[Fshatari]

Stafi i Universitetit të Prizrenit nis të ushtrojë drejtshkrimin
Nga Express më 14 gusht 2011 në ora 16:35
Profesorët e Universitetit të Prizrenit ka gjasë t’i nënshtrohen një kursi të gjuhës shqipe. Ata që mësojnë të tjerët, ka mundësi të kthehen për të mësuar atë që është dashur ta zënë në shkollën fillore, shkruan Koha Ditore.

Ushtruesi i detyrës së rektorit të Universitetit të dytë publik në vend, Enver Sopjani, ka marrë vendim që të mbahet një, siç është quajtur, trajnim për të përsosur gjuhën shqipe, për stafin administrativ të këtij universiteti. Por ka paralajmëruar se për një gjë të tillë, ka nevojë edhe stafi akademik i Universitetit që drejton.

Duke parë që shumë shkresa zyrtare që lëshohen dalin me gabime gjuhësore, Sopjani ka marrë vendim që për stafin administrativ të Universitetit të organizohen trajnime. Ai ka sqaruar se trajnimi është i obligueshëm dhe se përfundon për secilin pjesëmarrës veç e veç, atëherë kur profesori i gjuhës shqipe konstaton se kandidati nuk ka nevojë t’i ndjekë trajnimet më tutje.

“Në një institucion arsimor të ketë gabime drejtshkrimore, gabime në formulim të shkresave, është e papranueshme. Për atë arsye unë kam konstatuar se ka nevojë edhe në Universitetin e Prizrenit, përfshirë edhe Fakultetin e Edukimit, të mbahen trajnime në gjuhën shqipe”, ka thënë Sopjani, teksa ka bindjen se nuk është vetëm Universiteti të cilin ai drejton i prekur nga kjo dukuri.

Për Sopjanin, kjo nuk nënkupton se stafi i UPZ-së, nuk di shqip.

“Por ata nuk guxojnë të bëjnë gabime drejtshkrimore në formulimin e shkresave”, ka thënë Sopjani.

Sipas tij, në Universitetin e Prizrenit, ka edhe staf akademik që nuk di të shkruajë shqip pa gabime gjuhësore.

“Në të ardhmen do të shohim që të marrim masa edhe në atë drejtim. Është turp që një profesor t’i thotë vetes profesor dhe nuk është në gjendje të shkruajë mirë. Kuptohet se perfekt nuk është askush. