[Lona]

Si të mbrohemi nga sëmundjet e vjeshtës dhe dimrit

http://zhurnal.mk/data/news/allergies.jpg

Të gjithë e kanë provuar tashmë që stinët vjeshtë-dimër janë shumë “kapriçoze” në lëvizjen e temperaturave. Këtë gjë më shumë se gjithçka e ndjen trupi i njeriut. Shumë njerëz ndihen të lodhur, të tjerë në depresion e disa të tjerë akoma sëmuren në mënyrë të pashpjegueshme dhe të përsëritur. Atëherë, çfarë duhet të bëjmë për të qenë në formë njëlloj si në verë? E rëndësishme është të ndjekim disa këshilla të thjeshta dhe praktike. Gjatë stinës së vjeshtës ditët shkurtohen në mënyrë progresive, temperatura ulet ndjeshëm, njerëzit janë më të predispozuar për të kaluar më shumë kohë në vende të mbyllura dhe të ekspozohen gjithmonë e më pak në diell.

Mbrojtja

Vjeshta dhe dimri janë stinët kur shumë njerëz fillojnë të ndërmarrin masat mbrojtëse. Ulja e temperaturave shton mundësitë për t`u prekur nga infeksionet bakteriale dhe virale. “Të mbrohesh” në këtë rast do të thotë ta mbash organizmin dhe sistemin imunitar sa më efiçent, për të qenë më të fortë dhe më të gatshëm për t`u mbrojtur. Stresi ndikon në uljen e mbrojtjes së organizmit. Një nga faktorët që më shumë se të tjerët ul mbrojtjen natyrale të organizmit është stresi, ku bën pjesë si ai fizik, ashtu edhe ai emotiv. Shumë njerëz as që e mendojnë se edhe një stërvitje e sforcuar mund të provokojë stres në organizëm dhe të ulë sistemin imunitar.

Aktiviteti

Një aktivitet i moderuar sportiv mund të përmirësojë qarkullim e gjakut, tonifikojë muskulin kardiak, t‘i japë më shumë oksigjen organizmit dhe të shkarkojë stresin motiv. Sigurisht, edhe një ushqyerje jo korrekte dhe e pashëndetshme mund të dobësojë funksionin e sistemit imunitar. Është shumë e rëndësishme të dihet se një ushqyerje e shëndetshme duhet të përshtatet me stilin e jetesës, me llojin e punës që bëjmë, moshën dhe sezonin. Dihet që nevojat ushqimore janë të ndryshme në periudha të ndryshme të jetës, ashtu siç janë të ndryshme në stinë të ndryshme. Megjithatë, rregulli i përbashkët është: shumë fruta, perime jeshile dhe ushqime të freskëta.

Masa për t’a forcuar sistemin

Stina e re sapo ka nisur, por fatkeqësisht shumë prej nesh nuk janë të gatshëm për ta pritur buzagaz. Me një sistem korrekt ushqyerjeje dhe me një administrim të mirë të stresit, do të jeni vërtet në gjendje ta përballoni sa më mirë stinën e vjeshtës dhe dimrit. Gjatë vjeshtës është vënë re se kemi një rënie më të madhe të flokut, krahasuar me muajt e tjerë të vitit. Ky proces që prek gjithë qeniet njerëzore, në këtë periudhë manifestohet edhe te gjitarët që kanë qime në trup. Megjithatë, në disa raste vihet re një rënie jashtë normave të lejuara, ndaj është e nevojshme të ndërhyhet për ta parandaluar.


Domatet parandalojnë sulmin në tru

Ushqimi i pasur me domate redukton rrezikun nga sulmi në tru, pohojnë hulumtuesit në Finlandë. Ata kanë studiuar ndikimin e likopenës, substancës së kuqe e cila mund të gjendet në domate, speca dhe shalqi.Rezultati i studimit, i cili është kryer në mostrën prej 1.031 meshkujsh, i cili është publikuar në revistën “Neurology”, ka treguar që personat të cilët kanë pasur më së shumti likopenë në qarkullim të gjakut kanë qenë më së paku të ekspozuar ndaj rrezikut për të pasur sulm në tru.

Shoqata për sulmin në tru është angazhuar për hulumtime shtesë rreth asaj se pse likopena e ka këtë efekt, përcjell BBC.

Niveli i likopenës në gjak tek të testuarit është matur në fillim të studimit, ndërsa hulumtuesit i kanë përcjellë gjatë 12 viteve të ardhshme.
Ata kanë qenë të ndarë në katër grupe në bazë të sasisë së likopenës në gjak.

Në grupin prej 258 meshkujsh me shkallën e ulët të likopenit janë shënuar 25 sulme në tru dhe 11 sulme në tru në grupin prej 259 meshkujsh, tek të cilët ka qenë i lartë niveli i likopenës.

Rezultate tregojnë që rreziku nga sulmi në zemër është reduktuar për 55 për qind nëse personi ka konsumuar ushqim të pasur me likopenë.
Mjeku Jouni Karppi nga Universiteti i Finlandës lindore në Kuopio ka thënë që ky studim ka vërtetuar që ushqimi i pasur me pemë dhe perime është i lidhur me rrezikun më të vogël nga sulmi në tru.

“Këto rezultate vërtetojnë rekomandimin që njerëzit duhet të hanë pesë herë në javë pemë dhe perime, çka do të çojë deri të reduktimi i madh i numrit të sulmeve të trurit”, ka thënë ai.

