[Lona]

Protestat për Brodecin mund të zgjasin me javë


Protestat në mbrojtje të të dënuarve të Brodecit do të nisin të enjten më 18 shtator në sheshin e qytetit të Tetovës. Protestat do të mbahen nën moton “Të gjithë në mbështetje të brodecasve”, ndërkaq që shkak kryesor i tyre është pakënaqësia nga vendimi gjyqësor dhe gjendja e vështirë me të cilën po përballen ata në burg. “Aspak nuk jemi të kënaqur me gjykimin që iu bë njerëzve tanë. I morën në qafë edhe ata edhe ne, vetëm që tu dilte aksioni i suksesshëm”, tha anëtari i Këshillit të familjarëve të Brodecit, Kadri Dauti. Ai sqaron se së pari kanë formuar Këshillin familjar dhe më pas kanë kërkuar përkrahje nga partitë politike shqiptare dhe Organizatat joqeveritare. “Personat që janë në burgje janë në gjendje tepër të vështirë, ndaj dhe kërkojmë që e gjithë popullata të na përkrahë në protestën e 18 shtatorit”, thotë Dauti, duke shtuar se kjo protestë është vetëm fillimi. Pas saj këshilli iniciues, i cili ka mbështetjen e Organizatave të dala nda lufta, organizatave qytetare dhe partive politike do të mblidhet sërish për të vendosur se si do të veprojnë më tej. Ai nuk përjashton mundësinë që protestat të zgjasin edhe disa javë rresht. “Kur i duhet politikanëve që t’i tregojnë botës se po luftojnë terrorizmin, le të shkojnë dhe le ta bëjnë atë në Pallankë, e jo tek ne”, tha i revoltuar Dauti. Në Këshillin organizativ të iniciuar nga familjarët e Brodecit ka edhe nga një anëtarë nga Organizata e Veteranëve të Luftës së Ushtrisë Çlirimtare Kombëtare (OVL-UÇK), Shoqata e Veteranëve të Luftës (SHVL), Unionet e studentëve të dy universiteteve (USHT dhe UEJL), nga Forumi ndërkombëtar për mbrojtjen e të drejtave dhe lirive të njeriut, Lëvizja qytetare shqiptare, Shoqata e të burgosurve dhe të dëmtuarve politik si dhe partitë politike BDSH, PPD dhe BDK. Protestat do të mbahen të enjten në sheshin e Tetovës me fillim në ora 14-të.

Gruevski kërkon kohë, Ahmeti njohje para 23 shtatorit
lajm


Kryeministri Nikolla Gruevski është duke kërkuar kohë shtesë nga partneri i tij koalicionues Ali Ahmeti për njohjen e pavarësisë së Kosovës, njoftojnë burime partiake. Sipas tyre, Ahmeti nga ana tjetër është duke insistuar me ngulm që njohja e pavarësisë të ndodhë para sesionit të Asamblesë së Përgjithshme të Kombeve të Bashkuara më 23 shkurt. Mirëpo të njëjtat burime” shtojnë se Gruevski ka kërkuar kohë plotësuese për “përgatitjen e terrenit” për njohjen e pavarësisë, me arsyetim se situatën e ka komplikuar “involvimi” i Cërvenkovskit me kërkesën që njohja e pavarësisë të kushtëzohet me pranimin e emrit kushtetues të Maqedonisë. Ata thonë se Gruevski më së tepërmi frikohet nga reagime negative të opinionit maqedonas, pjesa më e madhe e të cilit kur janë në pyetje shqiptarët tradicionalisht mbanë orientim proverb. Megjithatë burime qeveritare paralajmërojnë se Gruevski sipas të gjitha gjasave do të lëshojë pe para presionit të Ahmetit dhe bashkësisë ndërkombëtare dhe Maqedonia së shpejti do ta njohë pavarësinë e Kosovës.
Të martën edhe gazeta greke “Elefterotipia” ka shkruar se Maqedonia së shpejti do ta njohë pavarësinë e Kosovës. Informacionet e këtilla gazeta greke i ka bazuar në burime diplomatike.
Të martën mediat kanë transmetuar informacionet se edhe Mali i Zi është duke i finalizuar përgatitjet për njohjen e pavarësisë së Kosovës.