëve në rajonin e Ballkanit do të ishte krejt ndryshe”, ka thënë Hyseni.

Sipas tij, mosprezantimi i Polluzhës në librat e historisë është një mangësi, dëm i madh për popullin e Kosovës. Polluzha, sipas Hysenit, ka qenë shumë largpamës, duke i parë orientimet të cilat po bëheshin, mirëpo një gjë e tillë fatkeqësisht nuk e kishte përkrahjen nga të tjerët. “Sikur të kishte përkrahje Polluzha nga 1945 e këndej, kjo katrahurë që u ka ndodhur shqiptarëve nuk do t’u ndodhte. Prandaj, kjo nuk guxon dhe nuk është dashur të guxohet që të ndodhë, që Polluzha të mos figurojë në librat e historisë”, ka thënë Hyseni.

Por, drejtori i Institutit të Historisë, Jusuf Bajraktari, ka kundërshtuar zërat se bëmat e Polluzhës nuk figurojnë në librat e historisë. Sipas tij, edhe figura, por edhe bëmat e Shaban Polluzhës janë në libra. “Figura e Polluzhës është në libra të klasës së 9, 12 dhe 13. Aty Polluzha është si bartës i cili ka bartur barrën e rezistencës menjëherë pas Luftës së Dytë Botërore. Aty flitet për administrim ushtarak... etj”, ka thënë Bajraktari duke shtuar se tash botimit të librave të rinj do t’i bashkëngjitet edhe atributi i Polluzhës.

Nga ana tjetër, sipas Shkëlzen Gashit, autor i raportit “Kosova 1912-2012 në tekstet mësimore të historisë në Kosovë, Shqipëri dhe Serbi”, i cili do të publikohet së shpejti nga organizatat KEC dhe KAHCR, njëra prej gjetjeve të raportit është mosprezantimi i Shaban Polluzhës dhe veprës së tij në tekstet mësimore të historisë për shkolla fillore e të mesme në Kosovë.

Sipas tij, prezantimi i ngjarjeve të rëndësishme historike dhe protagonistëve të tyre varet edhe nga prejardhja gjeografike e autorëve të teksteve të historisë. “Duket se kjo ka pasur ndikim edhe në mosprezantimin e Shaban Polluzhës dhe prezantimin selektiv e superlativ të Fadil Hoxhës në tekstet tona mësimore të historisë. Nuk do të çuditesha nëse pushteti aktual në të ardhmen e afërt do ta caktonte ndonjë historian nga Drenica që të shkruajë për këtë pjesë të historisë në tekstet mësimore, e ku Fadil Hoxha nuk do të prezantohej fare, kurse Shaban Polluzha do të prezantohej në superlativ”, ka thënë Gashi.

Ai ka theksuar se tekstet mësimore të historisë për shkollat fillore e të mesme, sa i takon prezantimit të historisë së Kosovës “duhet të ndryshohen radikalisht dhe sa më parë”. Tekstet e shkollave të Kosovës dhe Shqipërisë, sipas tij, nuk e specifikojnë askund se një pjesë e partizanëve të Kosovës, të prirë nga Shaban Polluzha, e refuzojnë urdhrin që të shkojnë në veri të Jugosllavisë për të luftuar me trupat gjermane.

“Në këto tekste nuk figuron as se partizanët e Polluzhës të koncentruar kryesisht në Drenicë, likuidohen shpejt nga partizanët jugosllavë e shqiptarë të Kosovës, të ndihmuar edhe nga divizione me partizanë nga Shqipëria”, ka thënë Gashi.

http://www.zeri.info/artikulli/1/2/47641/shaban-polluzha-heroi-i-mbetur-jashte-historise/undefined