[euro]

HENDBOLL: Vëllaznimi-Prishtina 31:32 (17:17)

Takimi i javës së 20-të në Superligën e Kosovës në hendboll, ndërmjet Vëllaznimit dhe Prishtinës, ka përfunduar me fitoren e prishtinasve me rezultat të ngushtë 32 me 31.

Ndeshja e zhvilluar në Pallatin e Sporteve “Shani Nushi” në Gjakovë, u përcoll nga një numër shumë i vogël shikuesish.

Të parët në epërsi kalojnë mysafirët përmes golit të Avdiut. Që nga minutat a para të takimit skuadra e Prishtinës, e udhëhequr nga trajneri Hilmi Xhaferi, mban epërsi konstante prej 1 deri në tre gola diferencë.

Pjesa e parë u manifestua nga gabime të shumta të hendbollistëve nikoqirë, të cilët i krijojnë mundësinë skuadrës nga kryeqendra që të mbajë epërsinë dhe të diktojë tempon e lojës në pjesën më të madhe të takimit.

Për këtë u përkujdes edhe portieri Real Pozhegu, i cili poashtu kishte paraqitje mjaft të mirë në pjesën e parë.

Në 30 minutëshin e parë në radhët e Prishtinës u dallua përforcimi i ardhur nga Maqedonia, Taqo Çivllaçki, i cili ishte i pagabueshëm në gjuajtjet nga 9 metra dhe me depërtimet e tij karakteristike.

Çivllaçki plot 6 herë arriti të tundë rrjetën e kuqezinjëve gjatë 30 minutave të para të takimit.

Në anën tjetër nga skuadra e Vëllaznimit, në fillim të takimit, hendbollistët më efikasë ishin Isa Koshi me katër gola, si dhe Driton Dylhasi e Samedin Kurteshi me 3 gola.

Pjesa e parë u karakterizua nga vetëm një gjuajtje nga 7 metra, e akorduar në favor të prishtinasve dhe të cilën e realizoi Çivllaçki.

Loja e treguar në parket gjatë pjesës së parë, ishte mjaft e barazpeshuar, e këtë më së miri e tregon rezultati i barabartë 17 me 17, me të cilin përfundojnë 30 minutat e para.

Prishtina e fokusuar në lojën e qendrës Çivllaçki dhe atë të krahut Alban Dobroshi, edhe në pjesën e dytë arriti që me lehtësi të përballojë skuadrën e Vëllaznimit

Nikoqirët, gjatë këtyre minutave e ndjekin hap pas hapi Prishtinën, epërsia e të cilëve disa minuta para përfundimit të takimit arriti deri në 3 gola dallim.

Pjesën e dytë, loja e prishtinasve fokusohet më shumë në kundërzbritje, për konkretizimin e të cilave kryesisht përkujdesej Alban Dobroshi, i cili nuk falte nga pozita të këtilla.

Sa më shumë që kalonte koha, aq më interesant bëhej ky takim dhe aq më shumë ashpërsoheshin duelet, që si rrjedhojë nga të dy skuadrat pati 5 përjashtime me nga dy minuta.

Poashtu gjatë kësaj periudhe, në ekzektumin e 7 metërshave fillimisht dështon Zenuni…. më pas Culaj…. dhe atyre u bashkangjitet edhe Uran Luzha….

Megjithatë, skuadra e Vëllaznimit, minutave vijuese gëzon edhe tre 7 metërsha të tjerë, që i besohen përforcimit të ardhur nga Prishtina, Shehadin Zenuni, i cili i realizon të tëra.

Dështimet e shpeshta në fazën e sulmit i kushtuan vendasve, të cilët edhepse në sekondat e fundit patën rast të barazojnë rezultatin, shtylla pingule shpëton prishtinasit dhe u dhuron atyre dy pikë të reja.

Pas fitores ndaj Dritës, kjo është fitorja e dytë radhazi e Prishtinës dhe njëherit e dyta në ballafaqim me kuqezinjtë nga Gjakova në këtë edicion garash, pas së cilës skuadra nga kryeqendra arrin në kuotën prej 14 pikëve, por edhe më tutje gjendet në pozitën e parafundit në tabelë, e cila rrezikon pjesëmarrjen e saj në edicionin e ardhshëm të Superligës.

