Lajme
 

P.Mur: Beogradit nuk i takon një vend në tavolinën e bisedimeve për statusin final të Kosovës



Pragë, 29 shtator 2003 - Duke folur për rrezikun që në bisedimet për çështjet teknike Prishtinë-Beograd të preket edhe çështja e statusit, analisti i radios "Evropa e lirë" nuk mendon që tash ka një rrezik, por ky rrezik ekziston në planin më afatgjatë.



Megjithatë ai mendon që sapo dikujt i jepet një pozicion fillestar në bisedë, do të përpiqet të ketë më shumë influencë në të ardhmen. "Nëse Serbisë do t'i lejohet një vend në tavolinën e bisedimeve për Kosovën, në këto bisedime praktike, atëhere do të jetë më e vështirë në të ardhmen t'i thuhet Beogradit që nuk ke vend në tavolinën e bisedimeve ku do të diskutohet statusi", thotë analisti Patrik Mur.



"Por, duhet bërë e qartë që ka një rrezik që nëse Beogradi merr pjesë në këto bisedime, atëhere do të kërkojë të drejtën e vetos në bisedimet për statusin final dhe mendoj se kjo nuk do t'i shërbejë askujt, përfshirë dhe serbët e Serbisë", thotë ai.



Por, analisti Mur thotë se ekziston një rregull që nga kohët e hershme se ata që humbin luftëra humbin territore. "Beogradi për arsye që dihen fare mirë, e humbi Kosovën dhe bashkësia ndërkombëtare duhet t'ia bëjë të qartë se ky është një fakt dhe t'i japë fund kësaj çështjeje".



Andaj Mur është i mendimit që Beogradit nuk i takon një vend në tavolinën e bisedimeve për statusin final.



"Sa më shumë kohë dhe energji që autoritetet serbe shpenzojnë rreth problematikës së Kosovës, që në të vërtetë e kanë humbur, aq më shumë para dhe vëmendje investohet jashtë problemeve reale të Serbisë, e që janë krimi, varfëria dhe korrupsioni", thotë Mur, duke shtuar se "nuk është në interesin e serbëve asgjëkundi të inkurajohen se kanë një të ardhme në një Kosovë të kontrrolluar nga Beogradi".



Ai në këtë aspekt e sheh edhe rrezikun që Kosova do të përdoret në politikën serbe si një futboll politik në rivalitetin mes politikanëve serbë.



Poashtu Beogradi, duke ngritur problemin e Kosovës përpiqet të hapë "një çështje më të gjerë kufijsh në Ballkan, që përfshin ndarjen e Bosnjes, në të cilën Republika Serbe do t'i jepej Serbisë në këmbim të pranimit të humbjes së Kosovës nga ana e Serbisë, që tashmë ka ndodhur", thotë analisiti i radios "Evropa e lirë".

Katër polic serbë të vrarë në Nish
 

Policët e vrarë serbë në Nish janë nga Kosova



Nish, 30 shtator - Pjesëtari i shërbimit sekret serb Vladan Rovçiq ka vrarë sot në mëngjes katër kolegë të tij, ndërkaq tre të tjerë i ka plagosur, ka njoftuar një zyrtar i policisë në Nish.

Incidenti ka ndodhur rreth orës 8.00 të mëngjesit në ndërtesën e policisë në qendër të Nishit, ku ndodhet policia serbe nga Kosova.

Katër pjesëtarët e vrarë të këtij shërbimi sekret serb janë nga Kosova dhe ata kanë punuar në sektorin e Agjencisë Informative të Sigurimit ( BIA - Bezbedonosna Informativna Agencia) nga Prishtina, njoftojnë mediat serbe. Për sulmuesin thuhet se ka qenë me "çrregullime psikike", por sipas një njoftim tjetër ai është revoltuar kur ka marrë vesh se do të mbetet pa punë.

RReth bisedimeve me Beogradin rreth qeshtjeve teknike,me pelqeu komenti i analitit Mur,ketu kisha shtu edhe dicka cka kam pas rast te ndegjoj permes tv-se ,nje koment per shtyp qe e kishte dhene zt.Haradinaj..po mundohem ti citoj fjalet e tij .....ta kemi ne pavarsin e Kosoves ,ta kompletojm qeverin (siq e dime te gjithe ne kemi nje qeveri te pergjysmuar)e mandej mund te bisedojm ne nje tavoline me Beogradin ,te dihet kend jemi duke e perfaqsu.

Kidnapues të armatosur kanë rrëmbyer 6 persona në bregdetin
 

Kuala Lampur, Malaizi, 6 tetor – Kidnapues të armatosur, me një motoskaf të shpejtë, kanë rrëmbyer 6 persona në bregdetin e largët malaizian Borneo dhe pastaj kanë ikur, kanë bërë të ditur zyrtarët, njofton Rojter. Të rrëmbyerit janë tre indonezianë dhe tre filipinas, të gjithë burra rreth të ‘30-tave. Kidnapuesit besohet të jenë piratë maleizianë dhe nuk besohet të jenë përzier të huajt, kanë thënë zyrtarët. Por, diplomatët kanë thënë se sulmi ka ngjashmëri më dy sulmet e vitit 2000 në bregdetin maleizian, të kryera nga grupi ekstremist islamik në jug të Filipineve, Abu Sajaf, që ka lidhje me Al Kaidën.

Holbruk e Kushner bënë thirrje?
 

Prishtinë, 6 tetor - Në përfundim të vizitës së tyre në Prishtinë, diplomati amerikan Riçard Hollbruk dhe kryeadministatori i parë i Kosovës Bernar Kushner u bënë thirrje liderëve të institucioneve të Kosovës që të marrin pjesë në bisedimet e caktuara më 14 në Vjenë. Këto komente Hollbruk e Kushner i bënë sot në një takim në komunën e Prishtinës, ku diskutuan në temën "Ardhmënia e Kosovës".

Diplomati Hollbruk edhe njëherë u bëri thirrje liderëve të Kosovës që pa hezitim të shkojnë në Vjenë, ngase mosshkuarja do të ishte fitore politike e Serbisë, nënvizoi ai. Hollbruk shtoi se bisedimet janë shumë të rëndësishme dhe kjo do të jetë edhe fillim i bisedimeve për statusin përfundimtar të Kosovës. "Edhe pse zyrtarisht nuk do të flitet për statusin, këto bisedime janë për statusin, fillim i procesit. Si mund ju që të mos shkoni", pyeti Hollbruk. "Nëse liderët nuk janë të gatshëm për bisedime, ky është sinjal i keq që instiucionet e Kosovës nuk janë të gatshme të angazhohen për çështjet që janë me rëndësi për popullin e Kosovës", tha ai.

Hollbruk poashtu me këtë rast tha se edhe pas zgjidhjes së statusit, në Kosovë është e nevojshme prezenca civile dhe ushtarake për t'i mbrojtur minoritet, por më parë shqiptarët duhet të dëshmojnë se vetë do t'i mbrojnë ato.

Nga ana e tij Bernar Kushner tha se është i lumtur për të arritjet e deritashme në Kosovë, por shprehu pakënaqësi për vazhdimin e dhunës etnike. "Tani është në proces kalimi i kompetencave dhe përgjegjësive. Ky është proces i gjatë, por ju jeni në rrugë të drejtë", tha Kushner, duke shtuar se "dhuna vazhdon ta varrosë procesin paqësor dhe kjo dërgon fotografi të keqe në botë për Kosovën", tha ai. "Qytetarët e Kosovës nuk do të mund të realizojnë qëllimet e tyre nëse serbët nuk janë të sigurtë dhe nuk mund të kthehen në shtëpitë e tyre". u shpreh Kushner.

Shtetet e Bashkuara e mirëpresin fillimin e dialogut
 

Uashington, 7 tetor – Shtetet e Bashkuara e mirëpresin shpalljen e hapjes së dialogut të drejtpërdrejtë ndërmjet autoriteteve në Beograd dhe Prishtinë që do të fillojnë në Vjenë më 14 tetor. Në një deklaratë të zëdhënësit të Departamentit të Shtetit Riçard Bauçer thuhet se fillimi i këtij dialogu është një hap i rëndësishëm përpara në rrugën që ka shtruar Rezoluta 1244 e Këshillit të Sigurimit të Kombeve të Bashkuara. Ky dialog do të përfshijë diskutimin e çështjeve praktike të interesit të përbashkët, si çështjet e energjisë dhe transportit, personave të zhdukur si dhe kthimi i të zhvendosurve. Shtetet e Bashkuara e konsiderojnë këtë dialog jashtëzakonisht të rëndësishëm, dhe shpresojnë se qeveria e Serbisë dhe Malit të Zi dhe udhëheqësit e Institucioneve të Përkohshme të Vetëqeverisjes të Kosovës do të kenë qasje serioze dhe do të dërgojnë përfaqësim politik adekuat të nivelit të lartë në nismën e bisedimeve në Vjenë.

Në deklaratë bëhet e ditur se delegacioni i SHBA-ve në hapjen e bisedimeve në Vjenë do të udhëhiqet nga zëvendësndihmësi i Sekretarit të Shtetit për çështje evropiane dhe të evroazisë, Lorens Rosin, dhe në të do të jenë edhe ambasadori për Serbi dhe Mal të Zi, Uilliam Montgomeri dhe shefja e Zyrës së SHBA-ve në Prishtinë

Podujevë: Vetëvritet Ali Vokrri dhe dy persona goditen
 

Podujevë, 7 tetor – Policia rajonale e UNMIK-ut në Prishtinë ka raportuar sot se mbrëmë në rajonin e Podujevës ka ndodhur një vetëvrasje në fshatin Sfeçël dhe një tentim vrasje në Podujevë.

"Në fshatin Sfeçël, mbrëmë rreth orës 18.00 policia është informuar se një njeri në atë fshat ishte bindur të bëjë vetëvrasje me një revole", thuhet në raportin e policisë. Policia menjëherë ka dalë vendin e ngjarjes dhe ka gjetur trupin e pajetë të viktimës të shtrirë në banjo me një revole të kalibrit 9 mm në duart e tij.

Zëdhënësi i policisë rajonale të UNMIK-ut Malkolm Eshbi tha se viktima quhet Ali Vokrri i lindur më 1965, kurse motivi nuk dihet ende derisa hetimet janë duke u kryer. Nga burimet të tjera merret vesh se i ndjeri para disa muajve është kthyer nga Gjermania dhe ishte i pamartuar.

Poashtu mbrëmë rreth orës 18.20 në Podujevë polica ka arrestuar 2 persona pas një ndeshjeje futbolli që kishin goditur me thikë dy persona tjerë duke u shkaktuar lëndime të shumëfishta serioze. Sipas informatave të policisë, shkaku i këtij incidenti ishte mosmarrëveshja rreth ndeshjes së futbollit. Malkolm Eshbi tha se për të dy rastet hetimet janë duke vazhduar.

Presidenti Rugova priti komandantin e ri të KFOR-it
 

Presidenti Rugova pasi i dëshiroi mirëseardhje gjeneralit Kamerhof, tha se me KFOR-in dhe NAT0-n do të ketë një bashkëpunim të ngushtë. Ai tha se KFOR-i është i dashur dhe i respektuar nga populli i Kosovës. Në këtë takim, tha Presidenti, është biseduar edhe për progresin e arritur në Kosovë, për objektivat e saja zhvillimore, siç është zhvilllimi ekonomik, privatizimi, krijimi i vendeve të reja të punës, integrimi i grupeve etnike.

