[sherri]

Cili grup kishte të drejtë në trazirat që ndodhën ndërmjet sahabëve

Profeti (paqja dhe bekimi i Allahut qofshin mbi të!) ka lajmëruar se Amarin do ta vrasë grupi i padrejtë, gjithashtu për hauarixhët ka thënë: Ata do të dalin në një kohë trazirash dhe do t’i vrasë grupi që është më afër së vërtetës.
Duke u nisur nga këto dy hadithe të qarta, themi se grupi i Aliut ishte më afër së vërtetës. Këto hadithe sqarojnë se Aliu ishte më afër së vërtetës në betejën e devesë dhe të Sifinit, por kjo nuk do të thotë se gjithë e vërteta ishte me të. Kjo nuk duhet të kuptohet si sharje për Aliun, sepse qëllimi ynë është të sqarojmë se ata që nuk morën pjesë në këto beteja, e kishin gjetur të vërtetën.
Drejtësia e Aliut u tregua në momentin kur ndaloi luftën. Më parë përmendëm se ai u pendua kur e pa Talhan të vrarë dhe tha: Ah sikur të kisha vdekur që para njëzet vitesh. Madje në momentin kur Hasen bin Ali u kthye nga beteja e Sifinit dhe i tregoi Aliut se çfarë kishte ndodhur, tha: Betohem në Allah se nuk e kisha menduar kurrë të arrinte puna deri në këtë gradë.
Të gjithë u penduan për pjesëmarrjen në këto beteja, prandaj Profeti (paqja dhe bekimi i Allahut qofshin mbi të!) e kishte lavdëruar Hasenin me fjalët: Ky djalë është zotëri dhe ndoshta Allahu do ta bëjë shkak për pajtimin e dy grupeve të muslimanëve. Pra Profeti (paqja dhe bekimi i Allahut qofshin mbi të!) e lavdëroi Hasenin sepse i pajtoi dhe jo Aliun, i cili i luftoi.
Lëvdatat për Aliun janë në luftën që bëri me hauarixhët, sepse në këtë betejë ishte me të vërtetën dhe askush nuk u mërzit për vrasjen e tyre. Të gjithë u gëzuan dhe Aliu bëri sexhde për të falënderuar Allahun për fitoren. Por ai ka qarë dhe është penduar kur luftoi në betejën e devesë dhe u mërzit shumë kur luftoi në Sifin.