Barrën kryesore në fitoren më të re të prishtinasve, e bartën Çivllaçki dhe Alban Dobroshi, me 11, përkatësisht 9 gola të shënuar, kurse në radhët e Vëllaznimit u veçua Samedin Kurteshi, i cili 8 herë tundi rrjetën e mysafirëve.

Vëllaznimi – Prishtina 31 me 32

LPBK: Drita-Vëllaznimi 72-74
Në Gjilan, Drita ka pritur skuadrën e Vëllaznimit, ndaj së cilës ka pësuar me rezultat 74 me 72.

Fillimi i takimit vendosi për fitoren e gjakovarëve, të cilët gjatë 10 minutave të para, me mbrojtje të fortë dhe sulme efikase, lejojnë vendasit të shënojnë vetëm 10 pikë.

Haxhibulliq dhe Bruqi, ishte dyshja më e suksesshme e kuqiznjëve në fillim të takimit, duke shënuar 10 përkatësisht 7 pikë.

Basketbollistët e Vëllaznimit hyjnë në seri prej 8 me 0, duke mos lejuar nikoqirët që 4 minutat e para të ndeshjes, të mos shënojnë asnjë pikë.

Pikët e para për vendasit i shënon Damo…

Në çerekun e parë nikoqirët u bazuan kryesisht në Charles Mangën, i cili pati paraqitje të shkëlqyer në këtë takim, përderisa Damo pas katër tentimeve të dështuara për tre pikë, në të pestin shënon.

Në 10 minutëshin e parë larg formës së tij ishte edhe Johnson i cili shënoi vetëm dy pikë.

Çereku i parë u përmbyll me rezultat 10 me 23.

Në çerekun e dytë basketbollistët e Dritës pasqyruan formë krejtësisht tjetër.
Të udhëhequr nga Manga dhe Johnson, ata shumë shpejt arrijnë që zvogëlojnë epërsinë e lartë të kundërshtarit, por jo edhe të barazojnë rezultatin, duke e përmbyllur pjesën e parë të takimit me rezultat 34 me 42.

Në çerekun e tretë të dy skuadrat patën paraqitje mjaft të mirë, duke forcuar rradhët e mbrojtjes dhe duke shtuar efektshmërinë e tyre në fazën e sulmit, që ndikojë në rënien e dinamikës së lojës.

Vëllaznimi arrin të mbajë epërsinë në rezultat duke e përfunduar këtë çerek me epërsi prej 11 pikësh, 60 me 49.

Kjo periudhë e lojës ishte mjaft e baraspeshuar, ku të dy skuadrat pritnin që të përfitonin nga gabimet e njëra tjetrës.

Në çerekun e fundit, Drita për herë të parë në këtë takim, arrin që t’i rrezikojë fitoren e Vëllaznimit, duke ngushtuar epërsinë e tyre në 4 pikë, mirëpo ishte tepër vonë për t’u këndellur.

Ky çerek u manifestua nga batica dhe zbatica të mëdha, si te njëra ashtu edhe te skuadra tjetër, duke e bërë këtë takim edhe më interesant.

Megjithatë, epilogu i ndeshjes, fliste në të mirë të skuadrës mysafire nga Gjakova e cila me këtë fitore, edhe më tutje mban shpresa për në përfundimtare.


FUTBOLL: Besiana - Getoari 3:0

Ndeshja e zhvilluar në Besianë, ndërmjet Besianës vendase dhe Getoarit nga Prizreni ka përfunduar me fitoren e llapjanëve 3 me 0.

Vendasit kanë dominuar tërësisht në pjesën e parë, duke krijuar raste të njëpasnjëshme shënimi.

Rastin e parë për të rrezikuar portën e kundërshtarit e pati Adem Bakiu, në minutën e 15-të, kur godet furishëm, por portieri Thaqi ishte në vendin e duhur…..