Beograd megjithat ka gisht në ndaljen procesit privatizimit
 

Përkundër mohimeve kategorike të UNMIK-ut dhe përfaqësuesve të tjerë ndërkombëtarë se procesi i privatizimit në Kosovë nuk është ndalur me kërkesë të Serbisë, megjithatë Beogradi ka gisht në këtë ndalesë.

Sipas një deklarate të ministrit serb të financave Bozhidar Gjeliq, Beogradi disa herë i ka paralajmëruar zyrtarët e Fondit Monetar Ndërkombëtar dhe të Bankës Botërore se Serbia rregullisht i paguan anuitetet e borxhit të jashtëm të Kosovës, i cili është 1,6 miliardë dollarë dhe se gjoja Serbia vetëm gjatë dy viteve të kaluara në emër të kamatave në borxhet e ndërmarrjeve të Kosovës, ka paguar 47 milionë dollarë.

Edhe ministri i ekonomisë Aleksandar Vlahoviq thotë se ndërmarrjet e Kosovës mund të privatizohen vetëm nëse në çmim llogariten edhe borxhet e tyre. Ai thotë se Serbia dëshiron që Kosova të marrë përsipër pjesën e vet të borxheve dhe të respektohet pronari, duke shtuar se shumë ndërmarrje të Serbisë i kanë kapacitetet e veta në Kosovë.

Mirëpo, zëdhënësja e BE-së Monik dë Grot thotë se faza e tretë e privatizimit është anuluar për shkak se administrata e UNMIK-it po bën disa qartësime ligjore që janë në vazhdim e sipër. Ajo hodhi poshtë mundësinë që procesi i privatizimit të jetë ndërprerë me kërkesë të Serbisë.

K. Berisha thotë:
 

Nënkryetari i Lidhjes Demokratike të Kosovës Kolë Berisha thotë se kosovarët duhet të shkojnë në bisedimet e Vjenës. Ai tha se pala kosovare është e interesuar të bisedojë për të zhdukurit në radhë të parë, e pastaj për çështjen e energjisë e të tjera. Ai bëri këto komente në një intervistë dhënë radios "Evropa e lirë". Ai shtoi se kosovarët nuk e kanë asnjë arsye të mos shkojnë në Vjenë, sepse të gjitha të drejtat dhe të gjitha kushtet janë plotësuar që të shkojnë në Vjenë dhe të bisedojnë me palën serbe.

"Kur them të gjitha kushtet kam parasysh faktin se edhe e drejta historike, që dikush thirrej në të si deri më tash, edhe e drejta demokratike dhe çdo e drejtë tjetër është në anën e shqiptarëve, e palës kosovare, prandaj nuk ka arsye që të mos shkohet në Vjenë qoftë edhe për një fotografim të momentit", ka thënë z. Berisha.

Ai ka nënvizuar se shqiptarët nuk janë fajtorë dhe nuk kanë arsye të mos shkojnë në Vjenë, sepse gjatë tërë historisë së tyre kurrë nuk kanë vrarë serbë, apo popuj tjerë, por gjithmonë kanë qenë të dënuar, përkatësisht të masakruar dhe të denoncuar nga popuj tjerë, përkatësisht nga serbët.

E. Busek thotë
 

Koordinatori i Paktit të Stabiliteti për Evropën Juglindore, Erhard Busek ka vlerësuar se në dialogun ndërmjet Prishtinës e Beogradit duhet të përfshihen diplomatë të jashtëm me përvojë. Në një tekst autorial në të përditshmën vjeneze "Kurir" z. Busek ka vlerësuar se zgjedhjet e ardhshme i pengojnë autoritetet serbe që të bëjnë koncesione, ndërkaq qëndrimet krejtësisht të ndryshme të Prishtinës dhe Beogradit flasin në favor të dështimit të dialogut.

Erhard Busek më tutje shkruan se gjendja e tashme në Kosovë nuk mund të zgjasë shumë pasi shqiptarët nuk janë të kënaqur me formulën standardet para statusit, bashkësisë ndërkombëtare kjo situatë po i kushton shumë, ndërkaq Unionin Serbi - Mali i Zi e pengon rrugën drejt Bashkimit Evropian.

Në Meje të Gjakovës u rivarrosën kufomat e 43 shqiptarëve
 

Në kompleksin memorial në Mejë të Gjakovës sot u bë varrimi i kufomave të 43 shqiptarëve, të cilët ishin vrarë në masakrën e forcave serbe në këtë fshat, më 27 prill të vitit 1999.

Në ceremoninë e rivarrimit të tyre, pos familjarëve dhe të afërmve të viktimave, morën pjesë edhe mijëra qytetarë nga Gjakova e rrethina dhe nga mbarë Kosova, si dhe përfaqësues të institucioneve të Kosovës, të pushtetit lokal të Gjakovës si edhe të TMK-së, të partive politike, të organizatave joqeveritare e të tjerë.

Në emër të kuvendit komunal të Gjakovës, nga viktimat e masakrës së Mejes u nga i fundit kryetari i komunës, Aqif Shehu.

"Tragjedia e Mejes, me zërin e saj trishtues, depërtoi në të gjitha instancat politike e ushtarake të botës së qytetëruar", tha z. Shehu.

Ai theksoi se qendrat e vendosjes në botë sot duhet të bëjnë presion të fuqishëm mbi regjimin e Beogradit që të ndriçojë fatin e mijëra shqiptarëve të tjerë, të marrë peng nga forcat ushtarake e policore të Serbisë.

Në emër të organizatës joqeveritare "27 prilli i vitit 1999", nga 43 viktimat te masakrës së Mejes u nda Zeqë Tahiri, në emër të Bashkësisë Islame të Kosovës, Mr Qemail Morina, ndërkaq në emër të Ipeshkvisë së Kosovës u nda i fundit Atë Ndue Kajtazi.

Më 27 prill të vitit 1999 forcat policore e ushtarake serbe kishin vrarë në Meje rreth 400 pleq, gra e fëmijë. Kufomat e tyre ishin transportuar në Serbi, me qëllim që të fsheheshin gjurmët e këtij krimi, i cili konsiderohet ndër krimet më të rënda të regjimit të Millosheviqit në Kosovë.

Eshtrat e 43 shqiptarëve që u varrosën sot në Meje, janë gjetur në një varrezë masive në Batajnicë, afër Beogradit, në Serbi, kurse autoriteteve të UNMIK-ut iu dorëzuan të mërkuren e kaluar.

Dy ushtarë të KFOR-it francez janë lënduar
 

Në raportin e sotëm të KFOR-it thuhet se dy ushtarë të KFOR-it francez janë lënduar në një fatkeqësi trafiku, kur automjeti i tyre transportues i ujit është rrotulluar në Klinën e Epërme në rrugën për Banjë. Të lënduarit janë transportuar në spitalin e Mitrovicës, ku janë pranuar për shërim.

Të njëjtat burime bëjnë të ditur se një patrullë e KFOR-it së bashku me policinë e UNMIK-ut kanë bastisur një shtëpi në Kotor, ku kanë gjetur një pushkë AK-47 dhe një pushkë gjahu, me ç'rast është arrestuar pronari i shtëpisë për armëmbajtje pa leje.

Në rajonin e BSH të Qendrës janë arrestuar dy persona të armatosur me një kalshnikov dhe një revole, të cilët kanë marrë pjesë në një tentimplaçkitje të armatosur në Sibofc të Poshtëm.

Po në këtë rajon, një patrullë tjetër e kësaj brigade të KFOR-it, gjatë bastisjes së një shtëpie në Fushë Kosovë ka zbuluar një revole, 45 rrathë municion të ndryshëm dhe një jelek lufte, ndërsa në Ulkianë (Graçanicë), KFOR-i ka konfiskuar dy pushkë AK-47, dy kuti pajimesh mirëmbajtëse dhe gjashtë karikatorë të zbrazët.

Nga rajoni i BSH të Lindjes njoftohet se një grup të rinjsh duke lozur basketboll kanë gjetur një pushkë AK-47, e cila pastaj iu ka dorëzuar policisë së UNMIK-ut. Veprimi i këtyre të rinjve është çmuar lart nga KFOR-i dhe policia e UNMIK-ut.

Në fund të raportit jipen informacionet nga rajoni i BSH të Perendimit, kurse kësaj herë njoftohet se KFOR-i dhe policia e UNMIK-ut kanë konfiskuar një konvoj prej 10 kamionësh dru të prera ilegalisht, të cilët shkonin nga Lipovica në Gjakovë.

Po nga ky rajon bëhet e ditur se në Zahaq është arrestuar një person për trafikim të armëve dhe të municionit, me ç'rast atij i janë konfiskuar 1345 rrathë municion të kalibrit 7.62 mm, 18 rrathë të kalibirt 14,5 mm dhe disa karikatorë të zbrazët.

Ndërkaq, ekipi i çminimit i kësaj brigade të KFOR-it ka zhvendosur një minë TMM në Drenoc dhe një bombë pushke të tipit M 60, të cilat pastaj i ka shkatërruar në vend me shpërthim të konmtrolluar.

Në fund të këtyre informacioneve bëhet e ditur se një patrullë e BSH të Perendimit ka ndalur një person te Patrikana e Pejës, ia ka konfiskuar një revole dhe pastaj ia ka dorëzuar policisë së UNMIK-ut për armëmbjtje pa leje.

Seri e re e pullave postale të Kosovës
 

Posta dhe Telekomi i Kosovës emitoi serinë e dytë të pullave postale të Kosovës. PTK-ja ato i përgatiti në bashkëpunim me Shtyllën e dytë të UNMIK-ut dhe me Departamentin e Arsimit dhe Shkencës dhe janë të ilustruara me motive tipike kosovare, të cilat janë zgjedhur nga disa punime artistike të nxënësve të Kosovës. Lidhur me këtë, kryesuesi i Departamentit të Arsimit dhe Shkencës Mihael Daksner ka thënë se arti i këtyre nxënësve që do të shihet në tërë botën, tregon vizuelisht se rinia kosovare është duke shkuar përpara dhe është duke ëndërruar një të ardhme më të mirë për Kosovën.

Me rastin e promovimit të kësaj serie të pullave postale të Kosovës, u tha se janë shtypur 200 mijë sosh, në pesë lloje me vlerë të shënuar në DM dhe Euro.Kjo seri e pullave është shtypur në një shtypshkronjë të Austrisë, kurse ushtria austriake ka bërë transportimin e tyre Kosovë.

Presidenti Rugova mori një përgëzim edhe nga boksieri i njoh
 

Boksieri i njohur, Luan Krasniqi në telegramin e tij të përgëzimit për Presidentin Rugova shkruan: - Më lejoni që me rastin e zgjedhjes suaj President i Kosovës t'ju shpreh përgëzimet e mia më të sinqerta ju dhe partisë së cilës i takoni. Shpresoj se angazhimi juaj në drejtim të përmirësimit të jetës së qytetarëve të Kosovës do të jetë permanent.

