[Lona]

Top-News: Përleshje e armatosur në Brodec, 12 të vdekur

Vazhdon ende operacioni i forcave speciale maqedonase në fshatin Brodec të Tetovës, për të arrestuar një grup të armatosur, të kryesuar nga Lirim Jakupi dhe Ramadan Shiiti, të cilët kohë më parë u arratisën nga Burgu i Dubravës të Kosovës.



Mediat maqedonase, sipas Reuters, thonë se janë shënuar viktima në njerëz, por policia nuk ka konfirmuar ende. Ajo që është konfirmuar zyrtarisht deri tani është se operacioni ka nisur në orët e para të mëngjesit dhe vazhdon ende. Ndërkohë, burime për Top News bëjnë të ditur se gjatë operacionit kanë mbetur të vdekur 12 persona, 8 prej të cilëve shqiptarë dhe 4 të tjerë policë.

Po sipas këtij burimi, banorët e zonës ku po zhvillohet ngjarja kanë treguar se policia ka hapur zjarr edhe ndaj grave e fëmijëve, përderisa operacioni konsiderohet si hakmarrje për konfliktin e vitit 2001.

Dëshmitarët, bën të ditur Top News, kanë parë tanke dhe helikopterë policie në Brodec.

/07 Nov 2007/V.H.