[Kalt]

Landet federale gjermane duan t'u njohin të drejtën e qëndrimit të huajve, të cilët kanë një vend pune në Gjermani
Kjo u vendos në mbledhjen e ministrave të brendshëm të landeve, e cila përfundoi punimet e saj të premten në Nyrenberg. Kjo rregullore do të hyjë menjëherë në fuqi, njoftoi drejtuesi i konferencës, ministri i brendshëm bavarez Gynter Bekshtajn, i cili i tregua i kënaqur me rezultatin e arritur.
"Tani përpara kemi një dokument, në të cilin unë shoh shanse të mira dhe ku vërehet një përkrahje unanime. Përkrahja unanime është e nevojshme përndryshe konferenca e ministrave nuk mund të vendosë asgjë. Ne nuk nuk mund të marrim vendime me shumicë absolute por me unanimitet", tha Beckstein.
Sipas të dhënave të ministrit të brendshëm të Saksonisë së poshtme, Uve Shyneman nga ky vendim përfitojnë rreth 20 mijë prej rreth 200 mijë të huajëve me Duldung. Shkalla e parë parasheh që kush fiton vet bukën e gojës, gjashtë apo tetë vite jeton në Gjermani dhe është integruar mirë mund të fitoj të drejtën e qëndrimit. Uve Shyneman është i gëzuar më në fund që landet arritën të vendosin për këtë rregull:
"Fillimisht ne presim një zgjidhje nga vetë landet dhe kjo do të thotë që do të lejohën të qëndrojnë në Gjermani të gjithë deri më 30 shtator të vitit 2007 dhe nëse deri atëherë ata do të gjejnë punë dhe do të dëshmojnë se kanë një kontratë pune atëherë mund të fitojnë edhe të drejtën e qëndrimit. Kjo është me rëndësi së pari puna pastaj e drejta e qëndrimit", tha Shyneman.
Shkalla e dytë e modelit të landeve parasheh që refugjatët të cilët nuk kanë punë, por janë integruar mirë në shoqëri do të lejohen deri në fund të vitit të ardhshëm pa patur frikë se do të dëbohen. Ata do të kenë kohë deri atëherë të gjejnë një vend pune. Volker Bouiver nga Hesseni, i cili negocoi si ndërmjetësues i landeve të Unionit në natën duke u gdhirë dita e premte, e quajti vendimin si një akt faljeje dhe bujarie:
"Ne duam që atyre që në fakt është dashur që moti të largohen nga ky vend por për shkaqe të ndryshme ende ndodhen këtu dhe nuk kanë asnjë borxh, tu ofrojmë një qëndrim të sigurtë në Gjermani", tha Bouiver.
Për refugjatët të cilët nuk kanë arritur të integrohen mirë në shoqërinë gjermane nuk ndryshon asgjë. Ata duhet që deri më 30 shtator të vitit 2007 të fitojnë vetë bukën e gojës, përndryshe do të detyrohen që çdo tre muaj të bëjnë kërkesën për vazhdimin e Duldungut.
Ministri i brendshëm bavarez Bekshtajn tha se landet me këtë vendim, pavarësisht nga një rregullim federal duan të shfrytëzojnë kompetencat e tyre. Ministri i brendshëm federal, Volfgang Shojble foli për një rezultat të mirë të arritur në takimin e ministrave të brendshëm.
Megjithatë konflikti themelor me koalicionin e madh për të drejtën e qëndrimit për të huajt pa një vend pune në Gjermani qëndron ende. Sipas pikëpamjeve të Bekshtajnit për statusin e të huajëve pa një vend pune duhet të gjindet një zgjidhje në rrafshin federal. Në këtë kuadër duhet të sqarohen çështjet e diskutueshme mes landeve federale dhe federatës.




DW