Si sportist kam besimin që angazhimi juaj do të jetë që sportistëve kosovarë t'u ofrohen kushte më të mira dhe përfundimisht talentet kosovarë të kenë mundësi që vlerat e tyre t'i prezentojnë nën flamurin e Kosovës.

LDK në Gjermani
 

Kryesia e Degës së LDK-së në Gjermani së bashku me kryetarët e nëndegëve, në mbledhjen që u mbajt në Frankfurt, nën drejtimin e Hazir Krasniqit, kryetar, shqyrtoi disa çështje të organizimit të mëtejmë të LDK-së në këtë vend perëndimor, u njoh me disa rrjedha aktuale në Kosovë që nga koha e mbajtjes së zgjedhjeve të dyta komunale si dhe shqyrtoi disa çështje organizative.

Hazir Krasniqi, kryetar i Degës së LDK-së në Gjermani i njoftoi të pranishmit në pika të shkurtëra rreth zgjedhjeve të dyta komunale në Kosovë. Ai tha se një mirënjohje e madhe për kryetarin Ibrahim Rugova është zgjedhja e tij senator nderi i Bashkësisë evropiane siç ishte edhe vendimi i tij i për emërimin e ish-senatorit Bob Doll për Ambasador nderi të Kosovës në SHBA, detyrë e cila me kënaqësi u pranua nga ai. Në vazhdim Hazir Krasniqi tha se një mirënjohje e madhe i takon kryetarit Ibrahim Rugova i cili festën e 28 Nëntorit e kremtoi aty ku duhej - në Kosovë, në mesin e popullit të vet dhe aty shpalosi idenë për flamurin dhe hymnin e Kosovës. Një gjë e tillë është reale pasi që po e dëshirojmë Kosovën si shtet të pavarur atëherë duhet t´i duam edhe simbolet e saj.

Nga diskutimet e tjera u kërkua si i domosdoshëm vazhdimi i veprimtarisë politike të shqiptarëve edhe jashtë, porse aty-këtu mund të bëhet ndonë riorganizim sidomos në aspektin territorial, ngase në kuadër të një dege (siç është Gjermania) aktivistët për pjesëmarrje në një mbledhje duhet të udhëtojnë edhe më tepër se 1.000 kilometra. Prandaj, vlerësuan ata, të kota mund të jenë kërkesat e çjerra të disa pseudopatriotëve për shuarjen e aktivitetit politik të shqiptarëve në mërgatë, ngase duhet të dinë se një organizim të tillë të krijuar me mund e sakrifica askush nuk ka të drejtë e as që mund ta shuajë. Për diçka të tillë vendosin vetëm anëtarët e partive politike të cilat dëshirojnë të mbajnë atë organizim.

Nga të gjithë të pranishmit në këtë tubim u përkrah propozimi i Ibrahim Rugovës që Kosova të ketë flamurin dhe hymnin vet, sepse ato janë simbole të një shteti të cilin çdo ditë e zëmë në gojë.

Në vazhdim Zymer Lulaj, kryetar i nënkëshillit për Gjermnai të ngritjes së shtatores së Sali Çekajt në Deçan, informoi të pranishmit me shumën e mjeteve të grumbulluara ku siç tha ai janë grumbulluar rreth 37 mijë euro dhe për këtë falënderoi të gjithë ata që e ndihmuan këtë aksion të Degës së LDK-së në Gjermani.

Në këtë tubim u zgjodhen edhe grupet punese të degës së LDK-së në Gjermani. Kryetarë të komisioneve u zgjodhen: Myftar Dragidella (informim), Shpend Shala (financa e kontrollim të arkës), Nazmi Rudari (arsim, kulurë e sport) dhe Hafiz Gagica (për bashkëpunim me organizatat vendore).

Fjala e Presidentit të Kosovës Ibrahim Rugova
 

Me rastin e vrasjes së Ukë Bytyçit, kryetar i Asamblesë komunale dhe kryetar i degës së LDK-së në Suharekë, sot në Prishtinë, nën drejtimin e Ibrahim Rugovës, President i Kosovës dhe kryetar i LDK-së, u mbajt një mbledhje përkujtimore e Kryesisë dhe Këshillit të Përgjithshëm të LDK-së. Merrnin pjesë anëtarët e organit më të lartë të LDK-së, familja e të ndjerit Ukë Bytyçi, si dhe kryetari i Kuvendit të Kosovës Nexhat Daci dhe kryeministri i Kosovës Bajram Rexhepi.

Pasi me një minutë heshtje u nderua figura e Ukë Bytyçit, në këtë mbledhje përkujtimore foli Presidenti Rugova, i cili në fillim tha:

"Jemi tubuar sot në këtë mbledhje përkujtimore për një dhembje të madhe e të thellë, për t’i bërë nderimin Ukë Bytyçit, që dje në mesditë ia shuan jetën vrasësit e lirisë dhe të pavarësisë së Kosovës".

"Jemi tubuar sot për t'i bërë nderimin kryetarit të Komunës së Therandës, mikut tonë, aktivistit dhe punëtorit të shtetit të Kosovës dhe bashkëpunëtorit tim shumëvjeçar, Ukë Bytyçit", theksoi Presidenti Rugova.

"Kriminelët e vranë pa u mbushur njëzet e katër orë pas përfundimit me sukses të zgjedhjeve të dyta lokale të Kosovës së lirë, të cilat ia zbardhën fytyrën Kosovës. Por, dje në mesditë vrasësit mizorë, duke vrarë Ukë Bytyçin, deshën t'ia nxijnë fytyrën Kosovës. Vrasja e Ukë Bytyçit është akt terrori kundër pavarësisë, lirisë dhe demokracisë së Kosovës, është kundër ardhmërisë së fëmijëve tanë dhe fëmijëve të tyre".

Në vazhdim Presidenti Rugova përkujtoi se Ukë Bytyçi ishte njëri ndër themeluesit dhe kryetar shumëvjeçar - prej themelimit - të Degës së LDK-së në Therandë, Suharekë. Ishte anëtar i Këshillit të Përgjithshëm prej Kuvendit të Parë të LDK-së, deputet i Kuvendit të Republikës së Kosovës në dy mandate, më 1992 dhe 1998-2000. Më 1993 u dënua me burg trevjeçar nga pushtuesi i Kosovës, si pjesëtar i Ministrisë së Mbrojtjes të Kosovës. Gjatë luftës u bë ushtar i lirisë dhe udhëheqës i forcave lokale në rrethinën e Therandës për të mbrojtur shtetin e Kosovës.

"Pas luftës Ukë Bytyçi iu kthye punës politike dhe jetës normale. Menjëherë filloi punën e tij në rindërtimin e Therandës, në aktivizimin e ekonomisë së Therandës. Në zgjedhjet e para lokale, para dy vitesh, u zgjodh kryetar i Komunës së Therandës. Për dy vjet Ukë Bytyçi bëri shumë punë në forcimin politik, administrativ e ekonomik të Therandës. Kështu, sot, Theranda është njëra ndër qendrat më të fuqishme ekonomike e kulturore të Kosovës", tha në vazhdim Presidenti Rugova dhe vazhdoi:

"Për 13 vjet të veprimit të Tij në LDK dhe në institucionet shtetërore, Ukë Bytyçi punoi pa u ndalur, me energji të pashoqe, për lirinë dhe pavarësinë e Kosovës".

"Në rrugë të fshatit Leshan të Therandës, u vra dje, nga kriminelët, kur shkonte t'i falënderonte qytetarët që votuan për të dhe LDK-në për komunën e Therandës dhe për Kosovën.

Vrasja e Ukë Bytyçit ka prapavijë politike, për fat të keq, dhe vjen pas vrasjes së aktivistëve tanë të dashur pas luftës, Haki Ymeri, Shaban Manaj, Xhemail Mustafa, Ismet Rraci, kryetar i komunës së Klinës, dhe deputetit të Kuvendit të Kosovës, Smajl Hajdaraj", tha zoti Rugova dhe theksoi:

"Do t'i marrim të gjitha masat, së bashku me UNMIK-un dhe KFOR-in, që vrasësit e Ukë Bytyçit t'i nxjerrim para drejtësisë dhe të marrin dënimin e merituar. Ne duhet t'i izolojmë kriminelët vrasës, si shtet, si shoqëri. Kërkojmë nga disa parti politike t'i qetësojnë anëtarësitë e tyre dhe t'i mësojnë me jetën demokratike të Kosovës", tha zoti Rugova.

"Ne sot kemi dhembje të madhe. Dhembje të madhe ka e gjithë Kosova për vrasjen kriminale të birit të saj, Ukë Bytyçit. Në këtë dhembje të madhe ne kemi edhe ndjenjën e krenarisë për Ukë Bytyçin, si njeri dhe mik tonin dhe për veprën e Tij madhështore për lirinë dhe pavarësinë e Kosovës.

Ukë Bytyçi do të mbetet si njëri ndër trimat më të mëdhenj në historinë më të re të Kosovës, si burrë i guximshëm, energjik e i mençur, që veproi për vendin e vet pa u ndalur kurrë".

"Këto ditë, për dy javë rresht, gjatë fushatës parazgjedhore ishim së bashku me Ukë Bytyçin. Ai më 15 tetor 2002, siç e bëri edhe vjet dhe parvjet, kishte organizuar një tubim madhështor me qytetarët e Therandës për Presidentin e Kosovës dhe LDK-në e qytetit, ku shprehej dashuria dhe përkrahja për birin e tyre, Ukë Bytyçin. Të premtën e pashë në një takim me kryetarët e degëve të LDK-së dhe bëmë një shaka. I thashë se Theranda do të mbetet emërtim i Suharekës, edhe pse dy ditë më parë e kisha përmendur si emër të lashtë shqiptar në Prizren. M’u përgjigj me buzëqeshje: e kemi rregulluar këtë me Prizrenin. Pastaj kërkoi një vizitë gjatë javës me afaristët e Therandës në Rezidencë. U pajtuam".

"I tillë ishte Ukë Bytyçi, gjithmonë i gjallë, energjik, punëtor e i urtë", nënvizoi Presidenti Rugova.

"Sot i përkujtojmë edhe dy shoqëruesit e tij, që dje u vranë bashkë me Ukë Bytyçin, Bajram dhe Bafti Bytyçin.

I qoftë i lehtë dheu i Kosovës!", tha në fund të fjalës së tij Presidenti i Kosovës dhe lider i LDK-së, Ibrahim Rugova, në mbledhjen e sotme përkujtimore kushtuar Ukë Bytyçit.

Vdiq "plaku i flamurit", Bajram Ymeri
 

Pas një sëmundje të gjatë, në Gjilan vdiq në moshën 82-vjeçare Bajram Ymeri nga Llovca, i njohur në popull si "plaku i flamurit".

Tërë jetën e tij, Bajrami nuk u nda nga rruga e rezistencës për liri e pavarësi, duke qenë gjithnjë atje ku sfidohej dhuna dhe terrori i pushtetit serb kundër popullit shqiptar të Kosovës, bashkë me flamurin shqiptar, pa të cilin nuk e bëri asnjë hap, herë duke e bartur lart në supe e ndonjëherë duke u mbështjellur me të. Xha Bajrami, ose axha Balë, siç e quanin të gjithë, ishte dhe do të mbetet në kujtesën e gjilanasve për energjinë pozitive që reflektoi nëpër debate e tubime si dhe për qëndresën e madhe, me të cilën e përballoi dhembjen familjare e kolektive, që ia solli tmerri i luftës së vitit 1999 në Kosovë.

