[fadil]

Kryeministri i Kosovës, Hashim Thaçi, ka pranuar telegrame dhe mesazhe të shumta urimi për zgjedhjen e tij në krye të Qeverisë së Kosovës.\10.01.08\

Kryeministri i Kosovës, z.Hashim Thaçi, gjatë ditës së djeshme dhe të sotme ka pranuar telegrame dhe mesazhe të shumta urimi, me rastin e zgjedhjes së tij në postin e kryeministrit të Kosovës. Në një bisedë telefonike, nënsekretari amerikan i Shtetit, z. Nicholas Burns, ka përgëzuar z. Thaçi duke i konfirmuar mbështetjen e Shteteve të Bashkuara të Amerikës. Edhe Përfaqësuesi i Lartë për Politikë të Jashtme dhe Siguri i Bashkimit Evropian, z.Javier Solana dhe Komisionari për Zgjerim i Bashkimit Evropian, Oli Rehn, kanë përgëzuar kryeministrin Thaçi për zgjedhjen e tij në postin e Kryeministrit.
Po sot, kryeministri Thaçi ka marrë një mesazh urimi nga kryeministri i Turqisë, z.Rexhep Tajip Erdoan përmes shefit të Zyrës të Turqisë në Prishtinë, z.Mustafa Sarniç, në të cilin thuhet: "Turqia i kushton rëndësi zhvillimit të marrëdhënieve bilaterale, marrëdhënie këto të cilat bazohen në një të kaluar historike dhe të cilat janë vëllazërore. Besoj nga zemra se marrëdhëniet që po zhvillohen ndërmjet Turqisë dhe Kosovës, në çdo fushë, nën lidershipin tuaj, do të vazhdojnë të zhvillohen edhe më tutje. Turqia do të vazhdojë t'u qëndrojë pranë kosovarëve, ashtu siç ka qëndruar edhe në ditët më të vështira. Me këtë rast do të përsëris dëshirat e përzemërta për shëndetin dhe lumturinë tuaj personale, shëndetin dhe mirëqenien e popullit të Kosovës".
Po kështu dje kryeministri Thaçi ka marrë mesazhe urimi nga kryeministri i Shqipërisë, z.Sali Berisha dhe kryetari i Partisë Socialiste të Shqipërisë, z.Edi Rama, duke i shprehur mbështetjen e plotë dhe të parezervë të Shqipërisë. Gjithashtu kryeministri Thaçi ka marrë një mesazh urimi edhe nga oborri mbretëror i Shqipërisë.\10.01.08\