[niemand]

Roben: Shpresoj t’i lë pas dëmtimet!

Mesfushori i Realit të Madridit, Arjen Roben, deklaroi se fitorja përballë Seviljes një javë më parë ka kthyer qetësinë në kampin madrilen. Holandezi, i cili këtë sezon nuk ka mundur të shpreh vlerat e tij më të mira për shkak të dëmtimeve që ka patur, ka deklaruar se ndihet optimist për pjesën e mbetur të sezonit. “Tani skuadra është me shumë besim, kemi një avantazh prej gjashtë pikësh me Vilarealin dhe duhet ta ruajmë këtë diferencë, edhe pse e dimë që nuk do të jetë e lehtë. Kemi edhe tetë ndeshje për të luajtur dhe duhet të japim maksimumin tonë. E dimë që do të etë e vështirë, por nuk mund të lëshojmë në këtë pjesë të sezonit. E rëndësishme është të marrim të gjitha pikët e mundshme, sepse vetëm kështu do të mund të jemi të qetë në rrugën tonë drejt titullit kampion”, tha Roben, i cili komentoi edhe formën e tij sportive: “Këtë sezon kam patur shumë probleme me dëmtimet, por shpresoj t’i lë pas ato. Uroj që të mos dëmtohem përsëri këtë sezon dhe shpresoj të jap më të mirën time për skuadrën në këtë fund kampionati”, tha mesfushori i Realit, i cili shpreson te rezultati pozitiv në takimin e sotëm përballë Majorkës: “Do të jetë një ndeshje shumë e vështirë, por kemi besim tek aftësitë tona. E dimë që Majorka është një skuadër e fortë në fushën e saj, por ne nuk mund të trembemi nga askush. Do të luftojmë për të marrë tri pikët dhe shpresojmë t’ia dalim mbanë”.