Mjaftonte të ndihej një zë i arsyeshëm kundër dhunës, në cilindo pjesë të Kosovës dhe "plaku rinor", pa hezitim do t`i gjendej përkrahë menjëherë.

Kaptinë e veçantë e jetës së tij, ishte dashuria për librin, shkollën dhe shoqërimi me të rinjtë. (I.M.)

Uashington, 11 tetor 2003 - Shtetet e Bashkuara të Amerikës u kanë bërë thirrje anëtarëve të Qeverisë së Kosovës, që të shkojnë në Vjenë, më 14 tetor, në bisedimet e para me përfaqësuesit e autoriteteve të Serbisë dhe të Malit të Zi, pa marrë parasysh vendimin e Kuvendit të Kosovës, përkatësisht madje edhe nëse Kuvendi i Kosovës nuk i jep pajtimin kryeministrit Bajram Rexhepi për të marrë pjesë në ato bisedime.



Këtë qëndrim të SHBA-ve mbrëmë radios "Evropa e lirë" ia transmetoi një zyrtar i lartë i Departamentit të Shtetit.



Ai ka shtuar se bisedimet do të fillojnë më 14 tetor në Vjenë, pa marrë parasysh përbërjen e delegacionit të Kosovës.

Ris e Dikinsod takojn serishte kreun e PDK-se Hashim Thaqin....!









Lideri i Partisë Demokratike Hashim Thaçi është takuar me shefen e zyrës amerikane në Kosovë Marsi Ris dhe me shefin e zyrës britanike Mark Dikinson. Sipas burimeve nga kjo parti thuhet se dialogu me Serbinë është çështje që po diskutohet. ........!

Presidenti Rugova dhe kryeparlamentari Daci përfaqësojnë Ko.
 

Pas konsultimeve intensive, Presidenti i Kosovës Ibrahim Rugova dhe Kryetari i Kuvendit të Kosovës, Nexhat Daci, kanë vendosur që të marrin pjesë në takimin e Vjenës më 14 tetor 2003.

Udhëheqësit më të lartë të Kosovës, Presidenti Ibrahim Rugova dhe kryeparlamentari Nexhat Daci, këtë vendim e kanë marrë në interes të së sotmes dhe të ardhmes së vendit tonë, Kosovës.

Për këtë vendim është njoftuar dje në mbrëmje Përfaqësuesi Special i Sekretarit të Përgjithshëm (PSSP) Harri Holkeri.

Përfaqësuesit e Grupit të Kontaktit u dakorduan me Holkerin
 

Përfaqësuesit e Grupit të Kontaktit në Kosovë në takimin e djeshëm kanë rënë dakord me shefin e UNMIK-ut, Hari Holkerin, që bisedimet ndërmjet Prishtinës dhe Beogradit të fillojnë në Vjenë edhe pa pjesëmarrjen e kryeministrit të Kosovës.

Pas këtij takimi shefi i Zyrës gjermane, Piter Rondorf ka thënë se delegacioni i Kosovës do të marrë pjesë në takimin e Vjenës.

H. Holkeri?
 

H. Holkeri: Kosova do të përfaqësohet nga presidenti Rugova, i cili është simbol i unitetit dhe Kosovës multietnike



Lidhur me vendimin e kryeministrit Rexhepi për mospjesëmarrje në takimin e Vjenës, ka shfaqur qëndrimin e edhe kryeadministratori i Kosovës, Hari Holkeri, nëpërmjet zëdhënëses së tij Izabela Karlovic. Përfaqësuesi Special i Sekretarit të Përgjithshëm Hari Holkeri ka dhënë këtë deklaratë:

"Gjithë bashkësia ndërkombëtare është angazhuar në mënyrë të drejtëpërdrejt për të mbështetur Presidentin Ibrahim Rugova dhe drejtuesit e tjerë të Kosovës që dëshirojnë t'i japin popullit të Kosovës shansën për të qenë të përfaqësuar në bazë të gjerë në hapjen e bisedimeve të drejtëpërdrejta ndërmjet Prishtinës dhe Beogradit të martën në Vjenë. Meqë siç u tha doli se është e pamundur të përfshihen drejtuesit e Qeverisë në delegacion. Kosova do të përfaqësohet nga presidenti Rugova, i cili është simbol i unitetit dhe Kosovës multietnike, Nexhat Daci, kryetar i Parlamentit, po ashtu do të jetë në delegacion.

Bisedimet e Vjenës do të fillojnë në praninë e përfaqësuesve të nivelit të lartë të bashkësisë ndërkombëtare, pavarësisht nga vështirësitë brenda qeverisë. Ne shpresojmë se kur të fillojnë bisedimet e vërteta teknike në kuadër të grupeve punuese, institucionet e Kosovës do të angazhohen në mënyrë të plotë për të ndihmuar në zgjidhjen e çështjeve, që do të hapen në diskutim që është interes praktik i drejtëpërdrejt për të gjithë qytetarët e Kosovës".

Kryeministri, Bajram Rexhepi, vendosi përfundimisht për të mos marrë pjesë në fillimin e bisedimeve midis Prishtinës dhe Beogradit të martën në Vjenë. Kryeministri Rexhepi tha se është i gatshëm për dialog me fqinjët, por për këtë duhet të vendosë Kosova e jo të tjerët të vendosin në emër të saj.

Rugova, Holkeri dhe Daci udhëtuan sot për në Vjenë
 

Presidenti i Kosovës Ibrahim Rugova, shefi i UNMIK-ut Hari Holekri dhe kryetari i Kuvendit të Kosovës Nexhat Daci sot në mesditë udhëtuan për në Vjenë, ku do të marrin pjesë në fillimin e bisedimeve mes Prishtinës dhe Beogradit për çështje praktike.

Anëtarët e delegacionit të Kosovës, të cilët do ta marrin pjesë në takimin e nesërm të Vjenë deklaruan para mediave në aereportin e Prishtinës se do ta përfaqësojnë Kosovën në mënyrë të denjë dhe interesat e qytetarëve të saj.

Presidenti Rugova tha se vendimin për të marrë pjesë në takimin e Vjenës e ka marrë në në bazë të kompetencave dhe përgjegjësive të institucionit të Presidentit të Kosovës, që dalin nga Korniza Kushtetuese, si dhe pas kërkesave të bashkësisë ndërkombëtare.

Presidenti tha se në Vjenë përfaqëson interesat e qytetarëve të Kosovës, nga të cilët kërkoi përkrahje dhe mirëkuptim.

"Vendimin për të shkuar në Vjenë e kam marrë në bazë të kompetencave të mia kushtetuese që i përfaqësoj të gjithë qytetarët e Kosovës dhe popullin e saj dhe në bazë të kërkesës së bashkësisë ndërkombëtare që Kosova duhet të marrë pjesë në bisedimet për çështje praktike në Vjenë", tha Presidenit i Kosovës. "Në të njëjtën kohë kërkoj dhe besoj se e kam edhe mirëkuptimin e qytetarëve të Kosovës", theksoi Presidenti Rugova, duke nënvizuar se vendimi për pjesëmarrje në takimin e Vjenës është marrë me qëllim që Kosova të mos akuzohet para bashkësisë ndërkombëtare dhe se dëshiron marrëdhënie të mira me të gjithë fqinjët e saj. Ndonëse shumica kanë qenë pro bisedimeve, Presidenti shprehu bindjen se me gjithë dallimet që ekzistonin tash, institucionet e Kosovës do të vazhdojnë të funksionojnë si më parë.

Ndërkaq shefi i UNMIK-ut Hari Holkeri tha se Kosova do të përfaqësohet denjësisht në Vjenë, duke shprehur njëherit keqardhje që në delegacionin e Kosovës nuk ndodhet edhe Qeveria.

"Për fat të keq, mosuniteti i subjekteve politike ka bërë që në Vjenë të mos përfaqësohen të gjitha institucionet e Kosovës. Prej tri institucioneve, atje do të shkojnë vetëm dy. Sigurisht ne do të përpiqemi që atje ta përfaqësojmë në mënyrë të denjë Kosovën". theksoi Holkeri.

Kryetari i Kuvendit Nexhat Daci tha se takimi i Vjenës do të jetë fillimi i një rruge të parë dhe të vështirë të përfaqësimit të drejtpërdrejtë të shtetit të Kosovës, duke shprehur bindjen se në Vjenë Kosova do të përfaqësohet në mënyrë të denjë. Kryeparlamentari Daci tha se mospërfaqësimi i qeverisë në fillimin e dialogut është një hendikep për institucionet e Kosovës. "Unë mendoj që është një hendikep real. Do të ketë kohë për riparime të tilla, por mendoj se në momentet kritike, konform forcës që ka një subjekt politik, duhet t'i marrë përgjegjësitë e veta", tha Daci, duke e quajtur indirekt të gabuar vendimin Kryeministrit për të mos marrë pjesë në takimin e Vjenës.

Grupi Parlamentar i PDK-së vlerëson se kryeparlamentari Daci, nuk e ka mandatin e Kuvendit për ta përfaqësuar Kosovën në Vjenë





Prishtinë, 13 tetor - Grupi Parlamentar i Partisë Demokratike të Kosovës vlerësoi se kryetari i Kuvendit të Kosovës, Nexhat Daci, nuk e ka mandatin e Kuvendit dhe të popullit të Kosovës për ta përfaqësuar Kosovën në Vjenë. Në mbledhjen e jashtëzakonshme të këtij grupi u tha se z. Daci mund të shkojë në Vjenë në mënyrë arbitrare dhe të flasë vetëm në emrin e tij personal. Grupi Parlamentar i Partisë Demokratike të Kosovës thotë se kryeparlamentari Daci ka penguar zhvillimin e një debati që do të çonte në një koncenzus institucional dhe një qëndrim unik të faktorit politik shqiptar lidhur me bisedimet me Beogradin.

Fjala e Presidentit të Kosovës Ibrahim Rugova në takimin e Vjenës



Vjenë, 14 tetor - Në takimin e sotëm në Vjenë mes delegacionit të Kosovës dhe atij të Serbisë të zhvilluar në pallatin Hofburg, në emër të Kosovës foli Presidenti Ibrahim Rugova. Më poshtë po japim teksitn e plotë të diskutimit të Presidentit Rugova.

"Përshëndes hapjen e këtij takimi në Vjenë, të rëndësishëm për vendin tim dhe për rajonin e Evropës Juglindore si dhe për BE, NATO-n dhe SHBA.

Në fillim dëshiroj të flas shkurt për progresin që ka arritur Kosova gjatë katër vjetëve pas luftës, në liri. Kosova ka bërë një progres të madh në të gjitha fushat e jetës.

Gjendja e sigurisë publike është më e mirë. Policia e Kosovës është forcuar dhe kemi filluar specializimin e saj. Kështu policia e Kosovës bashkë me policinë e UNMIK-ut dhe me KFOR-in / NATO-n bën sigurinë e vendit. Në të njejtën kohë është në vendosje e sipër rendi dhe ligji. Gjykatat në të gjitha nivelet po veprojnë deri te Gjykata Supreme e Kosovës.

