[Jana]

Një dashuri qe lindi me muzikën, një karrierë artistike që lidhet po me muzikën. Alban Skenderaj, dikur një djalë i pasionuar që jetonte në Itali me ëndrrën për t`u bërë këngëtar.

Gjashtë vjet më parë, ai u shfaq shumë modest në skenën e festivalit të parë të muzikës alternative “Top Fest”, por më pas kënga e tij “Vetëm ty” u bë hit, ndërsa ai idhulli i vajzave.

Këngë dhe videoklipe, turne brenda dhe jashtë Shqipërisë, imazh televiziv në reklama, plotësojnë në një farë mënyre profilin artistik të tij.

Pasioni për këngën, veç famës, i solli edhe dashurinë. Mësojmë se nga një takim i rastësishëm, në stacionin qendror të trenit në Cyrih, 27- vjeçari takoi shpirtin binjak ose gjysmën tjetër të zemrës- këngëtaren e njohur Mirjam Canin.

“Me Mirjamin jam njohur në mars të 2007-ës, ka qenë tek stacioni i trenit në Cyrih të Zvicrës. Që aty filluam të njiheshim dhe pas kontakteve të ndryshme filluam të pëlqeheshim”, shprehet Albani.

Një dashuri që lindi nga “muzika” dhe përfundon me zgjedhjen e të rinjve për të ndenjur bashkë.

Prej 2 vjet e gjysmë, ata ndajnë një shtëpi të vogël në Munih të Gjermanisë, të përditshmen e tyre- atë artistike dhe atë qe i paraprin jetës familjare.

“Për një që merret me muzikë nuk ka një të përditshme standarde. Miriami vazhdon punët e veta për sa i përket punëve që ka në Gjermani, merret me emisionet e saj. Zakonisht kur jam në shtëpi shkruaj këngë. Mundohemi të jemi të balancuar që të gjejmë kohën e duhur për të ndenjur bashkë”, thotë Albani.

“Kemi pasur shumë fat që kemi gjetur njëri-tjetrin dhe ndajmë të njëjtin pasion në të gjitha aspektet si në punë dhe në jetën private. Për sa i përket jetës në shtëpi tashmë jemi marrë vesh pas shumë kohe bashkë”, shprehet Mirjami.