[Guri i madh]

Sheradini shkruan se si e survejonte Zyra e LDK-së në Tiranë veprimtarinë "terroriste" të UÇK-së në Shqipëri. Fillimisht, fjalën terroriste duhet liruar nga thonjëzat për ta futur në thonjza "UÇK-në", sepse në mes të Tiranës terroristët komunistë vranë ministrin e luftës Ahmet Krasniqin. Dhe, ata që vrasin kreun e luftës pikërisht në kohë lufte nuk kanë asnjë lidhje me UÇK-në e vërtetë. Janë këta shkatërrimtarë përçarës që kërkonin qindra mijëra marka nga Zyra e Përfaqësisë së Kosovës në Tiranë. Dhe, kur merrnin përgjigjen logjike se "ne disponojmë vetëm paratë që nevojiten për funksionimin normal të kësaj Përfaqësie", përçarësit shantazhonin personelin e saj me pusulla makabre: "Në emër të popullit, për tradhti të lartë, jeni të dënuar me vdekje dhe do të ekzekutoheni në rastin më të parë të mundshëm." Dhe, pasonte firma: "Shtabi i Përgjithshëm i UÇK-së". Kjo është "lufta" reale që bënin disa "shtabistë çlirimtarë" në Tiranë!!!

Me kërcënime të tilla arritën ta përzënë kreun e Përfaqësisë. Shefat e tyre emëruan Xhavit Halitin dhe tani kërkonin pushtimin e Përfaqësisë. Por, reagimi i dr. Rugovës ishte i shpejt duke emëruar personin tjetër institucional në Zyrën e Përfaqësisë të Kosovës. Vlen të theksohet se shantazhimi bëhej nën ombrellën e Sigurimit komunist shqiptar. Dhe, shteti i Rexhep Mejdanit, edhe pse ishte i informuar për këtë krim të rëndë, duke e penguar punën normale të personelit të Përfaqësisë, madje në kohë lufte, kurrë nuk ndërhyri për të marrë masa sigurie dhe për të goditur shantazhuesit!

Një tjetër dezinformim banal që bën Sheradin komunisti është kur thotë se Fondi i Achenit "specifikoi destinimin e këtyre mjeteve vetëm për nevojat financiare të kryetarit të LDK-së, Ibrahim Rugova dhe të strukturave të partisë!" Kjo nuk qëndron fare dhe për këtë kemi dhënë shpjegimet më parë. Por, Sheradini e lidh këtë me "bojkotin që i bëri LDK-ja në Gjermani kryetarit të Sindikatave të Kosovës, profesor Hajrullah Goranit!" Vlerësimet paushalle janë gjithmonë të gabuara. Për të keqen e tij, këtë gabim ai e përsërit në gjithë "studimin e tij historik" të marrëzishëm. Kosova kishte një Qeveri të përkohshme në ekzil, (edhe pse Sheradini thotë se duhej të qëndronte në Kosovë, gjë që përjashtohej një mundësi e tillë), kishte edhe një fond zyrtar, tashmë të konsoliduar të shprehur në 3 %-in obligativ dhe moral nga paga mujore ose të ardhura të tjera nga byroja e punës apo nga ndihma sociale, që mërgimtarët tanë përfitonin në shtetet ku jetonin.

Së pari, mërgimtarët në Gjermani ashtu si të gjithë qytetarët e Kosovës ishin përcaktuar për fondin zyrtar dhe nuk mund të ndaheshin në një fond tjetër. Fondet humanitare, si dhe fonde që kanë bërë emër për të mirë si: "Shoqata Nëna Tereze" dhe "Shoqata Rugova" anëtarësia e tyre ishin pagues të rregullt edhe të Fondit qeveritar. Mërgimtarët kur humbën punën minatorët ishin solidarizuar masovikisht duke tubuar ndihma për ata. Por, tani ishin krijuar rrethana krejt tjera. Punën e humbën dhunshëm, pothuajse të gjithë ish të punësuarit në ndërmarrjet e ndryshme si dhe në administratë. Tashmë ndihmat duhet të ishin të centralizuara dhe të mbikëqyrura zyrtarisht duke i financuar nevojtarët me prioritet.