8 minuta më vonë, përkatësht në minutën e 23-të të ndeshjes, Statovci ekzekuton gjuajtjen e lirë, por goditja tij pëfundon në murin e gjallë

24 minuta pas fillimit të pjesës së parë, akordohet gjuajtja e parë nga këndi, nga e cila vendassit nuk arrijnë të përfitojnë diç.

Bakiu në minutën e 30-të me këtë gjuajtje, për pak sa nuk arriti të mposhtë portierin prizrenas, i cili me mund të madh e dërgoi topin jashtë vijës fundore.

Një minutë më vonë, Sabit Osmani pasi shërbehet nga Ylber Aliu, gjuan nga afro 11 metra, por gjuajtja e tij ishte tejet e pasaktë.

Mirëpo vetëm dy minuta para përfundimit të takimit, Adem Bakiu, i vetmuar në zonën e rreptësisë së mysafirëve, me kokë e plason topin në rrjetën e portierit Thaqi.

Me këtë epërsi minimale të Besianës, përfunduan 45 minutat e para.


Vetëm 43 sekonda pas fillimi të pjesëlojës së dytë, epërsinë e nikoqirëve e rrit Ylber Aliu.

Rezultatin në 3 me 0 e ngrit Faruk Statovci, me këtë goditje të fuqishme nga afro 25 metra, e zë në gjumë portierin Thaqi, i cili nuk arrin të pengojë këtë projektil.

Skuadra e Getoarit, thuasje e pajtuar që të kthehet pa pikë nga Besiana, edhe gjaë 45 minutave të fundit të takimit pati vetëm një rast shënimi, kur Brando ekzekuton gjuajtjen e lirë, por portieri Qosa i vëmendshëm largon topin jashtë vijës fundore.

14 minuta para përfundimit të takimit, për afro 5 minuta ndërpritet ndeshja, e shkak i kësaj ishte nervozizmi i tepruar i të dy palëve.

6 minutat e fundit të takimit, Besiana mbeti pa qendërsulmuesin Ylber Aliu, i cili pas dy ndëshkimeve me kartona të verdhë, largohet nga loja.

Me këtë fitore, Besiana bën një hap të madh drejt ruajtjes së epitetit të anëtarit në elitën e fuitbollit të Kosovës, përderisa Getoari pas fitrores ndaj Besës së Pejës javën e kaluar, zhgënjeu adhuruesit e saj.

Besiana – Getoari 3 me 0.

FUTBOLL: Prishtina-Drita 3:1
Derbi i javës së 18-të i Ligës së parë të futbollit në mes të Prishtinës dhe Dritës, përfundoi me fitore të ekipit nga kryeqyteti me rezultat 3 me 1, duke vazhduar kështu serinë e fitoreve të njëpasnjëshme të Prishtinës në stinor pranveror.

Ky takim u zhvillua pa praninë e shikuesve dhe natyrisht që lojtarët e të dyja palëve nuk ishin të motivuar për lojë si herave tjera.

Në stadiumin e kryeqytetit mund të vërehej edhe një risi tjetër.
Pas një investimi të klubit me ndihmën e autoriteteve komunale dhe një shpenzimi prej 15,000 eurove ishin riparuar hyrja në stadium, bankat e rezervistëve, vendi i vëzhguesve dhe këtë herë nuk ishin anashkaluar as nevojat e gazetarëve duke u riparuar vendi i kamerave dhe duke u vendosur ulëse për gazetarët dhe zyrtarët e klubeve.

Prishtina hyri në këtë ndeshje derbi pa sulmuesit Uliks Emra dhe Sheremet Jusufi.

Ajet Shosholli kishte vendosur në fushë formacionin me të vetmin sulmues Bashkim Patokun të përkrahur nga Xhevdet Llumnica dhe Driton Krasniqi.
Rastin e parë në ndeshje e pati Bashkim Patoku i cili pas një krosimi të Milaim Humollit gjuan drejt në portierin Ajdini.

Menjëherë në anën tjetër kundpërgjigjen lojtarët e Dritës, ku pas krosimit të mirë të Shpëtim Hasanit, Selman Berisha gjuan me volej jashtë portës.
Pas 30 minutave lojë, Prishtina kalon në epërsi.

