[rilinda]

Kanceri i prostatit është mes kancereve më të zakonshëm tek burrat në vendet e zhvilluara. Rreth 400 mijë raste të tilla shfaqen çdo vit në Shtetet e Bashkuara dhe në Evropë dhe afro 90 mijë burra pritet të vdesin nga kjo sëmundje. Parashikohet që ndërsa burrat në vendet e zhvilluara jetojnë më gjatë, edhe numri i prekjes apo vdekjeve nga kanceri i prostatës të rritet, nëse këtu nuk merren parasysh përparimet shkencore.
Në fakt, shkencëtarët vazhdimisht përpiqen për trajtime të reja më të sukseshme.
Për shembull, mjekët u bëjnë thirrje burrave mbi moshën 50 vjeç që çdo vit të kryejnë analiza të gjakut për antigjenin e veçantë të prostatit. Kjo analizë quhet ndryshe PSA. Niveli i lartë ose rritja e nivelit të këtij antigjeni është shenjë paralajmëruese për kancer në prostat. Por kjo analizë nuk është gjithmonë e saktë, prandaj shumë burra kryejnë një analizë tjetër më të dhimbeshme siç është biopsia e prostatit. Profesor Robert Gecenberg pranë Universitetit Xhons Hopkins thotë se me këtë analizë ekziston një problem. Tani për tani, thotë ai, na duhet të kryejmë biopsinë tek 6 burra për të gjetur një që ka kancer në prostat. Objektivi është përqëndrimi ose kufizimi i kryerjes së biopsisë tek persona që me të vërtetë kanë kancer në prostat.
Përveç disa pasaktësive, analiza e antigjenit të prostatit shpesh nuk e dallon kancerin. Një analizë e tillë zakonisht mat sasinë e një kimikati që prodhohet në prostat. Analiza e re mat vetëm kimikatet e prodhuara nga qelizat kanceroze në prostat. Profesor Gecenderg dhe kolegët e tij zbuluan se analiza e re është e saktë në 94 % të rasteve. Prova të mëtejshme klinike me këtë analizë janë planifikuar, dhe një gjë e tillë do të bënte të mundur që pas afro 1 viti e gjysmë, analiza e re për zbulimin e kancerit të prostatit të jetë gati për publikun e gjerë. Doktor Gecenberg thotë se analiza e re, është në gjendje të tregojë edhe nëse kanceri është kufizuar vetëm në prostat apo është përhapur në organe të tjera.