Së dyti, profesor Gorani vinte në Gjermani gjithmonë nëpërmjet Zvicrës, madje i shoqëruar nga emra dhe fytyra shumë të dyshimta. Ata nuk paguanin as në Fondin e qeverisë dhe as në ndonjë fond humanitar. Ishin anarkistë dhe ashtu edhe si Serbia nuk i njihnin institucionet e Kosovës. Megjithatë, në nderim të profesor Goranit paguanin sallat dhe e prisnin si mysafir të lartë nga atdheu. Kjo është një e vërtetë e parë dhe e përjetuar edhe nga unë Xhafer Leci. Jo rrallë jemi provokuar nga shoqëruesit e profesor Goranit duke e lavdëruar në prezencën tonë në sallat e mbushura me mërgimtarë diktatorin Enver Hoxhën dhe regjimin e tij të urryer. Megjithëkëtë, për respekt të mysafirit, jemi përmbajtur.

Për të qenë "studimi historik" i Sheradinit sa më “gjithëpërfshirës” kundër Dr. I. Rugovës kanë kontribuar kryesisht dezertorët nga LDK-ja, duke e braktisur të djathtën progresive për t`u bërë sahanlëpirës në të majtën ekstreme. Dhe, kjo e majtë është përgatitur vite me radhë duke vjelë fonde dhe duke vënë gjoba bizneseve të ndryshme për të blerë mercenarë të shkolluar, të kalemit që të bardhën ta bëjnë të zezë.Njëri prej tyre, Milazim Krasniqi "gabimet" e vitit 1990 i denoncon në qershor të viti 2000! Ky është parimi dhe dinjiteti i këtij komunisti të maskuar, dikur në radhët e të djathtës tonë! Të këtij soji janë edhe disa biçim ministrash që u katapultuan me servilizëm, dikur në të djathtën dhe tani që humbën postet e pamerituara u kthyen për ta lëpirë grazhdin e ndotur komunist. Këta janë zvarranikë pa kurriz dhe pa fije morali kombëtar.

Një urrejtje dhe mllef të madh shfrynë Sheradini për inteligjencën e Kosovës. Këtu imiton idolin e tij Enver Hoxhën i cili duke mos mbaruar as edhe një semestër studimesh, nga inati ekzekutoi dhe burgosi disa gjenerata intelektualësh në Shqipëri! Po citojmë “historianin” Sh. Berisha: "Elita intelektuale shqiptare ishte vënë në shërbim të regjimit komunist(!)" Hedhja baltë mbi pjesë më vitale të kombit, inteligjencën e cila diti ta mbrojë për mrekulli qenien tonë kombëtare, është një dëshmi tjetër e punës "serioze" e "studimore" që bën Sh.Berisha në shkrim-kopjimet e tij shpifarake e denigruese. Një përgjithësim i tillë është pjellë vetëm e njeriut me defekte intelektuale.

Dilemat dhe polemikat shqiptare se kush e solli NATO-në në Kosovë nuk kanë të ndalur, por gjëja më e rëndësishme është çlirimi i Kosovës nga regjimi kriminal dhe hegjemonist i Beogradit, pra shpëtimi ynë nga shfarosja kolektive. Derisa Sheradini thotë se LDK-ja ishte kundër UÇK-së njëjtë sikur ata intelektualët si akademik R. Qosja, dr. A. Vinca e të tjerë, të cilët me deklarimet e tyre shkaktonin përçarje brenda forcave politike shqiptare. UÇK-ja nuk ishte ushtri private e askujt. Ajo ishte e popullit, atë e donim dhe e ndihmonim të gjithë fizikisht, materialisht dhe moralisht. Çdo ushtar ishte i dashur dhe i respektuar, sepse e kishte kapur pushkën për ta luftuar armikun shekullor. Disa tjerë thonë se masakra e Reçakut e solli Rambujen dhe NATO-në në Kosovë. Të tjerët thonë masakra e Jasharajve, dhe disa tjerë thonë Rugova, dhe kështu me radhë.

Më të zëshmit janë ata që thonë se UÇK-ja e solli NATO-n në Kosovë. Unë personalisht mendoj se të gjithë këta faktorë që i përmenda më lartë i kanë kontribuar ndërhyrjes të NATO-s në Kosovë. Meritat e UÇK-së janë të pa kontestueshme, ajo ishte forca më reale në terren e cila dhunës masakruese serbe filloi t’i përgjigjej me pushkë, pra UÇK ishte në mbrojte të popullit. Por roli dhe kontributi politik i dr. I. Rugovës dhe i LDK –së në gjithë këtë fitore të shqiptarëve ishte dhe mbetët i pazëvendësueshëm, ajo kishte njerëzit e vet në fronte të luftës dhe fronte tjera të cilët i kontribuonin luftës. Në këtë rast po përmend disa nga meritat e LDK-së, meqë kam qenë anëtar i saj dhe në rrjedhat e proceseve dhe zhvillimeve politike gjatë gjithë kësaj periudhe për të cilën po flasim.