Do theksuar se Kosova ka pasur progres të mirë edhe në ndërtimin e demokracisë. Gjatë vitit të kaluar u mbajtën zgjedhjet e dyta lokale me mandat katërvjeçar. Që një vit e gjysmë funksionojnë institucionet qendrore: Parlamenti, Qeveria dhe Presidenti i Kosovës, në bazë të zgjedhjeve nacionale të vitit 2001. Parlamenti i Kosovës ka miratuar me dhjetëra ligje në të gjitha fushat e jetës për të gjithë qytetarët e Kosovës.

Një progres të shquar kemi pasur edhe në integrimin e grupeve etnike, apo të minoriteteve. Sot të gjitha minoritetet marrin pjesë aktive në të gjitha institucionet e Kosovës, në nivel qendror dhe lokal. Në Parlament dhe në Qeveri kemi vende të rezervuara për minoritetet. Kështu në Parlament, nga 120 vende, 20 janë të rezervuara për minoritetet, plus vendet e fituara me votë. Në Qeveri e cila ka 10 ministri, dy ministra janë nga minoritetet. Ky është një progres në planin e integrimit administrativ. Duhet thënë se për ditë e më shumë shoqëria e Kosovës po bëhet më e integruar.

Do të punojmë më shumë në planin e komunikimit midis shumicës shqiptare dhe minoritetet siç janë serbët, boshnjakët, turqit, goranët, romët, ashkalinjtë dhe egjiptianët. Pra, duhet të punojmë më intensivisht në fushën e pajtimit dhe të mirëkuptimit të të gjithë kosovarëve, proces të cilin e kemi filluar.

Po ashtu në planin e kthimit të refugjatëve kemi shënuar progres. Janë kthyer mbi 7.000 njerëz të grupeve minoritare, kryesisht serbë. Të gjitha institucionet e Kosovës janë përcaktuar për një kthim individual të të gjithë atyre që dëshirojnë të jetojnë në Kosovë. Nga shumica shqiptare, qindra mijëra njerëz, vazhdojnë të qëndrojnë në Europë dhe SHBA, sepse nuk mund të kthehen për shkak të gjendjes sociale e ekonomike të Kosovës. Unë e them se pas luftës, tash në Kosovë, të gjithë jemi më pak.

Me këtë rast do thënë se edhe në fushën e ekonomisë kemi pasur progres. Sektori privat është mjaft i fuqishëm e dinamik. Kosovarët janë popull ndërmarrës. Vetëm një fakt 95% të buxhetit Kosova e ka bërë nga të hyrat e veta.

Objektivat e institucioneve shtetërore të Kosovës janë: zhvillimi ekonomik, tërheqja e investimeve dhe krijimi i vendeve të punës për të rinjtë. Këto ditë kemi filluar privatizimin së bashku me UNMIK-un si proces pozitiv ekonomik. Mund të themi se Kosova po hyn në fazën e një jete normale të një vendi.

Është politikë nacionale e Kosovës të ndërtojë marrëdhënie të mira me të gjithë fqinjtë e saj. Mund të themi se edhe në këtë fushë kemi pasur progres. Kështu me Shqipërinë kemi marrëdhënie të mira, me Republikën e Maqedonisë kemi filluar një progres si dhe me Malin e Zi. Sot jemi tubuar në Vjenë që të fillojmë një proces të marrëdhënieve pozitive fqinjësore me Serbinë në disa fusha praktike me interes për të dy vendet dhe për rajonin e Evropës Juglindore. Për fillim kemi pranuar të bisedojmë për bashkëpunim në fushën e energjisë, që është problem për gjithë rajonin e Evropës Juglindore, pastaj çështjen e të zhdukurve nga lufta që krijon shqetësime të vazhdueshme, për çështjen e kthimit të refugjatëve në baza individuale të atyre që dëshirojnë të jetojnë në Kosovë, si dhe për çështje të transportit dhe të telekomunikacionit, që është me rëndësi për të dy vendet dhe për rajonin. Me këtë rast do të themelohen grupe punuese, të cilat do të prodhojnë marrëveshje në nivel të dy vendeve.

Sot këtu, në Vjenë jemi takuar për të biseduar për disa çështje praktike midis dy vendeve, Serbisë dhe Kosovës. Dëshiroj të theksoj se është pozitive se të gjitha vendet e rajonit të Evropës Juglindore aspirojnë për integrim në BE dhe në NATO. Këtë e aspiron dhe po përgatitet edhe vendi im Kosova. Pra, një Kosovë demokratike, paqësore e pavarur dhe e integruar në BE e NATO dhe në miqësi permanente me SHBA. Ky aspirim është në të mirë të qytetarëve të Kosovës dhe do ta qetësonte rajonin e Evropës Juglindore. Kosova është e gatshme t’i pranojë obligimet ndërkombëtare.

Do të përdor autoritetin tim së bashku me PSSP-në, zotin Holkeri, që në bisedat rreth çështjeve praktike të involvohen strukturat qeveritare të Kosovës.

Ndërsa gjendemi në këtë takim, dëshiroj të theksoj se e kaluara nuk bën të harrohet, sepse mund të përsëritet në forma më të këqia, por duhet të shikojmë kah e ardhmja. Shpresoj se një ditë Serbia do të kërkoj falje për masakrat e luftës në Kosovë, që do t’i lehtësonte marrëdhëniet midis dy vendeve dhe dy popujve.

Nga ky takim i Vjenës, e përshëndesim Presidentin Bush, Kryeministrin Bler, Presidentin Shirac, Kancelarin Shreder dhe Kryeministrin Berluskoni.

Përshëndetje të veçantë i bëjmë Atit të Shenjtë Papa Gjon Pali II, që gjithmonë lutet për Kosovën dhe paqen e popujve.

Me këtë rast e falënderoj zotin Holkeri që ka punuar shumë për realizimin e këtij takimi.

Po ashtu e falënderoj Presidentin Klestil, Kancelarin Shysel dhe Qeverinë austriake për mikpritjen, ashtu siç di Vjena ta bëjë këtë".

[b]Presidenti Rugova tha se nuk vëren ndryshime në politikën e tashme të Beogradit ndaj Kosovës[/b]



Vjenë, 14 tetor - Pas mbylljes së punimeve në seancë plenare delegacioni i Kosovës ka mbajtur një konferencë të veçantë me gazetarë në të cilën u tha se ky delegacion shpreh vullnetin e Kosovës për marrëdhënie të mira me të gjithë fqinjët dhe është për bisedime.

Presidenti Rugova takimin e Vjenës e konsideron si një sukses në planin administrativ dhe shtoi se mbetet të punohet në planin e komunikimit të shumicës me pakicat dhe në planin e pajtimit. Këto janë procese të cilat tashmë kanë filluar, tha ai.

Presidenti Rugova tha se vendosja e marrëdhënieve të fqinjësisë së mirë me të gjithë fqinjët është një politikë kombëtare e Kosovës. Ndërkaq, njohja formale e pavarësisë së Kosovës do ta stabilizonte rajonin dhe Evropnë Juglinodre, tha ai.

"Unë edhe njëherë theksoj se njohja më e shpejtë formale e pavarësisë së Kosovës, nga SHBA-të, nga BE dhe formalizimi nga OKB-ja, do ta qetësonte këtë pjesë të Evropës dhe të botës, do t'i ndërprente kalkulimet rreth Kosovës, të cilat përsëri kanë filluar të përsëriten", nënvizoi Presidenti Rugova. "Pas intervenimit të NATO-s, bashkësisë ndërkombëtare është një epokë e re për Kosovën, që duhet ta pranojnë të gjithë fqinjët tanë dhe që duhet të njihet", theksoi Rugova.

Presidenti Rugova tha se nuk vëren ndryshime në politikën e Beogradit ndaj Kosovës. "Nuk shoh ndryshime ndaj Kosovës, pra të regjimit të mëparshëm dhe qeverisë së tashme të Serbisë. Unë dëshiroj që ata ta kuptojnë se kanë ndodhur ndryshime dhe sa më herë ta kuptojnë aq më më mirë është për të dy vendet, për vendet fqinje në rajon, për këtë pjesë të Evropës dhe të botës", nënvizoi Presidenti Rugova, i cili në vazhdim foli për objektivat e institucioneve të Kosovës dhe të zhvillimit ekonomik.

Kryeparlamentari Daci theksoi se pavarësia e Kosovës është një proces i pakthyeshëm. "Pavarësia e Kosovës është proces i padiskutueshëm, proces i pakthyeshëm. Them me përgjegjësi të madhe se Kosova dhe kosovarët janë të përgatitur të paguajnë çdo çmim dhe ne e vlerësojmë demokratik për këtë rrugë", tha Daci.

Daci theksoi se Kosova është një storje e veçantë e suksesit të tërë bashkësisë ndërkombëtare. Poashtu Daci tha se pavarësia e Kosovës nuk ka alternativë dhe sa më parë ta kuptojë Serbia dhe bashkësia ndërkombëtare është më mirë, pra që Serbia të mos e mbajë peng Kosovën të mos integrohet në Evropë. "Por edhe Kosova i ka të zhvilluara të gjitha kapacitetet e nevojshme fizike, politike, psikologjike dhe financiare dhe të njëjtën gjë t'ia bëjë Serbisë dhe të jemi peng dhe ta dëmtojmë popullin tonë në Kosovës dhe popullin në fqinjësi. Dmth. të dy vendet tona të paguajnë një çmim të një politike krejtsisht iracionale", tha Daci

Rugova dhe Daci konfirmuan përcaktimin e Kosovës për dialog dhe për një zgjidhje të interesit të përbashkët.

Ndryshe në Holkeri tha se në të ardhmen temat për dialog mbeten po ato që ishin caktuar në takimin e Selanikut: të zhdukurit, kthimi, energjetika dhe telekomunikacioni.

Holkeri tha se në nëntor të këtij viti të vazhdohet me punën e katër grupeve të përbashkta të punës për çëhstjet e mësipërme dhe poashtu do të krijohet një mekanizëm i informimit për rezultatet e e punës së grupeve.

Holkeri takimin e ka vlerësuar shumë të rëndësishëm deh se bashkësia ndërkomëtare do ta mbështesë plotësisht punën e grupeve të punës.

Vlerësimeë pozitive për takimin kanë dhënë edhe Solana, Paten dhe Shefer.

Delegacioni i Kosovës kthehet sot në Prishtinë.

Në Prishtinë u mbajt një protestë kundër fillimit të bisedimeve në Vjenë





Prishtinë, 14 tetor - Në organizim të LPK-së, sot në Prishtinë u mbajt një protestë kundër fillimit të bisedimeve me Beogradin në Vjenë. Protestuesit kërkuan që Kuvendi i Kosovës të miratojë një rezolutë për Kosovën - shtet të pavarur dhe të kundërshtojë bisedimet me Serbinë, para se ajo të njohë pavarësinë e Kosovës. Para protestuesve foli kryetari i LPK-së, Emrush Xhemajli, i cili tha se kjo protestë po mbahet për të kundërshtuar bisedimet e imponuara me Serbinë. Protestën e përkrahën shoqatat e dala nga lufta dhe organizata e studentëve UPSUP.

