[Zero Cool]

Zogiani: Për Pacollin AKR është biznes





Drejtues i Organizatës për Demokraci, Anti-Korrupsion dhe Dinjitet “Çohu”, Avni Zogiani, vlerëson se shfrytëzimi i buxhetit të shtetit për interesat private të njeriut numër dy në Qeverinë e Kosovës, është konflikt i rëndë interesi, që për pasojë duhet të ketë largimin e Pacollit nga posti publik.
Ai thotë se vetë AKR-ja është jo më shumë se një lloj njësie biznesore.

“Në Kosovë kompania e tij ka marrë tenderë, duke e përdorë pushtetin, kështu që nuk ka dyshim se AKR-ja nga z. Pacolli është parë më shumë si një biznes se sa si një parti politike”, ka thënë Zogiani për “Kosova Sot”.

Fakti që pjesërisht apo tërësisht e shpenzon buxhetin e Kosovës në emër të udhëtimeve zyrtare për lobim, dhe pastaj kjo i del si një “biznes përgjatë rrugës” (rasti me Nigerinë), për Zogianin mjafton që Pacolli të jap dorëheqje nga posti i zëvendëskryeministrit.

“E dimë që nëpër shtete të standardeve të ngjashme ka pasur biznes edhe kompania e z. Pacolli; në shtete ku ka fare pak sundim të ligjit dhe ku ka mundësi të madhe për përfitime. Prandaj, mendoj që objektivi i parë i tij është përfitimi e jo sigurimi i njohjeve”, ka thënë Zogiani, sipas të cilit me veprime të tilla duhet të merret seriozisht kabineti qeveritar. /Telegrafi/