[Lona]

Gati nisja e bisedimeve për heqjen e vizave për Ballkanin
e hënë , 05 nëntor 2007
Komisionari i Bashkimit Evropian për Zgjerim, Olli Rehn, pritet të prezantojë të martën Strategjinë për zgjerim të BE-së dhe sfidat kryesore për vitin 2008.
Komisioni Evropian paralajmëroi fillimin e bisedimeve për heqjen e plotë të regjimit të vizave me vendet e Ballkanit Perëndimor. Në strategjinë për zgjerim nënvizohet se “Komisioni Evropian gradualisht duhet të ndërmarrë masa për heqjen e vizave për vendet e Ballkanit Perëndimor nëpërmjet hapave konkrete”. KE planifikon hapjen e bisedimeve me çdo shtet, me ç`rast do të hartohet një kornizë ligjesh e cila duhet të plotësohet nga vendet që synojnë anëtarësimin në BE. Kjo kornizë ligjore do t`i mundësojë këtyre vendeve të fokusohen më së miri në realizimin e reformave të brendshme. BE gjithashtu planifikon rritjen e lëvizjes së lirë të njerëzve të Ballkanit Perëndimor si dhe rritjen e kontakteve mes rajonit dhe BE-së, duke përfshirë disa fusha të komunikimit. Për vitin 2008 planifikohet që 100 studentë të rajonit të përfitojnë studimet evropiane pasuniversitare në kuadër të një programi të financuar nga BE-ja, ndërsa pas vitit 2008 planifikohen te përfitojnë 500 kandidate në vit.