Dy zyrtarë britanikë vizituan TMK-në





Prishtinë, 14 tetor - Komandanti i TMK-së, gjeneral-lejtënant Agim Çeku, priti sot znj, Katerin Kolloms, Shefe e Departamentit për Kosovë në Ministrinë e Punëve të Jashtme të Britanisë së Madhe dhe majori Riçard Peri, nga Ministria e Mbrojtjes e këtij vendi. Në takim u bisedua për të arriturat dhe zhvillimin e TMK-së si edhe për identifikimin e fushave ku mund të ndihmojnë këto dy ministri të Britanisë së Madhe. Znj Kolloms dhe Majori Peri premtuan se do të angazhohen fuqimisht që ndihmat për TMK-në nga ministritë e tyre të jenë sa më të mëdha.

[b]Lari Rosin i zhgënjyer me qëndrimet jo konstruktive të disa politikanëve të Kosovës [/b]



Uashington, 15 tetor - Një zyrtar i lartë i Departamentit amerikan të Shtetit shprehu zhgënjim ndaj qendrimit të politikaneve shqiptare lidhur me bisedimet e Vjenës.

Lari Rosin, ndihmës zëvendës sekretar i Shtetit, i cili përfaqësonte Shtetet e Bashkuara në bisedimet midis Prishtinës dhe Beogradit dje në Vjenë, i deklaroi "Zërit të Amerikës" se qëndrimi i përfaqësuesve politikë të shqiptareve ishte jo konstruktiv.

Zoti Rosin ishte mjaft i drejtpërdrejtë në komentet e tij lidhur me qëndrimin e përfaqësuesve politikë të shqiptarëve për bisedimet e Vjenës.

"E kam fjalën sidomos për udhëheqës të ndryshëm politikë të Kosovës, të cilët na zhgënjyen së tepërmi me qendrimet jo konstruktive, me pozat e tyre politike si dhe me qendrimet plot paragjykime dhe jo dinjitoze", tha ndihmës zëvendës sekretari amerikan i Shtetit.

Ambasadori Rosin tha se me këto qëndrime ata nuk i bënë një shërbim popullit të Kosovës. Ata, tha ai, dëgjuan njerëz që nuk u dhanë atyre këshilla të mira.

Ambasadori Rosin tha se ishte relativisht i inkurajuar nga fillimi i bisedimeve midis Prishtinës dhe Beogradit.

Natyrisht, tha ai, secila palë shprehu qëndrimet e veta dhe perceptimet e saj politike në deklaratat e hapjes, por këto janë bisedime teknike dhe ajo që në të vërtetë ishte e nevojshme këtu ishte që t’u jepej një shtytje politike ekpertëve të cilët do të diskutojnë më pas për çështjet teknike.

Ai tha se ky ishte qëllimi i takimit të sotëm dhe, sipas mendimit të tij, ky qëllim u arrit.

Zoti Rosin përsëriti se këto nuk janë bisedime për statusin përfundimtar të Kosovës, por bisedime teknike për çështje teknike. Me statusin përfundimtar, tha ai, do të merret një proces i veçantë kur të vijë koha dhe kjo kohë ende nuk ka ardhur.

Qeveria e Shqipërisë përshëndet fillimin e dialogut :
 

Qeveria Shqiptare përshendet fillimin e dialogut Prishtinë Beograd për trajtimin e një sërë problemesh konkrete me interes të ndërsjelltë për të dyja palët, si një hap të rëndësishëm historik në bashkëpunimin mes Prishtines dhe Beogradit përmes dialogut të hapur dhe konstruktiv.

Qeveria Shqiptare shpreh bindjen se faktorët institucionalë dhe politikë në Prishtinë do të vlerësojnë me pjekurinë e duhur perspektivën që hap fillimi i dialogut, dhe me konsesusin edhe te faktorëve të tjerë të shoqërisë cilvile do të kontribuojnë për ecurinë e suksesshme të tij. Qeveria e Shqipërisë shpreson që ky proces do të shërbejë në forcimin e stabilitetit, paqes dhe nxitjes se proceseve integruese në rajon.

Qeveria Shqiptare përshëndet asistencën e faktorit ndërkombëtar, i cili bëri të mundur fillimin e dialogut mes Prishtinës dhe Beogradit, si një premisë të rëndësishme për të ardhmen e rajonit dhe me gjerë, thuhet në një komunikatë të Qeverisë së Shqipërisë.

Solana së shpejti viziton Beogradin e Prishtinën
 

Shefi i diplomcacis dhe i sigurisë së Bashkimit Evropian Havier Solana, në kuadër të një turneu ballkanik së shpejti do të vizitojë Beogradin dhe Prishtinën. Mediat e huaja citojnë zëdhënësen e Solanës, Kristina Galak, të ketë thënë se, pas takimit të Vjenës, kjo vizitë synon të inkurarojë përfaqësuesit e Prishtinës dhe të Beogradit për të vazhduar dialogun e filluar.

"F.tajms":
 

Politikanët e Beogradit ngadalë po fillojnë të pranojnë se kurrë nuk do ta kthejnë Kosovën

Gazeta londineze "Fajnenshëll tajms" në një koment redaksional shkruan se liderët e Serbisë dhe të Kosovës me shumë vështirësi u detyruan të bisedojnë, por të paktën u takuan dhe në këtë mënyrë filloi procesi i gjatë i përcaktimit të të ardhmes së Kosovës.

Gazeta më tutje shkruan se bashkësia ndërkombëtare duhet të vazddojë me presione mbi të dyja palët, sepse pa zgjidhjen e statusit, Kosova do të mbetet një vrimë e zezë e pasigurisë në Evropë.

"Fajnenshëll tajms" shkruan se në shikim të parë duket se kurrfarë kompromisi nuk është i mundur, por politikanët e Beogradit jozyrtarisht ngadalë po fillojnë të pranojnë se kurrë nuk do ta kthejnë Kosovën.

Për pavarësinë e mundshme deri më tash nuk është diskutuar nga frika se kjo do të mund të shtrohet si precedent për pakicat e tjera, sidomos në Maqedoni.

Çfarëdo që të jetë statusi përfundimtar, zgjidhja do të përfshinte praninë e fuqishme të forcave ndërkombëtare të cilat do të mbronin pakicën serbe dhe do të nxisnin kthimin e refugjatëve serbë, përfundon "Fajnenshëll tajms" në një koment të vetin.

Bajram Rexhepi tha se takimi i Vjenës nuk do të ketë ndikime në punën e qeverisë





Prishtinë, 15 tetor - Qeveria e Kosovës pret ofertën e UNMIK-ut për formimin e grupeve punuese për të vazhduar bisedimet për çështje teknike ndërmjet me Beogradin. "Qeveria e Kosovës nuk e ka injoruar dialogun ndërmjet Prishtinës e Beogradit, por ajo i ka kërkuar përgatitjen e këtyre bisedimeve", deklaroi kryeministri Bajram Rexhepi, pas mbledhjes së sotme të qeverisë. Z. Rexhepi tha se Qeveria e Kosovës është e gatshme të ndihmojë formimin e grupeve punuese që pritet ta fillojnë punën në fund të muajit nëntor, pavrësisht prej mungesës së kompetnecave në katër fushat që do të diskutohen në takimet e ardhshme ndërmejt Prishtinës e Beogradit Sipas kryministrit Rexhepi, pjesëmarrja në takimin e Vjenës pa një konsensus paraprak mund të shkaktojë tensione në jetën politike dhe në veprimin e institucioneve, por nuk do të thotë se mund të rezultojë me dorëheqjen e tij. Kryeministri Rexhepi do të ketë një darkë pune me kryeadministratorin Hari Holkeri, në të cilën do të bisedohet për takimin e Vjenës. Ai tha se nga z. Holkeri ka marrë premtime administrata e UNMIK-ut tani do të përqendrohet në prioritet e Kosovës

B. HAXHIU: KA FILLUAR NJË ETAPË E RE E MARRËDHËNIEVE SHQIPTARO-SERBE



15. Tetor, 2003 " Europa e Lirë "





Baton Haxhiu, analist nga Prishtina



RADIO EVROPA E LIRË : Zoti Haxhiu, si e vlerësoni ju fillimin e dialogut ndërmjet Prishtinës dhe Beogradit, në fakt, si e vlerësoni takimin e djeshëm në Vjenë?



BATON HAXHIU : Asgjë e re. Domethënë kam pritur që ky takim të jetë simboli dhe të fillojë procesin e komunikimit shqiptaro-serb, për arsye se konsideroj se lufta në Kosovë ka përfunduar, konsideroj se paqja e papërfunduar, me Vjenën shndërrohet në fillimin e procesit paqësor, [b]prandaj ka qenë e rëndësishme prezenca e delegacionit kosovar në Vjenë[/b] dhe nuk më kanë bërë përshtypje fare fjalimet e asnjërit lider, domethënë as të zotit Rugova dhe as zotit Zhivkoviç, ashtu si edhe fjalimet e ndërkombëtarëve, por me rëndësi është që ka filluar një etapë e re e marrëdhënieve shqiptaro-serbe.



[color=red]Unë nuk mendoj që nga ky takim dikush ka pritur më shumë se kaq. Ajo që ka pritur ka qenë bashkësia ndërkombëtare, e cila ka pritur së paku një respekt të kosovarëve, që prezenca e tyre në Vjenë të jetë ashtu siç ata kanë menduar. [/color]



[b][color=blue]Domethënë të jetë një prezencë institucionale, për arsye se ky ka qenë një lloj vlerësimi i bashkësisë ndërkombëtare se në Kosovë po ndërtohen institucionet. Kjo është arsyeja pse unë personalisht jam i zhgënjyer nga kryeministri i Kosovës Bajram Rexhepi, i cili ka treguar se është kryeministër i vetvetes dhe në njëfarë mënyre nuk ka respektuar dy milionë shqiptarë të Kosovës, shumica e të cilëve, pavarësisht nga dhimbjet, dhe nga të gjitha që kanë ndodhur, kanë dashur që Rexhepi të jetë atje dhe ta thotë atë që është dashur ta thotë. [/color][/b]

RADIO EVROPA E LIRË : Zoti Haxhiu, po çfarë prisni ju nga zhvillimet e tanishme, pas fërkimeve, me të cilat janë përballur institucionet e Kosovës para shkuarjes në Vjenë. Cilat janë zhvillimet brenda përbrenda institucioneve të Kosovës?