Karppi ka shtuar që likopena vepron si antioksidant, redukton inflamacionet dhe parandalon mpiksjen e gjakut. Dr. Clare Walton nga Shoqata britanike për sulm në tru ka thënë që studimi tregon që amntioksidanti, i cili mund të gjendet në domate, spec të kuq dhe shalqi mund të ndihmojë në reduktimin e rrezikut nga sulmi në tru.

Ajo ka shtuar që kjo nuk duhet t’i dekurajojë njerëzit për të ndalur së ngrëni edhe llojet tjera të pemëve dhe perimeve të cilat kanë efekt të mira për shëndetin sepse ende mbesin segment i rëndësishëm i ushqimit. “Hulumtimet shtesë duhen të ndihmojnë për të kuptuar pse antioksidantët e caktuar në perime siç është domatja ndihmojnë në reduktimin e rrezikut nga sulmi në tru”, ka thënë Walton.


Si ta hiqni celulitin pa tretman të shtrenjtë

Celuliti sulmon gjithnjë e më herët dhe pothuajse nuk ka femër e cila nuk ka telashe me të, prandaj ja disa këshilla praktika.

Celuliti është një nga “shqetësimet” e epokës moderne, që pa dyshim është në majë të listës të gjërave që femrat i urrejnë në trupin e tyre. Është zhvilluar një industri e tërë për ta larguar celulitin, nga kremrat e ndryshme dhe rrobat e veçanta e deri tek trajtimet e shtrenjta.

Megjithatë, kundër celuliti mund të luftoni edhe vetë, por ka nevojë për pak mund dhe disiplinë. Për fillim, ndryshoni ushqimin. Gjyshet tona nuk kanë pasur celulit, më së shumti për shkak se kanë ngrënë ushqim më të shëndetshëm. Do të thotë, sa më shumë perime, pemë të freskëta dhe drithëra integrale, sa më pak miell dhe oriz të bardhë. Të dëshirueshëm janë edhe peshku nga ujërat e ftohta, si salmoni për përmbajtjen e madhe të acideve esenciale yndyrore të cilat reduktojnë dëmtimet qelizore.

Uji është gjithmonë recetë e mirë, rreth dy litra në ditë, që lëkura juaj të jetë gjithmonë e hidratuar, ndërsa në këtë mënyrë pastrohen edhe toksinat nga trupi. Përveç ujit të mirë janë edhe çaji i verdhë dhe i gjelbër, ndërsa rekomandohet shmangia e plotë e ushqimit të yndyrshëm dhe të fërguar dhe lëngjeve me sheqerna të plota.

Po, ushtrimet janë të obligueshme, sigurisht. Cili do aktivitet i rregullt fizik do të ndihmojë qarkullimin më të mirë, njëkohësisht edhe largimin e toksinave, ndërsa nuk bën keq as heqja e ndonjë kilogrami më shumë dhe zhvillimi i muskujve.

Për fund, bëni masazhe të rregullta, të paktën t’ua bëjë partneri ose ju vetë. Bëni masazh pjesët e trupit me celulit me përdorimin e kremrave ose vajrave për masazh, ndërsa rezultate të shkëlqyeshme mund të arrihen dhe me vajrat esenciale të greipit ose portokallit.


Vitamina C nuk mund të mbrojë nga ftohja, por mund ta shkurtojë atë

Doza e rekomanduar është 90 miligramë për meshkuj dhe 75 miligramë vitaminë C për femrat, ndërsa shtesat e kësaj vitamine nuk guxojnë të qëndrojnë në banjë ose kuzhinë, sepse nuk janë njëlloj efikase.

Vitamina C nuk ka efekt në forcimin e imunitetit në atë masë që mund të bllokojë krijimin e ftohjes, por ka dëshmi se si dozat e larta të vitaminës C mund të shkurtojnë kohëzgjatjen e saj, ka zbuluar studimi i Qendrës nacionale australiane për epidemiologji, e cila ka shikuar 30 studime të ndara për ndikimin e kësaj vitamine në imunitet, të cilat kanë përfshirë 10.000 njerëz.

Njerëzit të cilët çdo ditë marrin shtesë prej një grami të vitaminës C në përqindje të njëjtë sëmuren nga ftohja, si edhe ata që nuk marrin shtesat e asaj vitamine. Megjithatë, ata që e marrin qëndrojnë dyfish më shkurt të sëmurë, shkruan San Francisco Chronicle.

Organizmi ynë e përdor vitaminën C për të forcuar eshtrat, kërcin dhe muskujt, por ndihmon edhe tek absorbimi më i mirë i hekurit. Ekspertët rekomandojnë konsumin prej 90 miligramësh të vitaminës C në ditë për meshkujt dhe 75 miligramë për femrat. Nëse merrni shtesat e kësaj vitamine, nuk duhet t’i mbani në banjë ose kuzhinë, sepse ruajtja në hapësira ku lagështia në ajër është e lartë, dobëson veprimin e saj.

Citruset, perimet e gjelbra, dredhëzat dhe pjepri janë burime të mira të vitaminës C, ndërsa mënyra më e mirë për të rritur konsumin e asaj vitamine në organizëm është që pemët dhe perimet t’i hani të papërpunuara, këshillojnë shkencëtarët.