[roadrunner]

Skenderaj, 1 dhjetor - Një femër 24 vjeçare nga Buroja e Skenderajt, ka vdekur si pasojë e dhunës fizike të ushtruar nga bashkëshorti i saj, ka njoftuar policia përmes një komunikate, të mërkurën.
“Rasti është regjistruar rreth 45 minuta pas mesnatës të se mërkurës, ndërsa ekipi kujdestar nga QKMF në Skenderaj, i cili ka dalë në vend ngjarje, ka konfirmuar se viktima e këtij rasti, S. Canaj (24), ishte pa shenja jete”, ka deklaruar toger Besim Hoti, zyrtar për informim publik i policisë rajonale në Mitrovicë.
Në bazë të informatave preliminare të policisë, besohet se i dyshuari 32 vjeçar, bashkëshorti i viktimës kishte përdorur forcën fizike dhe një mjet të fortë, shufër metalike, për të goditur viktimën në pjesë të ndryshme të trupit, përfshirë këtu edhe goditjet në kokë, të cilat dyshohet të kenë qenë shkaktar për vdekjen e viktimës.
Toger Hoti mandej ka treguar se i dyshuari, F. H., 32 vjeç, është arrestuar dhe dërguar në stacionin policor për inicim të procedurave të parapara me ligj dhe sqarim të rrethanave të këtij rasti të rëndë. Ndërkaq, prokurori publik i Prokurorisë së Qarkut në Mitrovicë, ka dalë në vend të ngjarjes dhe ka urdhëruar që trupi i pajetë i viktimës të dërgohet në Institutin e Mjekësisë Ligjore në Prishtinë, për autopsi.
“Viktima besohet të ishte në muajin e gjashtë të shtatzënisë ndërsa hetuesit policor janë në pritje të raportit zyrtar të ekspertëve mjekoligjor për sqarim të shkaktarit të vdekjes dhe rrethanave tjera të dyshimta”, ka thënë në fund toger Besim Hoti.