[Dilaver]

Pasojat më të mëdha nga një shpërthim i vetëm që nga fillimi i luftës

Një kamion, që mbante një sasi të madhe eksplozivi, shpërtheu në një treg në zonën shiite të Bagdadit të shtunën, duke marrë jetën e 121 vetave. Ata ndodheshin për pazarin e zakonshëm, por gjithçka u kthye në një fatkeqësi. Ky numër i madh i të vdekurve e bën sulmin më të përgjakshmin nga një autobombë e vetme në Irak që nga fillimi i luftës në vitin 2003. Kamioni, në të cilin ndodhej eksplozivi, bartte ushqime dhe, pos të vrarëve, ka shkaktuar shumë dëme materiale në zonën përreth.
Dyqane dhe ndërtesa janë shkatërruar. Po ashtu, si pasojë e shpërthimit janë plagosur 226 veta, pjesa më madhe e të cilëve në gjendje shumë të rëndë. Ata që kanë mbetur gjallë janë dërguar në spital.
Shpërthimi ndodhi në orët e pasdites. I fundit me përmasa të ngjashme ishte ai i 22 janarit në Sadriah, ku humbën jetën 88 veta. Shtimi i dhunës vjen pas rritjes së sulmeve të terroristëve sunitë kundër objektivave shiite. Ndërkohë, në qytetin verior të Kirkukut, tetë bomba shpërthyen brenda dy orësh.
Objektivi i tyre ishin zyrtarët e Partisë Kurde. Lideri shiit bëri thirrje për unitet mes myslimanëve dhe dhënie fund të konfliktit sektar. Kjo qe deklarata e tij e parë publike pas shumë muajsh. Deklarata e mëparshme u bë menjëherë pas përkeqësimit të situatës mes shiitëve dhe sunitëve. Lideri shiit i këshilloi besimtarët që t’i qetësojnë pasionet dhe ta ruajnë gjakftohtësinë, pasi çdo veprim do të ishte vetëm në të keqe të vendit dhe të vetë myslimanëve. Sot, në mbarë Irakun ka qenë një ditë shumë e vështirë. Thuajse të gjitha qytetet kanë pasur të vrarë ose të plagosur kryesisht nga shpërthimet e autobombave.