Fejohet Mirsa...Fejesa jonë do të bëhet sipas traditave tona Shqiptare
 

Publikuar: 10.08.2011 - 21:58

Gjilan, 10 gusht - Me t’u kthyer nga pushimi, Mirsa menjëherë ka nisur përgatitjet rreth fejesës. Ajo ka vendosur që më 20 gusht ta mbajë ceremoninë e fejesës me Granitin. Sipas saj, kjo ceremoni do të bëhet në praninë e shumë miqve dhe dashamirëve të saj në hotelin “Luxos” në Gjilan. Procedura e fejesës thotë se do të bëhet sipas traditave.

“Fejesa jonë do të bëhet edhe dy javë, do të kemi mysafir të shumtë rreth 300 veta, ku në mesin e tyre do të ketë edhe shumë kolegë të mi. Fejesa do të bëhet sipas traditave tona shqiptare, ku Graniti do t’i dërgojë shkuesit te familja ime. Tani sapo u ktheva nga pushimi në Ulqin, dhe menjëherë kam nisur përgatitjen e pajës dhe dhuratave që do t’i dërgoj familjes së Granitit.

Jam e gëzuar dhe me plot emocione”, ka thënë ajo, transmeton “Zëri”. Krahas përgatitjeve për fejesë, Mirsa nuk do të pushojë dhe ajo ka menduar që në muajin shtator të sjellë në treg edhe një videoklip të ri. “Unë sapo kam lansuar këngën dhe videoklipin e fundit “Këtë natë”, të përgatitur nga Hekuran Krasniqi dhe me tekst të Linda Halimit. Kjo këngë po vazhdon të pëlqehet mjaft shumë në publik.

Menjëherë pas fejesës sime do të merrem me përgatitjen edhe të një kënge të re, të cilën do ta plasoj në treg në muajin shtator. Kënga do ta ketë edhe videoklipin që do ta punoj me “Grafi ka” nga Gjilani”, shton ajo. Mirsa shpreson që edhe kjo këngë të pëlqehet në publik.