BATON HAXHIU : Çështja kryesore te ky takim ka qenë që ne të rregullojmë imazhin, apo të rikthejmë imazhin, i cili ka qenë jo vetëm duke u humbur, por edhe duke u shkatërruar dhe ky imazh tani është dëmtuar edhe më shumë. [b]Nuk e di se si mund të dëmtohet imazhi i Kosovës më shumë se nga mosprezenca e kryeministrit të Kosovës apo shkuarja e delegacionit kosovar të përgjysmuar. [/b]



[color=blue]Ekzistojnë disa grupe në Kosovë që dëshirojnë që përmes tyre ta bëjnë në njëfarë mënyre kontrollimin e pushtetit, apo të jenë në njëfarë mënyre qeveri nën hije, qofshin ato të shoqërisë civile, qofshin të partive politike. Nuk po flas për gabimet strategjike dhe megalomane të një partie politike, por po flas për grupet e NGO-ve (OJQ-ve), të cilat kanë ndikuar shumë për bllokimin dhe frenimin e procesit politik, apo rastin e Vjenës. Nuk guxojmë që kur ekzistojnë institucionet e Kosovës, të ndërtojmë delegacione, të cilat janë jashtë institucionale. [/color]

Ne mund të organizojmë grupe që ndihmojnë institucionet e Kosovës, por jo që atje të jenë grupet që nuk u takojnë institucioneve. [color=blue]Mendoj se zoti Rugova ka treguar diçka që ne e kemi pritur-loajalitetin maksimal ndaj bashkësisë ndërkombëtare, që për mua personalisht është shumë më i rëndësishëm sesa refuzimi i shkuarjes në Vjenë. Këto të dyja nuk kanë ekuivalencë. Nuk guxojmë të luajmë me imazhin tonë, duke refuzuar gjithë ato shtete dhe gjithë atë prezencë të bashkësisë ndërkombëtare dhe duke i dhënë konotacion politik. [/color]

RADIO EVROPA E LIRË : Zoti Haxhiu, ju i përmendët grupet punuese, ndërkohë kryetari Rugova ka thënë në Vjenë se shpreson që qeveria do të përfshihet në punën e këtyre grupeve, e të njëjtën gjë në një mënyrë e ka thënë edhe kryeministri Rexhepi në prononcimin e tij drejtuar mediave të huaja, por jo në fjalimin publik. Sa besoni ju se mund të gjejë hapësira dhe mundësi qeveria e Kosovës që të përfshihet tani në fazën e dytë të këtij procesi?



BATON HAXHIU : E para e punës, [b]unë nuk shoh mundësi morale që zoti Bajram Rexhepi ta udhëheqë dhe mëtutje qeverinë e Kosovës.[/b] Unë mendoj se ai do të jetë i ndërgjegjshëm dhe ndërgjegja duhet të vlerësohet në këtë moment më shumë se gjithçka tjetër. Bajram Rexhepi nuk ka mundësi më që të jetë kryeministër i Kosovës dhe t’i udhëheqë delegacionet apo çështjet teknike.



Nuk dua të hy në detaje se kush ka pasur gabime, a ka pasur presion Bajram Rexhepi apo jo, nga kush ka pasur presion, kush qëndron prapa kësaj, por pa marrë parasysh, [color=red]nuk ka mundësi që një kryeministër siç është Bajram Rexhepi me një deklaratë, të tillë si e ka dhënë, të mbetet kryeministër i Kosovës. [/color]

Unë personalisht mendoj se Bajram Rexhepi ka qenë kryeministër i duhur në momentin e duhur, por në momente të tilla dhe sidomos deklarata famoze para opinionit publik kosovar ka qenë e paduhur, frazeologjike dhe e paqëndrueshme, prandaj unë konsideroj se duhet të rishqyrtohet pozicioni i qeverisë dhe institucioneve të Kosovës.



RADIO EVROPA E LIRË : Zoti Haxhiu, t’u kthehemi edhe një herë vetë bisedimeve. Ju thatë se takimi i Vjenës u mbajt ashtu siç edhe është pritur, si takim simbolik. Mirëpo, sipas jush çfarë do të prodhojë ky takim në kuptimin e rezultateve dhe pasojave të mundshme?



BATON HAXHIU : Pasojat do të jenë për Kosovën, kurse rezultatet e këtij takimi janë vetëm fillimi i një procesi, i cili do të fillojë në vitin 2005 dhe asgjë tjetër. Domethënë, realizimi i fillimit të një standardi, i cili ka qenë i paraparë. Bashkësia ndërkombëtare ka kërkuar “exit-strategjinë”, domethënë strategjinë e daljes nga Kosova dhe e ka filluar me takimin e Vjenës, prandaj unë konsideroj që konsekuencat nuk do të jenë te bashkësia ndërkombëtare, ato nuk do të jenë te pala serbe, por do të jenë në zhvillimin e procesit të Kosovës, sepse gjithkush e di se pavarësia e Kosovës nuk ka alternativë dhe e dinë këtë edhe në Serbi, edhe në Kosovë.



Tre muaj më parë e kemi pasur çështjen e statusit, e kemi biseduar me ju – ka qenë dilema, Serbia duhet të përcaktohet ose për Bashkimin Evropian, ose për palestinizimin e rajonit.



Me siguri se ata do të përcaktohen për Bashkimin Evropian dhe ky përcaktim ne na e hap rrugën që të jemi kooperues me bashkësinë ndërkombëtare dhe na e hap rrugën se si ta ndërtojmë pavarësinë e Kosovës dhe ekuivoket e tilla të prodhimit të tradhtarëve dhe patriotëve, në situata shumë të rënda për Kosovën karshi bashkësisë ndërkombëtare, më bën të jem skeptik nëse jemi të gatshëm që në një periudhë deri në vitin 2008, kur parashihet të rregullohet statusi i Kosovës, të jemi në gjendje ta vëmë atë vijën e aplikimit të nuancave për ndërtimin e pavarësisë.



Intervistoi : Rrahman Paçarizi

Jakup Krasniqi: konferenca e Vjenës nuk është e përgatitur

Arben Xhixho

13 tetor 2003









Fundjavën që kaloi u zhvillua në New York një konferencë për tërheqjen e investimeve në Kosovë. Ky eshte viti i dytë që qeveria e Kosovës i bën thirrje komunitetit shqiptar dhe afaristëve amerikanë të investojnë në Kosovë. Në konferencë ishte i pranishëm edhe Ministri i Çështjeve Publike Jakup Krasniqi, i cili ishte i ftuar në emisionin Ditari. Ai komentoi mes të tjerash edhe për bisedimet Prishtinë-Beograd.



Zëri i Amerikës: Zoti Krasniqi, para se të ndalemi tek konferenca për investimet në Kosovë, le të flasim për bisedimet Prishtinë-Beograd. Duket se përsëri kur është fjala për probleme të rëndësishme, shqiptarët mezi e gjejnë ose nuk e gjejnë dot gjuhën me njeri-tjetrin. A nuk shkon kjo në favor të atij imazhi të krijuar me ose pa të drejtë se shqiptarët para se të kërkojnë pavarësinë, që të gjithë e kërkojnë në Kosovë duhet në radhë të parë të gjejnë gjuhën me njëri-tjetrin?



Jakup Krasniqi: Populli shqiptar në Kosovë ka mbajtur tre zgjedhje të lira. Ka mbajtur zgjedhjet për parlamentin e Kosovës dhe institucionet e tjera qëndrore në Kosovë dhe do të duhej krejt natyrshëm që çështja e bisedimeve mes Prishtinës dhe Beogradit të vendosej në parlament dhe parlamenti të merrte vendimin politik për shkruarjen në bisedimet e Vjenë. Ne konsiderojmë se konferenca e Vjenës nuk është e përgatitur. Delegacioni kosovar atje është pa përgjegjësi dhe kompetenca të përcaktuara. Bisedimet do të duhet të zhvilloheshin mes Prishtinës dhe Beogradit, por vetëm pasi të bëhej një marrëveshje paqeje mes Prishtinës dhe Beogradit dhe pas kësaj, mbasi mes dy vendeve ka pas një luftë, atëherë të filloheshin përgatitjet e këtyre bisedimeve. Por paraprakisht qeverisë së Kosovës dhe institucioneve të tjera të Kosovës administrata ndërkombëtare do të duhej t’ju bartëte kompetencat e përgjegjësisë që delegacioni i Kosovës në Vjenë të shkonte me kompetenca të plota dhe të kishte mundësi sovrane për të vendosur për të gjitha format e bisedimeve me palën serbe.



Zëri i Amerikës: Gjithë këto kushte që ju përmendët, a nuk do ta bënte të pamundur fillimin e bisedimeve pasi plotësimi i këtyre kushteve është paksa një proces i gjatë?



Jakup Krasniqi: Plotësimi i këtyre kushteve dhe marrja e një vendimi në parlament do të ishte vërtet krejt e arësyeshme. Po të vendosej kjo çështje në parlament atëherë delegacioni i Kosovës do të ishte i plotëfuqishëm, do të kishte bazën e vet ligjore por edhe do të ishte i përgatitur politikisht dhe do ta merrte përgjegjësinë nga organi ligjvënës, nga parlamenti i cili ka marrë votat e qytetarëve të Kosovës dhe me vendosjen e çështjes në parlament delegacioni i Kosovës do të kishte përgjegjësi dhe mundësi të tjera për të biseduar për Kosovën. Kështu siç janë përgatitur këto bisedime, që në fakt faktori kosovar ka qënë krejt i lënë pas dore dhe pa kompetenca dhe përgjegjësi për të vendosur mbi fatin e vet, nuk di cili do të ishte pozicioni i delegacionit por edhe nuk di se si do të zhvillohen proceset në këtë formë të papërgjegjëshme.



Zëri i Amerikës: A jeni i shqetësuar se qeveria e Kosovës me mospjesmarrje në këto bisedime po rrezikon që të prishet uniteti brenda saj dhe të bjerë fare qeveria?



Jakup Krasniqi: Ne mendojmë se qeveria ka kërkuar vërtet krijimin e një uniteti mes faktorit politik shqiptar dhe mendoj që ai unitet ka qënë i arritur në kuvendin e Kosovës. Në këtë kuvend të gjitha subjektet politike u kanë thënë ”po” bisedimeve por pasi do të plotësoheshin disa kushte. Mirëpo çështjen e parlamentit, është një e vërtetë e madhe se e ka penguar kryetari i tij zoti Daci i cili nuk ka lejuar zhvillimin e një debati të gjerë dhe të gjithanshëm në parlament. Në një mënyrë paksa të çuditshme ai hodhi në votim nëse do të vazhdonte apo do të ndërprehej debati. Deputetët për çudi në vend që të kërkonin të debatohej kjo çështje me të vërtetë shumë serioze për Kosovën, për proceset që po i kalon Kosova, për të ardhmen e Kosovës, ata votuan për ndërprerjen e debatit dhe kështu pengohet parlamenti për ta marrë vendimin politik, për ta autorizuar qeverinë për formimin e një platforme politike dhe për formimin e një delegacioni të bisedimeve në konferencën e Vjenës.



Zëri i Amerikës: Zoti Krasniqi, ka zëra që thonë se brenda partisë suaj kanë filluar fraksionet, ka një lloj përçarjeje dhe se nje pjesë është e interesuar për largimin e zotit Rexhepi? A ka ndonjë të vërtetë në to?



Jakup Krasniqi: Jo. Unë mendoj që subjekti politik shqiptar sidomos Partia Demokratike gjatë këtij muaji të fundit i është qasur në mënyrë shumë serioze këtij problemi. Zoti Rexhepi është anëtar i kryesisë së Partisë Demokratike, është anëtar i këshillit drejtues të kësaj partie dhe ai i ka përcjellë zhvillimet dhe diskutimet që janë bërë në këshillin drejtues të Partisë Demokratike, din vendimet e këtij organi vendimmarrës të partisë dhe natyrisht ai ka mbajtur qëndrimin edhe të partisë por njëkohësisht edhe të qeverisë, sepse edhe në qeveri është biseduar për këto probleme dhe në qeveri është marrë vendimi që nëse parlamenti i Kosovës merr vendimin politik, e autorizon qeverinë për bisedime atëherë ajo do të përgatitej për konferencën e Vjenës.



