[Zero Cool]

NJËRI NGA “TERRORISTËT“

Intervistë me njërin nga të katërmbëdhjetët në arrati të akuzuar për “veprimtari terroriste“ në bazë të aktvendimit të “Gjykatës së Qarkut“ në Prishtinë të datës 4 tetor 1996
ZËRI I KOSOVËS Nr.1, 9 janar 1997

Pyetje: Ju jeni informuar për aktvendimin e gjykatës serbe në Prishtinë, në bazë të të cilit ju dhe 14 shqiptarë të tjerë jeni akuzuar si “grup terrorist“ për “veprimtari terroriste“. Sa janë të vërteta fajësimet që ju ngarkohen?
Pergjigjja: Lidhur me të gjitha “fajësimet“ që na i ngarkojnë organet pushtuese serbe nuk dua të prononcohem për këto arsye:
1) Organet pushtuese serbe nuk i njoh si kompetente për të bërë hetimet ndaj nesh dhe ndaj asnjë qytetari të Republikës së Kosovës, pasi ato nuk kanë të drejtë të ushtrojnë kurrfarë veprimtarie hetuese e gjyqësore në shtetin tonë të pavarur.
2) Nuk kam ndërmend t’u ngjajë pjesëtarëve të nomenklaturës politike të Republikës së Kosovës, të cilët shtiren sikur janë duke e drejtuar Republikën e Kosovës, por gjithë ditën e gjatë jetojnë e veprojnë brenda ligjeve pushtuese serbe.
3) Për mua tre shqiptarët e kapur, si “pjesëtarë të grupit terrorist“, siç akuzojnë pushtuesit, nuk janë kurrfarë të burgosurish, por vetëm robër lufte, prandaj nuk pranoj të lëshohem në nivelin: “S’i njoh formalisht organet e ligjet pushtuese serbe, por ju përmbahen atyre në të vërtetë“.
4) Unë gjendem në arrati dhe nuk kam ndermend të merrem me dezinformata e komentime spekuluese të organeve pushtuese serbe, siç bëjnë liderët, avokatët, publicistët, etj.
(Ndërhyrje nga intervistuesi): Por ju, ama, akuzoheni si “grup i organizuar terrorist“!
Pergjigjja: E para, ne nuk kemi bërë asnjë veprimtari terroriste. Nuk dij të jetë bërë ndonjë akt terrorist ndaj objekteve civile dhe popullsisë së pafajshme civile serbe në Kosovë nga viti 1981 e këtej. Sa u përket sulmeve për të cilat dihet se ka marrë përgjegjësinë UÇK-ja sipas mendimit tim, ato nuk janë akte terroriste, por aksione çlirimtare. Vetëm ata që i njohin organet pushtuese serbe në Republikën e Kosovës si organe legjitime shtetërore, sulmet ndaj tyre i quajnë terroriste. Terrorizëm i vërtetë është gjithë veprimtaria e organeve pushtuese serbe në Republikën e Kosovës. E dyta, sa i përket “grupit“, shumica e të akuzuarve nga ana e organeve pushtuese serbe ndiqen nga policia pushtuese serbe qysh nga fundi i vitit 1990.
Pyetje: Kur dhe si është filluar ndjekja ndaj jush?
Pergjigjja: Shumica e të ndjekurve, emrat e të cilëve gjenden në këtë paçavure serbe, kishim rënë në sy si organizues të demonstratave e aktiviteteve të lloj-llojshme çlirimtare të viteve 1988-1990 në Kosovë.
Pyetje: A jeni pjesëtar i Ushtrisë Çlirimtare të Kosovës?
Pergjigjja: Cila është pyetja tjetër?
Pyetje: Çfarë mund të thoni për aksionet që po kryhen kohëve të fundit mbi policinë e ushtrinë serbe, si dhe atentatet ndaj disa shqiptarëve?
Pergjigjja: Unë mendoj se këto janë, as më pak e as më shumë, aksione çlrimtare të kësaj force të armatosur çlirimtare kundër forcave të armatosura pushtuese serbe, si dhe kundër shërbëtorëve shqipfolës të tyre.
Pyetje: A i ka bërë UÇK-ja këto aksione?
Pergjigjja: Kjo pyetje më duket e pavend, pasi për këtë duhet të pyesësh atë që e ka marrë përgjegjësinë për aksionet -Ushtrinë Çlirimtare të Kosovës.
Pyetje: Ku ta gjej atë?
Pergjigjja: Ata që janë të interesuar për ta takuar me qëllim të çlirimit të vendit mendoj se mund ta gjejnë.
Pyetje: A i përkrahni këto aksione?
Pergjigjja: Gjithësesi! Këto aksione jo vetëm që i përkrah, por ndjehem krenar që po bëhen. Nuk u takoj frikacakëve, që shastisen nga forcat pushtuese. Nuk u takoj as hutaqëve, që mendojnë se Republika e Kosovës nuk duhet të ketë forca të armatosura çlirimtare. Rëndësi ka që populli po i përkrah ato. Do të vijë koha që të gjitha forcat e shëndosha kombëtare do t’i përkrahin ato.
Pyetje: Liderët partiakë, politikanët e qeveritarët shqiptarë, këto aksione po ua mveshin vetë serbëve ose po i vlerësojnë si aksione terroriste?
Pergjigjja: Ata po nxitohen për mendimin tim. Pa u menduar mirë dhe pa e analizuar gjendjen po japin deklarata që nuk i përgjigjen situatës në Kosovë.
Pyetje: Në opinion janë bërë të ditura përgjegjet e të arrestuarve para hetuesve serbë. Çka mendoni rreth atyre që duhet të kenë thënë ata?
Pergjigjja: Nuk dëshiroj t’i komentoj dezinformatat që opinionit ia ofrojnë organet e pushtuesit dhe bashkëpunëtorët e tyre.
Pyetje: Çka mendoni për kërcënimet që u ka bërë UÇK-ja disa shqiptarëve?
Pergjigjja: Secila lëvizje çlirimtare e secilit popull të pushtuar i ka dënuar bashk-ëpunëtorët e pushtuesve me dënime kapitale. Edhe shtetet e mëdha demokratike i dënojnë shërbëtorët e të huajve (të cilët i quajnë spiuj) me dënime të rënda. Edhe ne nuk duhet të jemi një përjashtim.
Pyetje: A mendoni se lufta e armatosur sjell çlirimin e Republikës së Kosovës?
Pergjigjja: Gjithsesi. Shteti ynë kaherë është dashur t’i ketë forcat e armatosura (ushtrinë e policinë), siç i ka çdo shtet i botës. Shtetet investojnë shumë në forcat e armatosura, me qëllim edhe të evitimit të luftës se armatosur. Edhe agresorët serbë i
masin forcat e tyre. Kasta politike e Republikës së Kosovës patën provuar të formojnë forcat e armatosura (ushtrinë e policinë), por dështuan.
Pyetje: Dëshiron t’u thuash gjë lexuesve të “Zërit të Kosovës“?
Pergjigjja: I përgëzoj ata me rastin e 15-Vjetorit të daljes se numrit të parë të kësaj gazete, e cila doli nën drejtimin e të madhit Jusuf Gërvalla. I uroj të besojnë në forcën
çlirimtare të popullit tonë dhe të angazhohen në këtë drejtim me të gjitha forcat, aftësitë e mundësitë që ka secili. Uroj që në Vitin e Ri 1997 të na plotësohen dëshirat tona kryesore të përbashkëta dhe dëshirat individuale!