[Llapjani_HH]

Dorëzon edhe imunitetin

Nënkryetari i Partisë Demokratike të Kosovës, Fatmir Limaj, ka vendosur të heq dorë nga imuniteti i të qenit deputet i Kuvendit të Republikës së Kosovës, në mënyrë që të mos pengohen, siç tha ai, hetimet e filluara ndaj tij nga ana e EULEX-it. Gjatë një konferencë për media, të mbajtur të enjten, Limaj tha se beson në pastërtinë e luftës që ka bërë, luftës së UÇK-së, ndaj është i gatshëm të ballafaqohet kurdoherë me drejtësinë.

Derisa tani i mbetet Kuvendit të Kosovës për t’ia hequr imunitetin, Limaj tha se me këtë vendim shprehë edhe njëherë gatishmërinë për të bashkëpunuar me drejtësinë, por kërkoi nga misioni evropian për sundimin e ligjit që drejtësia të mos kufizohet vetëm në rrafshin e tij.

Ai me këtë rast përmendi edhe veriun e Mitrovicës si vend ku nuk sundon ligji, dhe ku askush nuk po mundet të shtrij ndikimin e tij aty.

Ish-ministri i Transportit, Limaj, tha se ka qenë të mërkurën në takim me zyrtarë të EULEX-it, por as ai as mbrojtja e tij nuk kanë ndonjë dokument zyrtarë që dëshmon se ndaj tij është ngritur aktpadi.

Ai tha se beson në pastërtinë e luftës që ka bërë, në pastërtinë e luftës së UÇK-së, ashtu sikur që beson se do të dal i pastër edhe nga hetimet tjera që misionin evropian ka ngritur ndaj tij si i dyshuar për korrupsion.

Policia e EULEX-it ka arrestuar të mërkurën disa ish-luftëtarë të UCK-së, si të dyshuar për krime lufte, ndërkaq në mbrëmje, të njëjtën ditë, zyrtarë të misionit evropian kanë marrë në pyetje edhe deputetin Limaj, pasi ky i fundit iu dorëzua vullnetarisht drejtësisë.

Gjatë luftës, Limaj ka drejtuar Brigadën “Kumanova”. Nën dyshimet për krime lufte, ai ishte arrestuar vite më parë nga autoritetet e Tribunalit të Hagës, por ishte liruar si i pafajshëm.
Telegrafi