Bashkim Patoku ndalet në zonë nga Mervan Hoxha, gjyqtari Feriz Parllaku tregon në pikën e bardhë.
Përgjegjësinë për ekzekutim të penaltisë e merr Bashkim Patoku i cili bukur arrin ta mashtrojë portierin dhe 1 me 0 për Prishtinën.

Disa minuta më vonë Gjinoci i Dritës gjuan bukur nga 20 metra por Kushtrim Mushica mbron.

Pas disa gjysëmrasteve të të dyja palëve, Arben Zhjeqi me një pasim të gjatë dhe preciz gjen Milaim Humollin i cili pason të Bashkim Patoku e ky i fundit depërton me top deri në gol.

Pas disa minutave përsëri kombinim i njejtë i Zhjeqit dhe Humollit por këtë herë Driton Krasniqi nuk ishte i saktë.

Në pjesën e dytë trajneri i Dritës, Muharrem Sahiti vendos ta largoj nga loja Selman Berishën për shkak të një lëndimi të lehrtë dhe vendos që ta ndryshojë taktikën e Dritës duke i ikur kështu lojës së pjesës së parë më mbrojtje të ngjeshur dhe kundërsulme të shpejta.

Megjithatë rasti i parë përsëri vjen për Prishtinën, kur Milaim Humolli gjuan nga 20 metra largësi por portieri mbron.

Më pas Shpëtim Hasani pason te Visar Sermaxhaj i lirë në krahun e majtë ai kroson në drejtim të Ismet Ramushit i cili e detyron Adnan Halitit të shënojë autogol. 2 me 1

Pas disa minutave së pari Driton Krasniqi pati rast të mirë prej një rivënje nga këndi por gjuan jashtë portës.

Milaim Humolli humb një rast të mirë i vetmuar, mirëpo përmirëson gabimin e tij 10 minuta para përfundimit të ndeshjes kur bukur pason te Xhevdet Llumnica, i cili vendos rezultatin përfundimtar, 3 me 1 për Prishtinën.

Me këtë fitore Prishtina siguron vendin e parë këtë sezonë me 41 pikë, ndërsa Drita është në vendin e 7-të me 20 pikë më pak.

Ping-pongistët kosovarë shtojnë aktivitetet, por jo edhe sukseset

Përfaqësuesja e Kosovës në ping-pong ishte pjesëmarrëse në turneun dyditor në Slloveni, për të rinj dhe të reja, në të cilin është prezantuar me 11 garues.

Garat u zhvilluan në grupe, në sistemin ekipor dhe individual.

Seleksioni Kosova 1 ka garuar në grupin 1 së bashku me Kroacinë dhe Korenë Jugore, ku të dyja ballafaqimet i humbi me rezultat 3 me 0.

I njëjti fat i përcolli edhe garuesit e seleksionit Kosova 2, që humbi nga Bosnjë Hercegovina dhe Çekia.

Kadetet e Kosovës, humbën takimet me Francën, Kroacinë dhe Slloveninë.

E vetmja garuese në këtë konkurencë që arriti të fitojë një set ishte Nafije Murati e cila në ballafaqim me Seta Sallamun të Sllovenisë humbi me rezultat 3 me 1.

Në këto gara morën pjesë 272 garues nga 23 shtete të ndryshme botërore.

Sipas zyrtarëve të Federatës së Ping-pongut të Kosovës, problemi i vetëm që është paraqitur në këtë turne, ka qenë çështja e flamurit shqiptar, i cili edhepse në hapje të garave ishte i vendosur në sallë, me fillimin e tyre disa nga pjesëmarrësit kanë kërkuar nga organizatorët që ai të hiqet.

Derisa të zgjidhet kjo çështje, nga përfaqësuesja e Kosovës, do të prezantohet më flamurin e Federatës së Ping-Pongut të Kosovës.

Delegacioni kosovar, gjatë vizitës në Slloveni, pati takime të shumta me zyrtarë të vendeve pjesëmarrëse.