[Urata]

Dialog përtej dimensionesh: Tre vjet pas 20 vjetorit të krijimit

Lëvizja demokratike që e themelove si lidhje, në 20 vjetorin e saj, feston tash ditëlindjen. Sa ka mbetur nga ajo LDK sot, shtynë padashur të ju pyes në formë ankthi përzier me dhembje: Ç’të drejtë pate që të vdesësh e të na lësh pas kështu?! Mbase e ke dëgjuar premtimin e atyre që i le pas: Lidhja Demokratike e Kosovës në këto momente të rënda të dhembjes thekson përkushtimin e saj të palëkundshëm për vazhdimin e rrugës së trasuar nga Prijësi dhe Presidenti historik i Kosovës në realizimin e plotë të pavarësisë dhe të shtetit demokratik të Kosovës…E kanë mbajtur fjalën kjo kastë që po e udhëheqë atë Lidhje post Epokës tande apo jo President i dashur?! Apo gjithçka u thye në karriget e Kuvendit që ndau më dysh krijesën tande?! A të ngjanë LDK ajo që e nise duke promovuar kuptimin figurativ të lirisë President i dashur?! Ju i qëndruat besnik lëvizjes për shtet sepse ashtu themelove dhe e rrite lirinë dhe pavarësinë e Kosovës, madje edhe nën një pushtim klasik! Mirëpo Ju e provuat se lirinë mund ta bënim vetëm me zemra të forta, besim të ndërtuar me punë e sakrificë dhe veprime racionale që do të kishin njeriun pikënisje! Ka arritur LDK ta ruajë atë filozofi njerëzore e politike dhe nacionale, ka bërë ndonjë hap para për të ruajtur dhe zhvilluar solidarësinë në mes veprimtarëve e njerëzve?! A nuk është thyer në copa ai besim apo ai vetëm lëngon pasojat!”Njerëzit që drejtojnë LDK-në sot, ka rrezik se po tregojnë që nuk e kanë kuptuar Rugovën si intelektul, ideolog”, më duket se dëgjoj Xhemail Mustafën të thotë. Ndërsa profesor Agani, sikur në korridorin e QIK-ut buzëqeshë e thotë me ngadalë: Presidenti dhe Kosova ndërtuan kontratën mitike për liri e pavarësi. Pas vitit 2000 Rugova i kaloi provat e mëdha të lirisë, por demokracia sot më shumë ngjanë në autokraci, thotë profesor Agani duke buzëqeshur dhe ironizuar emrat e “patriotëve” me të cilët qe mbushë Kosova në fund vitet ‘90-ta.
- Çdo shtëpi e ka nga një mashkull të lig, do thoje Ty President Rugova…Fanitja e fytyrave të njerëzve të Presidencës e QIK-ut, padashtas të zgjon nostalgji dhe frymë loti! Ai lot që sot mund të mos marr ngjyrë në QIK sepse s’është Enveri. Apo sepse edhe QIK-u sot është si LDK. Të dy subjekteve ju mungojnë Enveri, Xhema, Agani…sikur që Kosovës i mungoni Ju, President i dashur! Dhe kur ju flas për punën dhe besimin, një gjamë e madhe që s’të lë as të vdesësh të klithë në ndërgjegje. Si ndihen sot ata mija veprimtarë politikë a ushtarakë, sa reflekton ndjesi e jetë pafajësia e mëkatit të tyre! Ajo që vjen nga sa vite pune të atyre që të besuan. Ajo gjamë e kundërshton gënjeshtrën, trathtinë e ndjesisë së shenjtë, meskinitetin, maskarallëqet, korrupsionin moral e institucional. Madje edhe atë lloj korrupcioni që ka nisë të mbijë edhe në familje, mëhallë, qytete a krahina të Republikës që Ty z. President e le me shqiponjë. Por ata të tjerët e bënë me një hartë që nuk e kontrollojnë dhe 6 yje që mjegullojnë identitetin kombëtar…”Shpejt ka me