[legenda]

EKSKLUZIVE nga Behxhet SHALA -në fund te javës - Iku Bushi u gëzua Babushi, Pavarësia hipotetike nën thjerrezen optike, Artemia dhe AliaJun 15, '07 4:25 AM


Në fund të javës: Iku Bushi u gëzua Babushi, Pavarësia hipotetike nën thjerrezen optike, Artemia dhe Alia, etj.

KU DALLON MISIONI I SHAHËS SË BRAHIMIT DHE I ARDIAN GJINIT ?

Iku Bushi u gëzua Babushi :
Festa mbarëkombëtare përfundoi, në Shqipëri ishte Bushi në Kosovë u gëzua Babushi i cili, si kalorës apokaliptik ishte para eliminimit politik dhe patriotik Infuzioni i Bushit i ndihmoi Babushit!Shqipëria, Kosova dhe krejt shqiptaria përjetuan ekstazë politike dhe hipnozë hipotetike duke besuar se Bushi sjell mirëqenie dhe siguri, gëzim dhe pasuri pa u lodhur fare, nën hijen e ullirit dhe erën e blirit. Harruan nje detaj të vogël se tjeter është përkrahja morale nga ajo materialo- substanciale dhe se krenaria dhe dinjiteti janë tipare identifikuese të një mileti që respektohen në botën demokratike për dallim nga serviliteti dhe llaskucëria që përkrahen në demokracinë hipotetike! Edhe bariu që ruan delet në maje të malit e din se as Bushi e as demokracia nuk kanë nevojë për mizat e kalit madje këto i pengojnë edhe vet kalit Të gjithë e dinë se politikanët shqiptarë dhe kosovarë ( sipas Nexhit ), janë krenarë se janë shqiptarë, me parime të palëkundura dhe çdo sfide i bëjnë ballë, nuk janë servilë por janë fleksibil, nuk pranojnë të dorëzohen e as të lodrohen nga askush sepse janë të parët e vendit dhe të zotët e kuvendit! Disi pak u hutuan kur më në fund kuptuan se miratimi i Rezolutës për pavarësi të tredhur të Kosovës nuk është si puna e orës dhe përkundër dëshirës të ndjehen si baballarë të pavarësisë, fjala e fundit është megjithatë e Serbo- Rusisë. Gëzimi ishte i madh se vizita vajti mbarë dhe atë ditë ishte krenari të jeshë shqiptarë! U gëzuan përkrahësit e pavarësisë, partizanët e lirisë, u hidhërua Serbia, Rusia, gjakftohtë u soll Tanzania, nuk u dëgjua fare as Mongolia, disa u sollën si cuba, ashpër reaguan Fidel Kastro dhe Kuba në mbrojtje të integritetit territorial të Serbisë dhe Shoqatës së Pëllumbagjive të Osetisë ! Merreni me mend, Fidel Kastro, në vend që t’i falet profesorëve të mjekësisë u bë burizan i shovinistëve të Serbisë duke u rreshtuar kundër lirisë! Foli si revolucionar i vërtetë e sa për ideale, në infuzion ishin tretë. Po, i falet sepse sapo është zgjuar nga kllapia dhe nuk e ka të qartë ku është Kosova dhe ku është Serbia! Pra, fajet nuk i ka Fideli por gjeografia! Është me rëndësi se Xhorxh Bushi i ra çiftelisë në zemër të Shqipërisë duke kënduar këngën e pavarësisë për Republikën Demokratike Popullore të Ahtisarisëdhe vetëm pritet akordimi i një teli nga ana e Rusisë! Tash kemi rënë në kokërr të shpinës dhe po dëgjojmë cfarë po i thotë Xhorxh Bushi Tinës. Grupi i Unitetit është pak jashtë lojës, kompetencat iu dhanë Doktorit të Tropojës! Një gjë e di shumë mirë; nëse i humb zëri Xhorxh Bushit do t’i kahet nëna edhe Babushit! Të gjithë po gëzohen, janë shend e verë, unë po rri anash, disi si i mjerë. Nuk po i besoj shumë as edhe Big Bosit, në vend të tamblit po i fryjë kosit!

