[Zero Cool]

Ceremonia e Lezhës, Berisha: Bashkia, organizim perfekt

Kryeministri Sali Berisha deklaroi se Bashkia e Lezhës organizoi në mënyrë perfekte ceremoninë e javës së shkuar, ku u përkujtua 568-vjetori i Besëlidhjes.




"Eshtë krijuar një tymnajë për mënyrën e organizimit të ceremonisë në Lezhë. Aty pati pjesëmarrje nga të gjitha trevat ku jetojnë shqiptarë. Të gjitha ata që thanë se s’morën ftesë vetëm sa shkaktojnë zhurmë", tha Berisha në mbledhjen e grupit të Partisë Demokratike.

Berisha ndër të tjera theksoi se çështjet e integrimit janë më madhorët për qeverinë.

"Në samitin e Brukselit u shpreha se procesi i integrimit duhet të jetë i merituar", tha Berisha, duke theksuar se për këtë cështje duhet të jepet mbështetja e të gjitha forcave politike.


Përjashtimi i Presidentit të Republikës Bamir Topi në Lezhë


Tri ditë pas incidentit në Lezhë, Protokolli i Shtetit deklaroi se aktiviteti i mbajtur në 2 mars, me rastin e 568 vjetorit të Besëlidhjes, ka qenë ideuar, organizuar dhe menaxhuar nga Bashkia e qytetit Lezhë.

“Lista e pjesëmarrësve, ftesat dhe lista e folësve janë bërë dhe menaxhuar nga organizatorët dhe nuk ka patur të bëjë aspak me Protokollin e Shtetit”, thuhet në një deklaratë për shtyp në lidhje me incidentin, ku Presidentit të Republikës Bamir Topi iu hoq e drejta e fjalës përshëndetëse. Protokolli i Shtetit thotë se vepron mbi bazën e Ceremonialit të Republikës së Shqipërisë dhe në zbatim të tij mbikqyr mbarëvajtjen nga ana protokollare të aktiviteteve ku marrin pjesë personalitetet më të larta të shtetit shqiptar, përfaqësues të shteteve të tjera dhe të trupit diplomatik.

“Në këtë kuadër, Protokolli i Shtetit ishte i pranishëm në aktivitetin e përvjetorit të Besëlidhjes së Lezhës. Po ashtu, Protokolli i Shtetit ka qenë në kontakt me institucionet e Presidentit, Kryetarit të Kuvendit, Kryeministrit dhe me trupin diplomatik në Tiranë, lidhur me vendosjen protokollare të personaliteteve sipas hierarkisë shtetërore të përcaktuar në ceremonialin zyrtar”, thuhet në njoftim, ku nënvizohet se roli dhe angazhimi i Protokollit të Shtetit ka qenë në përputhje të plotë me Ceremonialin zyrtar të Republikës së Shqipërisë.