[LaDy_Diaspora]

Depresioni është një temë e të gjitha gjeneratave

"Nëna ime është gjithnjë e mërzitur dhe nuk luan më me mua. Në fillim kam besuar se ajo është zemëruar në mua ngaqë kisha marrë vlerësim të keq në shkollë."
N, 8 vjeçe, fëmijë i vetëm, nxënëse

"Nganjëherë më vjen ta shkundulloj djalin tim nga zemërimi. Ai rri gjithë ditën shtrirë në krevatin e tij."
M., 49 vjeç, i ve, 2 fëmijë, kujdestar i vetëm

"Çfarëdo që them nuk i ndihmon më burrit tim. Ndjehem e pafuqishme
dhe pa përkrahje."
O., 64 vjeçe, e martuar, në pension

Që nga mosha fëminore deri në pleqëri të thellë depresioni mund të prekë cilindo. Mirëpo shpeshherë është e prekur dhe një familje e tërë së bashku.

A ka mundësi që dhe familjarët të marrin mbështetje?

Ndoshta nuk jeni prekur personalisht nga një depresion, por si një anëtar familjeje ose si mik apo mikeshë. Ndoshta jeni i/e paqartë, pasi që nuk arrini të kuptoni dot sjelljen e personit të sëmurë. Ju nuk keni dijeni se si duhet të silleni. Ju nuk e dini se si mund ta ndihmoni personin e sëmurë. Keni frikëra dhe dyshime, keni ndjenja turpi dhe fajësie?

Edhe familjarët mund të marrin mbështetje profesionale. Drejtojuni mjekut ose mjekes suaj familjare, ai ose ajo mund t’ju ndihmojnë më tej.

Njëkohësisht, përkrahja e personit të sëmurë nga familjarët është veçanërisht e rëndësishme. Trajtimi nga specialistët duhet t’i ketë parasysh të dyja – që familjarët janë bashkëvuajtës dhe që ata janë ndihmëtarë të rëndësishëm.

Ofroni edhe ju ndihmën tuaj dhe përkrahni trajtimin, po qe se në familjen ose në rrethin tuaj dikush vuan nga depresioni.

Depresioni është i mjekueshëm

"Mua më vinte turp nga depresioni im. Më në fund fola me një specialist lidhur me problemet dhe shqetësimet e mia. Nisa një psikoterapi dhe mora medikamente. dhe familja ime më ndihmoi shumë. Që prej dy muajsh sërish jam shumë më mirë."
P., 42 vjeç, i martuar, 2 fëmijë

Si trajtohet depresioni?
Trajtimi duhet të pasojë nga specialistët dhe realizohet në shumë nivele. Këtu hyjnë medikamentet, psikoterapia dhe përkrahja sociale. Shpenzimet e trajtimit i merr përsipër sigurimi i obligueshëm shëndetësor. I gjithë personeli mjekësor dhe profesional i nënshtrohet detyrimit për heshtje.

Terapia medikamentoze
Nga hulumtimet shkencore e dimë tashmë se pengesat depresive në metabolizmin e trurit paraqiten pavarësisht nga shkaktari konkret. Këto ndryshime organike në organizëm trajtohen me medikamente kundërdepresive. Gjatë marrjes me rregull, medikamentet ndikojnë që simptomat depresive të pakësohen. Antidepresivët nuk shkaktojnë varësi dhe nuk ndryshojnë personalitetin.

Psikoterapia
Psikoterapia nxit fuqitë vetëshëruese. Gjatë psikoterapisë mund të fl itet lidhur me rrethanat e rënda jetësore, problemet dhe ngarkesat. Së bashku me specialistin do të përpunohen zgjidhjet e mundshme për problemet dhe do të ushtrohet zbatimi i këtyre hapave për zgjidhje.

Mbështetja ekonomike dhe sociale
Pacientet/ -ët marrin dhe mbështetje praktike, për të zgjidhur vështirësitë e gjendjes së tyre jetësore. Sipas dëshirës, këto mund të jenë bisedat mjekësore me anëtarët e familjes, me autoritetet, por edhe me punëdhënësin.

Rrugëdaljet nga depresioni

Mjeku, mjekja familjare:
Mund ta diagnostikojë e ta trajtojë depresionin, dhe të prekurin prej tij në rast nevoje t’ua kalojë mjekeve / mjekëve specialistë, përkatësisht, psikologëve/-eve ose institucioneve të specializuara.

Psikiatri, psikiatrja:
Mjekja, mjeku me një arsimim profesional psikiatrik. Si mjekë specialistë, ata/ato mund të ndërmarrin sqarime mjekësore dhe të japin receta medikamentesh. Ata/ato mund të zbatojnë gjithashtu dhe psikoterapinë.

Psikoterapeutja, psikoterapeuti:
Punojnë në një dhomë vizitash mjekësore (ordinatorium), mirëpo edhe në klinika psikiatrike ose në shërbimet psikiatrike ambulatore.

Psikoterapia:
Realizohet nga një psikiatre, psikiatër ose një psikolog ose psikologe. Psikoterapia mund të realizohet ose në dhomën specialistike të vizitave, ose në formë pjesërisht a të plotë spitalore.

Klinikat ditore psikiatrike:
Janë përgjegjëse për një trajtim pjesërisht spitalor. Kjo do të thotë që në një klinikë ditore ju mund të ushtroni programin terapeutik gjatë ditës, ndërsa natën e kaloni në shtëpi. Këtu punojnë specialistë të fushave të ndryshme.

Klinikat psikiatrike:
Janë përgjegjëse për një pranim urgjent dhe para së gjithash për një trajtim spitalor. Për hyrjen në një klinikë psikiatrike duhet kryesisht një udhëzim mjekësor. Edhe këtu punojnë specialistë të fushave të ndryshme.