[rilinda]

Në Prizren çdo gjë gjati për kremtimin e pavarësisë

Pesëmbëdhjetë mijë euro është shuma e mjeteve, të cilat do të shpenzohen në ditën e shpalljes së pavarësisë për manifestimin qendror që do të mbahet në Prizren. Këtë e konfirmoi drejtori për Ekonomi e Financa në Kuvendin Komunal të Prizrenit, Ilir Shehu.

Ai shtoi se këto mjete janë të ndara kryekëput nga buxheti i komunës, ndërkohë potencoi edhe faktin që për mbarëvajtjen sa më të mirë të kësaj feste madhore, një kontribut të veçantë do e japin edhe donatorët e ndryshëm, të cilët kanë shprehur vullnetin e tyre për ndihmë. Zyrtarët komunalë konfirmuan se janë bërë të gjitha përgatitjet qoftë, nga lëmi i politikës, kulturës, por edhe sigurisë, për të cilat përgatitje janë formuar edhe tri nënkomisionet komunale. Gjithashtu u bë e ditur se në ditën e shpalljes së pavarësisë komuna e Prizrenit do të mbajë edhe një akademi solemne në sheshin e Lidhjes Shqiptare. Ndërkohë edhe zyrtarë të policisë konfirmuan sot, se në planin e tyre të sigurisë në ditën e shpalljes së pavarësisë, qyteti i Prizrenit do të jetë nënë kontroll të rreptë të policisë, me qëllim të ruajtjes së rendit dhe sigurisë në këtë qytet. Haris Dida komandant i stacionit policor "Alfa" tha se Prizreni nga të katër anët do të jetë i bllokuar nga patrulla të policisë, KFOR-it, policisë ndërkombëtare, por edhe nën mbikëqyrje të TMK-së, me ç’rast hyrje daljet për automjete civile nuk do të lejohen në përjashtim të ndonjë rasti serioz. Dida pohoi ndërkaq se policia do të punojë me tri ndërrime, 24 orë me qëllim të parandalimit të çdo eskalimi të situatës. Ai tha se edhe emergjenca do të jetë në dispozicion dhe do të intervenojë në rastet ku e sheh nevoja.

Gjilani gati për festë

Krerë të komunës, të Këshillit për festime, të policisë, shoqërisë civile e të komunitetit të biznesit, kanë bërë të ditur se janë bërë të gjitha përgatitjet për ditën e nesërme dhe u zotuan për festime të qeta.
“Gjilani ka bërë të gjitha përgatitjet e nevojshme për festën e madhe historike që pritet nesër”, ka bërë të ditur Ismail Kurteshi, zyrtar komunal, nga këshilli organizativ për festime. “Merita më e madhe u takon qytetarëve gjilanas të cilët në baza vullnetare kanë kryer të gjitha punët si dhe komunitetit të biznesit që ka mbuluar të gjitha shpenzimet e nevojshme”, ka thënë Kurteshi. Sipas tij si asnjëherë më parë, qyteti i Gjilanit si dhe fshatrat, janë veshur me petkun festiv, ndërkohë që autoritet e sigurisë janë gati për të sigurua qetësi dhe paqe për të gjithë.

Mitrovica shpalosi skenarin e kremtimit të festës së pavarësisë

Pavarësia do të kremtohet në mënyrë të organizuar edhe në qytetin e ndarë të Mitrovicës. Për këtë janë bërë të gjitha përgatitjet paraprake, ku janë përfshirë përfaqësues të të gjitha institucioneve dhe të gjitha subjekteve te Mitrovicës. Kështu tha sot në një seancë solemne të kuvendit të komunës së Mitrovicës, kryetari Bajram Rexhepi. Ai me këtë rast për delegatët dhe opinionin publikoi edhe skenarin e kremtimit të festës së pavarësisë në rajonin e Mitrovicës.