[GjIlAnAsI_cSi]

Fabio Kapelo ka dhënë dorëheqjen si trajner i Realit të Madridit. Lajmi bombë është dhënë dje nga siti cope.es, sipas të cilit tekniku do të luajë sot në mbrëmje kundër Bajernit të Mynihut për të tetat e finales së Champions, ndeshjen e tij të fundit si teknik i Realit. Vendimi duket i prerë, aq sa siti zbulon edhe emrin e zëvendësuesit, që do të jetë ish madrileni Mishel. Lajmi ka dalë në qarkullim vetëm në orën 17.20 të ditës së djeshme, duke zënë menjëherë faqet e para të të gjitha mediave spanjolle. Vendimi i Fabio Kapelos gjithsesi duket i pakthyeshëm dhe kundër skuadrës më të madhe gjermane, ai do të luajë ndeshjen e tij të fundit si trajner i Realit të Madridit. Një lëvizje që në fakt duket se ka shpëtuar edhe vetë krerët e klubit merenges, pasi ai kishte një klauzolë prej 16 milionë eurosh në rast se pushohej nga puna.
Real-Bajern
Reali i Madridit dhe Bajerni i Mynihut do të jetë kryesfida e ndeshjes së sotme në të tetat e finales së Champions League. Dy skuadrat ndeshen për herë të 16-të midis tyre në stadiumin "Santiago Bernabeu", duke u bërë shpesh përballjet që shërbenin si reklamë për futbollin. E paharrueshme mbetet ndeshja e sezonit 1999-2000 në këtë impiant, kur gjermanët me një sulm të tmerrshëm arritën të fitonin në shifrat 4-2 ndaj Realit që atëherë drejtohej nga Visente Del Boske. Por, madrilenët e morën hakun shpejt. Tifozët e tyre ishin të lënduar nga humbja në ndeshjet në grupe dhe donin hakmarrje, ashtu si lojtarët në fushën e lojës. Në gjysmë finale, spanjollët fitojnë 2-0 në "Bernabeu", ndërsa humbja 2-1 në "Olimpiastadion" çon ata në finale kundër Valencias. Nikolas Anelka dhe një autogol i Jeremis, mbyllën një natë të zezë për bavarezët e Otmar Hitcfeld. Bajerni shkoi në finale dhe arriti të fitonte trofeun e tetë në histori, falë një triumfi 3-0 kundër Valencias. Nisi ajo që njihet në historinë e futbollit me emrin "Era e Los Galaktikos". Në sezonin 2000-2001, dy skuadrat përballen sërish në gjysmëfinale, por Hitcfeld dhe djemtë e tij, e kanë mësuar leksionin. Ata fitojnë 1-0 në "Bernabeu", falë një goli të Xhovani Elber dhe shohin drejt finales. Në ndeshjen e kthimit, braziliani shënon sërish dhe Figo barazon. Ndërsa është Jeremis ai që shënon golin e kualifikimit për në finalen e "San Siros", aty ku Bajern gjen sërish Valencian, të cilën e mposht falë penalltive. Një vit më vonë, dy prej skuadrave më të mëdha të Evropës do të përballen sërish, kësaj radhe në çerekfinale. Në Gjermani, Bajern fiton 2-1, ndërsa në Madrid Helgera e Guti i japin kualifikimin Realit. Madrilenët kualifikohen edhe në sezonin 2003-2004, falë një fitore 2-1 në total të dy ndeshjeve.