[Peja-Boy]

Braziliani dhe portugezi, në një intervistë të përbashkët, rrëfejnë synimet e tyre me Realin. Simbolet e merkatos së madhe të Real Madridit, Kaká dhe Kristiano Ronaldo, janë lojtarët që duhet të rikthejnë forcën dhe zellin në skuadër, pasi jo më kot janë blerë për mbi 150 milionë euro. Dy lojtarët që kanë marrë dy titujt e fundit të “Topit të Artë” kanë shprehur mendimet e tyre në lidhje me shpresat dhe pritshmëritë pas veshjes së fanellës së famshme të Realit si dhe për sfidat që i presin.

- Sa e vështirë ishte të linit klubet tuaja të mëdha për të ardhur te Real Madridi?

Kaká: Për mendimin tim, jeta profesionale përbëhet nga cikle dhe cikli im te Milani kishte arritur fundin. Ishte një cikël i shkëlqyer, fitova gjithçka që mund të fitohej, por erdhi momenti kur ajo histori duhej mbyllur. Mbaroi ashtu si desha unë. Mund të shkoj sërish në Milano dhe të takoj kolegët e mi pasi u largova në mënyrë miqësore. Ardhja ime te Real Madridi ka qenë shumë e mirë dhe shpresoj që këtu të më ndodhë ajo që më ndodhi edhe te Milani. Dua ta shkruaj emrin tim në historinë e këtij klubi.

Ronaldo: Edhe për mua vlejnë ato që tha Rikardo. Jam krenar për atë cikël që përjetova te Mançester Junajtid. Por ciklet mbyllen dhe ne duam përvoja të reja dhe sfida të reja. Unë jam i gatshëm për to. Sukseset e mia te Junajtid janë pjesë e së shkuarës dhe tani duhet të mendoj për të ardhmen te Real Madridi, ku shpresoj të fitoj po aq ose më shumë. Jam shumë i lumtur, teksa marrëdhëniet e mia me Junajtid janë ende shumë të mira.

- Si u ndjetë kur veshët për herë të parë fanellën e Real Madridit dhe dolët para tifozëve në “Santiago Bernabéu”?

Kaká: Ishte një përvojë fantastike. Në Itali prezantimi i lojtarëve është ndryshe, kështu që ishte gjë e re për mua të kisha një stadium të mbushur plot dhe më la mbresa të veçanta. Ishte shumë emocionale. U ndjeva i nderuar që isha pjesë e një klubi që njihet në mbarë botën për historinë, arritjet dhe traditën e vet.

Ronaldo: U ndjeva shumë i lumtur. Siç e kam thënë më parë, ishte ëndrra e fëmijërisë sime të luaja për Real Madridin dhe më në fund e realizova. Prezantimi para një stadiumi të mbushur plot do të mbetet një burim kënaqësie dhe krenarie, diçka që nuk do ta harroj kurrë. Janë momente që nuk mund t’i harrosh.

- A do të jetë e vështirë të arrini rezultatet që priten prej jush këtë sezon?

Kaká: Te Real Madridi gjithmonë ekziston përgjegjësia për të fituar dhe për të qenë më të mirët si në Spanjë edhe në Evropë. Lojtarët e rinj që kanë ardhur te ky klub, bashkë me ata që ishin më parë këtu kanë detyrën që të fitojnë. Por përvoja na thotë se në futboll nuk mjafton talenti për të arritur suksesin, duhet edhe loja në skuadër, ajo madje është themeli i suksesit.

Ronaldo: Eshtë normale të pritet shumë prej kësaj skuadre sidomos kur sheh se çfarë lojtarësh janë blerë. Sigurisht, Madridi përherë synon të fitojë trofe dhe ne si lojtarë kërkojmë sfida të reja. Me skuadrën dhe lojtarët që kemi, duhet të jemi optimistë se mund të fitojmë, por gjërat duhen marrë shtruar. Duhet të ndërtojmë një skuadër, një grup, e më pas të mendojmë për trofetë.

- Kjo skuadër është krahasuar me atë të epokës së Galaktikëve. Çfarë mendoni për këtë?

Ronaldo: Nuk më pëlqen ta përdor atë fjalë. Ne thjesht kemi një grup me lojtarë të shkëlqyer dhe së bashku duam të formojmë një skuadër që fiton trofe. Galaktikët i takojnë së shkuarës, ishte një tjetër kohë, një epokë që e respektoj shumë për atë që përfaqësonte dhe për lojtarët e asaj skuadre, të cilët kanë bërë historinë e këtij klubi. Por ne jemi grup i ri me lojtarë të rinj, mentalitet i ri dhe sigurisht që edhe ne duam të fitojmë.

Kaká: Jam dakord me Kristianon. Koha e Galaktikëve - të gjithë lojtarë fantastikë - ishte një periudhë e mrekullueshme, por ne jemi brez tjetër, formacion me të tjerë lojtarë. Në fund, shpresoj të jem në gjendje të them se edhe kjo skuadër ishte fitimtare. Për momentin, ne jemi lojtarë të suksesshëm që vijmë te një klub dhe e nisim nga zeroja.

- A është çmimi juaj i shtrenjtë në merkato një faktor që ua shton më shumë presionin?

Kaká: Jo, nuk mendoj. Sigurisht që përgjegjësia është e madhe, por nuk është faktor negativ, është burim motivimi, është stimul. Jemi këtu për të qenë pjesë e një projekti fitimtar. E shoh këtë si motivim të madh.

Ronaldo: Pritet shumë prej nesh, por është normale kur shikon shumën e parave që u shpenzua për ne. Ne jemi mësuar me presionin, kam luajtur për shumë vite te Mançester Junajtid, gjithnjë nën presionin e fitores. Edhe këtu do të jetë e njëjta gjë. Ne duhet të jemi të qetë dhe të punojmë shumë për të formuar një skuadër. Më pas mund të mendojmë për fitoret dhe nderet që mund t’i sjellim këtij klubi.

Valdano: Kristiano është nervoz!

Drejtori sportiv i Real Madridit, Horge Valdano, beson se Kristiano Ronaldo është ‘paksa nervoz’ dhe mezi pret që të tregojë se vlen aq para sa është blerë (94 milionë euro). Ronaldo nuk e ka nisur mirë karrierën e tij si lojtar i Realit që prej transferimit më të shtrenjtë në botë këtë verë. “Më pëlqeu Kristiano në ndeshjen e parë të kampionatit”, ka thënë Valdano. “Ai shënoi edhe pse ishte larg pikës së penalltisë, madje bëri edhe disa aksione të mira. Ndoshta është pak nervoz sepse është profesionist shumë i mirë dhe gjithmonë përpiqet të japë maksimumin, por duhet të presim edhe pak që të adaptohet. Ai ka nevojë për disa ndeshje dhe më pas do të shohim se sa i aftë është. Atij po i ndodh siç i ndodhi Zidanit kur erdhi te ne.”