[Zero Cool]

Mesazhi i fundit i Lejlës





“Babë, deshtëm me u nisë po nuk po na lejon policia me hip në anije se paska ndodhë një sulm në Oslo”, ishte ky mesazhi i fundit me telefon, që kishte pranuar Bajrush Selaci, të premten pasdite nga e bija Lejla (17), e cila konsiderohet e zhdukur pas tragjedisë që ndodhi në ishullin Utoya të Norvegjisë.


Para pak ditësh, vetë Bajrushi e kishte dërguar të bijën e vetme, Lejlën, tek një shoqe e saj norvegjeze me të cilën dhe në shoqërim të së ëmës së saj do të shkonin në drejtim të Utoyas për të marrë pjesë në kampin veror të Partisë së Punës. Por, aq shumë është shqetësuar nga zhdukja e së bijës sa ka harruar se cilën ditë e kishte përcjellë të bijën, shkruan Zëri.

Gjatë qëndrimit të së bijës në kamp, ai disa herë kishte kontaktuar me të. Ndërkaq, në ditën kritike kishte marrë mesazhin telefonik nga ajo pa i vajtur mendja se në vend që të priste kthimin e Lejlës, që nga ai moment do të shkëpuste çdo kontakt me të.

Pak kohë më pas Bajrushit i kishte telefonuar i biri, që ndodhet në shërbimin ushtarak të Norvegjisë, i cili me të dëgjuar për tragjedinë ishte nisur në drejtim të Utoyas. Por, Bajrushi pa marrë vesh ende për tragjedinë dhe duke aluduar në sulmin me bombë në ndërtesën qeveritare në Oslo ishte munduar t’ia largonte shqetësimin të birit.

Sado që priti, Bajrushi nuk mori asnjë lajm për fatin e Lejlës, jo vetëm atë ditë por as plot katër ditë pas sulmit. Ai tregon se nga autoritetet norvegjeze kishte kërkuar më shumë informacione sa u përket dëshmive të atyre që i kishin shpëtuar tragjedisë.

Por, ata nuk i ofruan asnjë informatë, që do të ndihmonte zbardhjen e fatit të Lejlës së zhdukur. Për faktin se në kërkim të Lejlës dhe 4 të zhdukurve tjerë të kësaj tragjedie është vënë policia norvegjeze, Bajrushi ka drojë se edhe sikur të zhdukurit të shihnin policët, ata të frustruar nga uniformat policore, të cilën e mbante veshur edhe sulmuesi i tyre, nuk do të kishin guxim që të paraqiten para tyre, por vetëm do të iknin.

Edhe një familje tjetër kosovare, me prejardhje nga Peja, ka qenë shumë e tronditur nga lajmi për sulmin në Utoya. Familja Belegu, që para tre javësh ka ardhur për pushime në Kosovë, nëpërmes lajmeve në televizor kishte marrë vesh për sulmin në Utoya, ku ndodhej edhe i biri i tyre Egzoni (18).

Lirie Belegu kishte provuar pa sukses të kontaktonte me të birin, por askush nuk dinte asgjë për të deri të dielën nga mesnata. E shqetësuar tej mase, pa arritur të vërë gjumë në sy, për dy ditë me radhë ajo kishte shfrytëzuar çdo rrugë të mundshme për të marrë vesh diç për fatin e të birit.

Miqtë e Egzonit të dielën nga mesnata e kishin bërë publik lajmin se Egzoni është gjallë. Dhe pak kohë më pas e ëma kishte arritur të kontaktonte me të ëmën e të dashurës së Egzonit, e cila kishte shkuar për ta marrë të bijën dhe Egzonin. Ky lajm e kishte gëzuar pa masë atë.

Për shkak se nuk ka arritur ende të flasë në detaje me Egzonin sa i përket sulmit dhe duke dashur ta kursejë atë nga shqetësimi, ajo nuk di shumë për sulmin. Aq sa ka arritur të mësojë ajo në momentin kritik Egzoni me një shok dhe një shoqe janë hedhur në ujë nga një lartësi prej 10 metrash dhe aty iu ka dalë në ndihmë një peshkatar gjerman me anijen e tij.

Kur kishte hipur në anije ai e kishte parë një shoqe që po mbytej në ujë dhe kishte kërkuar t’i ofronin ndihmë, gjë që edhe kishin arritur ta bënin. Gjatë hedhjes Egzoni kishte lënduar disa brinjë dhe këmbën. Deri para 10 ditësh edhe Egzoni kishte qenë për pushime në Kosovë.