Zëri i Amerikës: Megjithatë, zoti Thaçi tha mbrëmë se refuzimi i zotit Rexhepi është qëndrimi i tij personal?



Jakup Krasniqi: Jo, unë mendoj se qëndrimi i zotit Rexhepi nuk ka qënë qëndrim personal por ka qënë edhe vendim i qeverisë por edhe vendim që del nga qëndrimet e këshillit drejtues të Partisë Demokratike të Kosovës.



Zëri i Amerikës: A gëzon zoti Rexhepi mbështetjen e plotë të partisë suaj?



Jakup Krasniqi: Natyrisht, edhe në këto momente zoti Rexhepi vazhdon ta ketë besimin e Partisë Demokratike të Kosovës.



Zëri i Amerikës: Zoti Krasniqi, të ndalemi tani tek problemi i konferencës për të cilën ju erdhët këtu në New York. Sa e efektshme mund të jetë një konferencë e tillë për të tërhequr investitorë për investime qoftë nga afaristë shqiptarë, qoftë nga afaristë amerikanë në një kohë që klima politike në Kosovë të paktën në prag të bisedimeve mes Prishtinës dhe Beogradit duket se është më tashmë e paqëndrueshme?



Jakup Krasniqi: Për këtë konferencë është bërë një përgatitje para shumë kohësh. Është në interesin e Kosovës që të tërhiqen investitorë nga të gjitha vendet që janë të interesuara që të investojnë në Kosovë dhe të kenë fitimet e tyre në Kosovë. Për këtë arsye ne dimë që në Shtetet e Bashkuara ka shumë bashkëatdhetar që kanë një fuqi ekonomike, që kanë mundësi që kapitalin e tyre ta investojnë në Kosovë dhe të fitojnë në Kosovë. Prandaj qeveria e Kosovës në këtë rast ka parë të arsyeshme të organizojë një konferencë ku ti thërrasë të gjithë afaristët shqiptarë por edhe jo shqiptarë të SHBA, ku të tregojë kushtet dhe mundësitë që janë krijuar, si ato ligjore edhe nga pushteti qëndror edhe nga ai lokal dhe ne mendojmë që ka hapësirë dhe ka mundësi për të investuar në Kosovë dhe ka hapësirë për të nxjerrë fitime.



Zëri i Amerikës: Zoti Krasniqi, çfarë po bëhet me procesin e privatizimit. Administrata ndërkombëtare e anulojë për sqarimin e disa çështjeve ligjore. A mund të jepni një status të fundit të këtij procesi?



Jakup Krasniqi: Përfaqësuesi special i sekretarit të përgjithshëm ka ndërprerë përkohësisht çështjen e privatizimit por ajo duhet të verifikohet nga bordi mbikqyrës i AKMsë dhe ajo nuk është bërë, prandaj është një ndërprerje e përkohëshme. Ne e konsiderojmë se ndërprerja në këtë formë e privatizimit pengon realizimin e standartit të parë, zhvillimit ekonomik dhe në të vërtetë kjo duhet të shikohet mirë si nga administrata ndërkombëtare si nga ajo vendore se kjo pengon zhvillimin ekonomik të Kosovës, pengon realizimin e një standarti, i cili është ndoshta një nga standartet kyçe për zhvillimin e të gjitha proceseve në vijim në Kosovë dhe ne shpresojmë që kjo pengesë do të hiqet.

D. Serwer: Bisedimet duhet të ishin përgatitur më mirë

Ilir Ikonomi

17 tetor 2003





Komuniteti ndërkombëtar i përshëndeti si një fillim i mirë bisedimet Prishtinë-Beograd për çështjet teknike që nisën këtë javë në Vjenë. Por a ishte dialogu i përgatitur si duhet nga komuniteti ndërkombëtar? Për këtë dhe çështje të tjera, kolegu ynë Ilir Ikonomi intervistoi analistin e Institutit amerikan të Paqes, Daniel Serwer.

Zëri i Amerikës Hapja e bisedimeve nxori në pah se sa e vështirë është t’i ulësh shqiptarët she serbët në një tryezë, qoftë edhe për çështje praktike. A mendoni se fillimi i dialogut ishte përgatitur si duhet dhe sa duhet nga komuniteti ndërkombëtar?



D. Serwer E rëndësishme është se ky ishte një fillim. Mendoj se gjërat mund të ishin përgatitur diçka më mirë, sepse gjithnjë mund të përgatitesh më mirë nëse ke më shumë kohë. Por fakt është se ky ishte një fillim dhe ajo që ka rëndësi tani është të vazhdohet me përgatitje seriozepër çështjet teknike. Megjithatë, në Prishtinë ende ka një problem politik që duhet zgjidhur. Problemi është se parlamenti nuk e mbështeti plotësisht delegacionin që shkoi në këto bisedime dhe kjo duhet zgjidhur. Parlamenti e bëri të qartë se nuk donte të miratonte një rezolutë që ta mbështeste delegacionin dhe ndërkombëtarët në prapaskenë u përpoqën ta evitonin këtë rezolutë që bënte thirrje për pavarësinë e Kosovës. Kjo ishte një situatë shumë e vështirë politikisht, sidomos për kryeministrin, i cili u kritikua se nuk mori pjesë në bisedime por mendoj se nëse ai do të kishte shkuar, kritikat do të kishin qenë më të ashpra dhe më të rrezikshme për të politikisht.



Zëri i AmerikësBeogradi kërkon që Kosova të mbetet pjesë e Serbisë megjithëse ata e dinë dhe privatisht e pranojnë se kjo nuk do të ndodhë kurrë. A mendoni se kjo është një pozë politike e Beogradit dhe sa po ndikon ajo në pengimin e dialogut.



D. Serwer Natyrisht që kjo e bën dialogun të vështirë. Mendoj se ajo që pranon Beogradi është se ai nuk mund ta qeverisë më Kosovën në të ardhmen dhe se Kosova të paktën do të vetqeveriset, në një mënyrë apo në tjetrën. Ky është një hap i rëndësishëm por mendoj se tani për tani është shumë e vështirë të pranohet publikisht ose me ndonjë marrëveshje. Prandaj tani nuk mund të zhvillohen dot bisedime për statusin përfundimtar pa patur fillimisht bisedime për çështje praktike të cilat do të krijonin besimin midis palëve si dhe do të mundësonin bisedimet mbi statusin përfundimtar pas pak vitesh, shpresoj aty nga viti 2005.



Zëri i Amerikës Kryeministri Bajram Rexhepi nuk mori pjesë në hapjen e bisedimeve dhe natyrisht që ai përfaqëson një pjesë të rëndësishme të shqiptarëve të Kosovës. Por a mundet që komuniteti ndërkombëtar të shpresojë që shqiptarët do të marrin pjesë plotësisht në dialog pa patur sigurime nga komuniteti ndërkombëtar për të ardhmen e tyre?



D. SerwerMendoj se ata duhet të bien dakord të bisedojnë edhe pa marrë sigurime për të ardhmen pasi është e qartë, mendoj unë, se shqiptarët nuk do të qeverisen më nga Beogradi dhe kjo duhet të jetë e mjaftueshme për momentin. Nuk mund të ketë status përfundimtar para se të zgjidhen disa çështje praktike midis Beogradit dhe Prishtinës.



Zëri i Amerikës Shumë njerëz shtrojnë pyetjen se a do a të çojnë këto bisedime në negociatat për statusin përfundimtar. Çfarë duhet të bëjë komuniteti ndërkombëtar që të arrihet kjo?



D. SerwerKjo do të varet nga ajo që do të bëjnë shqiptarët dhe serbët. Ka rëndësi që të dyja palët të bëjnë shumë përgatitje për statusin përfundimtar. Për shembull, nuk mund të kesh bisedime për statusin midis Prishtinës dhe Beogradit nëse refugjatët serbë nuk trajtohen mirë pasi të jenë kthyer. Po ashtu, nuk mund të kesh bisedime të tilla nëse Beogradi nuk e ndërpret mbështetjen për institucionet paralele në Kosovë. Ka disa gjëra që duhen zgjidhur para bisedimeve për statusin. Megjithatë, unë besoj se bisedimet e Vjenës janë fillimi i procesit. Ato formalisht nuk janë parashikuar si bisedime për statusin përfundimtar por në fund të fundit nëse ato do të kenë sukses, hapi tjetër do të jenë bisedimet për statusin. Shpresoj që kjo të ndodhë sa më shpejt, por shumë gjëra do të varen nga dy palët.

Liderët e shteteve të BE-së thanë:
 

Liderët e shteteve të BE-së kanë shprehur mbështetje për dialogun Prishtinë - Beograd

-Presidentët dhe kryeministrat e vendeve të Bashkimit Evropian në samitin e tyre kanë shprehur mbështetje për lansimin e dialogut në Vjenë, duke e quajtur atë se një hap të rëndësishëm. Në konkluzionet e samitit thuhet se dialogu i nisur në Vjenë më 14 tetor ndërmjet Prishtinës dhe Beogradit shënon hapin kyç në politikën standardet para statusit në suazat e Rezolutës 1244 të KS të OKB-së. Liderët e shteteve të BE-së kanë mirëpritur fillimin e dialogut ndërmjet Prishtinës dhe Beogradit, por kanë kritikuar mungesën në takim të disa prej figurave politike në Kosovë që preferuan të qëndronin larg takimit të Vjenës.

BE ka caktuar nëntorin si afat për krijimin e grupeve teknike, që do të shqyrtojnë problemet praktike ndërmjet Prishtinës dhe Beogradit.

Liderët e BE-së në këtë takim edhe njëherë i kanë shprehur mbështetje punës së të dërguarit të posaçëm të sekretarit të përgjithshëm të OKB-së z. Hari Holkeri.

Po ashtu edhe NATO-ja ka dërguar një porosi të qartë. Sekretari i përgjithshëm lordi Xhorxh Robertson ka thënë se nisja e dialogut megjithëse duhet pranuar se ishte e vështirë është një shenjë e mirë dhe atë duhet pasuar me punë konkrete. Lordi Robertson tha se më e rëndësishme se sa vetë fillimi është vazhdimi i procesit e mbase kjo do të jetë në të mirë të të gjithë njerëzve që jetojnë në Kosovë

H. Holkeri thotë :
 

H. Holkeri thotë se statusi i Kosovës mund të trajtohet vetëm pasi të jenë bërë përparime në çështjet praktike

-Në një konferencë për gazetarë në Helsinki, kryeadministratori i Kosovës Hari Holkeri tha se bisedimet e nivelit të lartë ndërmjet udhëheqësve të shqiptarëve të Kosovës dhe atyre serbë mund të mbahen në vitin e ardhshëm, por çështja e statusit të Kosovës mund të trajtohet vetëm pasi të jenë bërë përparime nmë trajtimin e çështjeve praktike.

I pyetur nga gazetarët për kohën e saktë të mbajtjes së këtyre takimeve, Holkeri u shpreh se takimet e tilla të nivelit të lartë nuk janë planifikuar ende.

Hari Holkeri u bashkua me vlerësimin pozitiv të Bashkimit Evropian për takimin e Vjenës. Ai pranoi megjithatë se ka pasur probleme si për shembull mungesa e kryeministrit të Kosovës Bajram Rexhepi.