u que shqiponja e Dardanisë e ato yje me ua vu në ballë atyne që i vizatuan…”, mbase do thoshte miku juaj Mark Krasniqi, z. President! Të kujtohet pse akademiku madhështor Krasniqi të kërkonte të mos qeshje pranë kryeministrit aktual?! A nuk ta dha lajmin ogurzi Ai ndërkaq që refuzoje ndonjë konflikt brenda në shtetin e lirë…?! E di, gurë të nxehtë ke përbi gjatë gjithë kohës…Por duhej ndërtuar shpia e nuk kishte kohë për pallavraxhinjt. As për hienat që t’u sulën kur mbete i vetmi që u ktheve të ndash fatin dhe fatkeqësinë e popullit pas Konferencës së Rambujesë…Lehtë ishte të udhëhiqej nga hotel “Rogneri” dhe Tirana a Shkupi…Por Ty mbete në Kosovë, sepse kur Ty ishe aty, qytetarët ndjenin prezencën e institucionit moral që krijove… – Profesor Agani, Enver, o Xhemo, sa kanë të drejtë ata që mendojnë se LDK lider i të cilës Rugova ka qenë praktikisht qysh nga themelimi, nuk ka ditur të prodhojë një trashëgimtar…Shenjtët nuk më flasin por vetëm buzëqeshin në shenjtërimin e tyre të përjetshëm…por unë, sikur ata qindra mija bashkëveprimtarë anëekënd Kosovës, e ndjejnë aq thellë kohën. Kohën e Prijësit dhe Krijuesit. Koha jote po vjen z. President! Me ju ndiheshim më të sigurtë…Sot ndërkaq, ideali nacional demokratik për shtetin e Kosovës si urë drejt bashkimit, ka mbetur duke vuajtur nën strehë të Parlamentit e Qeverisë…Kurse mes zyrash të huaja tretet dinjitet i nëpërkëmbur i udhëheqësve të korruptuar që bëjnë vetëm çka u thuhet. Ndryshe, nëse i pari bie pas grilave për korrupcion, krim të organizuar apo kërcënim gazetarësh e fjale të lirë, atëherë vargu i gjatë i atyre që do të duhej “ta mësonin pianon”, do të zbrazte Qeverinë dhe Parlamentin, madje edhe kuvendet apo qeveritë komunale dhe Kosova e Republikës me 6 yje do të mbeste në kaos. (Sa prej qeveritarëve apo parlamentarëve do të mund ta kenë lexuar Shokun Zylo, dëgjoj zërin e Afrimit të pyetë!?). Nuk di si të të shkruaj përveç se me gjuhën që nuk lëndon artin por jetën e përpjeston me dhembjen për tragjedinë që na pllakosi! Nuk është e habitshme që, për shkak të komunkimit me Ju z. President, apo siç mund të komentohet: për shkak të stilit naiv të të shkruarit, dikush nesër të më shpallë trathtar, bashkëpunëtor të atij e këtij vendi…Por jam shumë i sigurtë që tashmë ka kush merret edhe me “tipa psikopatologjikë” si ne. SHIK-u ka përpiluar listat qe mbi 10 vjet, vetëm se dikujt do të mund ti jetë tërhequr emri ngase bashkëqeverisin dhe më interesi nuk është tjetërkund përveç se aty ku jipen, kontrollohen dhe maksimalisht shfrytëzohen tenderët dhe institucioni a funksioni! Njëzet vjet pas themelimit, LDK-ja do të festojë ditëlindjen! Atë ditëlindje në të cilën do të mungojnë shumë veprimtarë që e i besuan frymës së Presidentit Rugova. A thua President i dashur, si do bëje TY sot?! Aq e nevojshme është të ruhet ky koalicion i përqudshëm qeverisës?! …Dhashtë Zoti që LDK të hapë dyert për brezat e rinj, ata që do të mund ta kthenin shkëlqimin e Njeriut simbol dhe institucion! Sepse ne nuk e bëmë, sepse nuk e bënë kryesia aktuale e LDK-së!