[Lona]

Nga rrëzimi i një helikopteri, vdesin 2 pjesëtarë të personelit ushtarak britanik

Londër, 21 nëntor – Dy pjesëtarë të personelit ushtarak britanik kanë vdekur kur helikopteri i tyre Puma është rrëzuar sot (e mërkurë) afër Bagdadit, ka bërë të ditur Ministria e Mbrojtjes, njofton Rojter. Ndërkaq, dy pjesëtarë të tjerë të këtij personeli janë plagosur dhe po mjekohen në spital. Ende është herët të spekulohet për shkakun e përplasjes së helikopterit. Familjet e viktimave tashmë janë informuar, thuhet në kumtesën ushtarake.

Nderohen me Medaljen e Lirisë një gazetar rus dhe një pakistanez

Nju Jork, 21 nëntor – Gazetari rus, Dimitri Muratov dhe ai pakistanez, Mazhar Abas, u nderuan me Medaljen e Lirisë së Shtypit nga Komiteti për Mbrojtjen e Gazetarëve. Muratov është themeluesi i "Novaja Gazeta", gazetë e cila ka humbur tre gazetarë në betejën për lirinë e shtypit, në mes të të cilëve është dhe Ana Politkovskaja.

Çmimi i naftës në tregun aziatik shkon në 99 dollarë për fuçi

Singapor, 21 nëntor – Çmimi i naftës në tregun aziatik ka shkuar në 99 dollarë për fuçi. Janarin e shkuar çmimi i naftës së papërpunuar shkoi në 99.20 dollarë për fuçi, për të rënë më pas në nivelin e 98 dollarëve. Nëse çmimi i naftës arrin në 100 dollarë për fuçi, atëherë sipas analistëve thyhet një rekord psikologjik në tregun botëror.

Harçenko akuzon SHBA-të se jetojnë në një "pseudorealitet" kur thonë se Kosova është de fakto e pavarur

Moskë, 21 nëntor - I dërguari rus në Treshen ndërmjetësuese për statusin e Kosovës, ka akuzuar Shtetet e Bashkuara se jetojnë në një "pseudorealitet" duke menduar se Kosova është de fakto e pavarur. "Amerikanët besojnë se shkëputja e Kosovës nga Serbia tashmë ka ndodhur. Ne e shohim situatën nga këndvështrimi i ligjit ndërkombëtar dhe jo nga pseudorealiteti", tha Aleksandër Bocan Harçenko për mediat ruse. "E thënë butë kjo nuk e ndihmon dialogun serbo shqiptar", tha përfaqësuesi rus në bisedimet për statusin. Harçenko përsëriti se pavarësia e Kosovës do krijonte paqëndrueshmëri në Ballkan dhe do shërbente si precendet për rajone të tjera të ngjashme.

SHPK arreston edhe dy gardianë të burgut të Dubravës

Prishtinë, 21 nëntor - Shërbimi Policor i Kosovës (SHPK) ka arrestuar sot edhe dy pjesëtarë të personelit korrektues - gardianë, në burgun e Dubravës, të cilët janë të dyshuar si fajtorë për arratisjen e shtatë personave nga ky burg. Zëdhënësi i SHPK së, Veton Elshani, në konferencën e rregullt për media tha se gjatë zhvillimit të hetimeve në lidhje me arratisjen e shtatë të burgosurve nga burgu u Dubravës, sot në orën 10.45 janë arrestuar edhe dy të dyshuar të tjerë të cilët janë personel korrektues në burgun e Dubravës. Ai tha se deri më tash në lidhje me rastin e arratisjes nga burgu i Dubravës të shtatë të burgosurve janë arrestuar shtatë zyrtarë të burgut që janë personel korrektues, tre persona të tjerë të cilët kanë marrë pjesë në sulmin nga jashtë që ka rezultuar në arratisjen e tyre, shtatë persona të tjerë që u kanë ndihmuar të burgosurve pas arratisjes si dhe dy të arratisurit, Faton Hajrizi dhe Burim Basha. Ai njoftoi se deri më tash, së bashku me dy të arratisurit, numri të arrestuarve arrin në 19 persona.

Sot në Podgoricë fillon gjykimi ndaj 18 shqiptarëve, të akuzuar për "terrorizëm"

Podgoricë, 21 nëntor - Sot në Podgoricë fillon gjykimi ndaj 18 shqiptarëve, shtetas të Malit të Zi dhe të tjerët shtetas amerikan, ose me banim në Shtetet e Bashkuara. Ata janë akuzuar për "krim të organizuar dhe terrorizëm", por këmbëngulin se janë të pafajshëm dhe janë viktima të diskriminimit etnik. Familjarët e të burgosurve me shtetësi amerikane, ose banim në Shtetet e Bashkuara u mblodhën në Uashington me kërkesën që bashkërsia ndërkombëtare të ndërhyjë për të ndihmuar në zgjidhjen e kësaj çështjeje.