Pavarësia hipotetike, nën thjerrëzën optike :
Të gjithë po e shohin pavarësinë, unë po përballem me shkurtpamësinë, faktike dhe politike! Me duket se më është ngatërruar dioptria dhe shumë larg është pavarësia. Dikush flet për javë, dikush për ditë, dikush për orë ndërkaq unë këto i marr si sllogane të shkruara në borë! Temperaturat e larta borën e shkrijnë dhe….me te edhe pavarësinë! Duhet ta presim borën tjetër në mënyrë që ta rikthejmë pavarësinë e vjetër. Nëse dikush në dimër prêt të lulëzojë behari, pavarësinë ia sjell Ashik Ahtisari, sikur në Acekun e Indonezisë që ua shiti autonominë në vend të pavarësisë! Ngrohja globale edhe në Kosovë po bënë dëme klimatike dhe politike, në vend të borës po bjen më shumë shi dhe kam frkë të madhe se mos po rrëshqasim në autonomi, të maskuar si pavarësi! Pavarësia e tredhur me sovranitet të Etiopisë nuk do të duhej t’u pengojë as Srbisë e as Rusisë. A do të shpëtojë Kosova me një anemi kronike apo do të bëhet substancë metastazike? A do ta veshë lëkurën e xhirafës, sikur në pikturat e Xhevdet Xhafës? A do të shartohet si dardha e egër apo do ta ketë ndonjë fat tjetër? Nuk janë këto dilema hipotetike por mundësi reale që lehtë shihen nën thjerrëzën optike. E kam fjalën për ata si unë, që nuk shohin mirë, ndërkaq vizionarët nga Grupi i Unitetit moti Kosovën e kanë bërë të pavarur, sovrane dhe të lirë dhe,....
Diçka për titullin sepse e di që jeni kureshtarë, në fund të fundit nuk jemi në pazar, nuk ju ofroj mall për t’ju mashtruar por substancë të vërtetë për t’ju informuar dhe argëtuar. Nuk jam i paguar nga Shtypi i Sikletit as i akredituar nga Ekipi i Unitetit. Jam i mallkuar nga Zeusi i Arbërisë dhe i
dekoruar nga Koshtunica i Serbisë! Po t’i lëmë tani këto vetëlavdërime dhe arsyetime, duhet ta zëmë fillin, me kend tjetër pos me Shahën e Brahimit të cilën e çmoj dhe shumë e adhuroj, ndërkaq Ardian Gjinin, me gjasë, kësaj radhe do ta injoroj. Shaha e Brahimit është mbesa e Qazimit dhe gjyshja e Shahinit. Nuk ka mbaruar ndonjë shkollë por nga mendja është shumë e hollë! Për bukuri aspak nuk dallon nga një pehri por, në rini nëse mund ta quaja ashtu, e ka pësuar një fatkeqësi e që pastaj i ka mbetur si vrragë në biografi! Thuhet se pas sanës së Miftarit ka marrë në thua derisa të tjerët shpifin se vullnetarisht u rrëzua. U bë një lëmsh si në Etiopi dhe… Miftari luajti jofer dhe e dërgoi në shtëpi! Aty, për herë të parë mësoi si humbet pavarësia dhe cenohet integriteti i territorit dhe bëhesh viktimë e tutorit. Pavarësia e Shahës ishte e mbikëqyrur nga të tjerët ndërkaq për sovranitet Shaha nuk mund ta thotë asnjë fjalë sepse kompetent për këtë janë ata me të cilët ka dalë dhe ia kanë bërë shpirtin valë! Ishte një situateë shumë dramatike, Shaha e Brahimit përpiqej ta fitojë pavarësinë dhe sovranitetin ndërkaq tutorët nuk nguteshin shumë sepse e bënin lezetin! Vite me radhë Shaha bënte sakrificë, mos e merrni si spicë, luftonte për statusin e saj, me shumë optimizëm, ndërsa tutorët, kur Shaha u plak fare dhe nuk vlente për pesë pare, thjesht me një Rezolutë të Këshillit të Sigurimit e lanë Shahën në pritje të Statusit dhe në mëshirën e Zhivadinit, pasardhësit të Boris Jelcinit! Lexues të nderuar, pas kësaj tragjedie shekspiriane të Shahës së Brahimit, nuk ia vlen t’i dëgjojmë përrallat e Ardian Gjinit! Tung dhe vazhdon edhe nesër pa pasur ndonjë ide ç’të shkruaj, por nuk do të dorëzohem dhe do të vazhdoj të luaj. Me gjasë më duhet të merrem me konkursin për simbole të shtetit dhe reagimet e miletit, dhe nëse nuk ma bëjnë ndonjë dredhi, nuk do të kem konkurrencë sepse jam plot potencë ( krijuese ) në esencë dhe delikuencë! Drejtësia ndërkombëtare, që nuk vlen as dy pare me rastin e Albin Haxhisë si edhe muri i Artemie Alisë janë pikanteri të radhës që mund të përdoren për thashetheme të zonjave të mëhallës!

15.06.07 Prishtinë Behxhet Sh.SHALA, dashamir i Bushit dhe
kundërshtar i Naim Çaushit


http://vudi.multiply.com/tag/vedat%20xhymshiti