[Shpat]

Por, ngjarja që shënoi javën, e që mbase do të ketë qenë e lidhur edhe për buxhetin e EULEX-it, ku ta dimë, por që gjithsesi ka qenë e lidhur me vetë EULEX-in, ishte gjetja e kufomës së “Dëshmitarit X” në “rastin Kleçka”, dëshmia e të cilit e nisi edhe vetë rastin. Njeriu, identiteti i të cilit ishte mbajtur i fshehur për shkaqe sigurie; i cili u kishte shpëtuar dy tentativë vrasjeve; i cili ishte shpallur dëshmitar bashkëpunues, e më pas edhe dëshmitar i mbrojtur, u gjet i vdekur në një park në Duisburg të Gjermanisë. Sipas policisë gjermane, dyshohet se bëhet fjalë për vetëvarje.


Natyrisht, se reagimet në Kosovë ishin të menjëhershme. Në mungesë të informatave që, sipas EULEX-it, janë tepër konfidenciale për shkak të ndjeshmërisë që ngërthen një rast i një dëshmitari të mbrojtur që, siç thotë familja, kishte qenë nën përkujdesjen e EULEX-it që nga muaji mars i sivjetmë, u renditën një sërë teorish me primesa konspiracioni.


Ndër reagimet e para që më ra të dëgjoja ishte se dëshmitari mbase nuk kishte bërë vetëvrasje, porse e kishin vrarë. Se kush kishte mundur të ishte i interesuar ta vriste dhe përse, ishte pjesa e dytë e konspiracionit – dhe lista e kandidatëve këtu nuk ishte bash e vogël.


Të interesuar do të mund të ishin ata që nëpërmjet të këtij veprimi do të donin t’i frikësonin të gjithë dëshmitarët e tjerë, që në këtë proces thuhet se do të jenë mbi 50 nga ana e prokurorisë dhe, në mungesë të numrave, së paku një duzinë politikanësh aktualë nga ana e mbrojtjes. Përderisa prokuroria disponon me dëshminë valide, ngase është nënshkruar nga dëshmitari në prezencën e palës mbrojtëse, e cila gjithashtu e ka marrë në pyetje – mbrojtja deklaron se shuarja e tij është hendikep për të akuzuarit, për shkak se tashmë nuk ka mundësi për ballafaqimin e dëshmitarit me këta të parët.


Të interesuara do të mund të ishin shërbimet sekrete me qëndrim të fuqishëm antikosovar (serb apo rus, ta zëmë) – që me vrasjen profesionale të njeriut, asisoj që kjo të dukej si vetëvrasje, do të kishin për qëllim t’i kriminalizonin shqiptarët. Kështu, do të përhapej bindja se dëshmitarin e kanë vrarë vetë shqiptarët, për t’i fshehur gjurmët e krimeve të luftës për të cilat tash po akuzohen disa eprorë të UÇK-së. Do ta përdornin këtë “modus operandi” si “argument” për nevojat e Tribunalit të Hagës, prej nga kishin rrjedhur akuza se dëshmitarët kundër të akuzuarve shqiptarë ishin eliminuar. Njëkohësisht, me këtë veprim do të përçonin një mesazh në lidhje me të gjithë të implikuarit e mundshëm (po qe se ekzistojnë) në hetimin që do të zhvillohet sipas akuzave të senatorit zviceran Marty, për organet dhe trafikimin me to. Mbase, edhe me qëllim që EULEX-in ta shpërqendrojnë nga obligimet e tjera që nuk kanë të bëjnë me ndjekjen e krimeve të luftës – siç janë doganat për shembull.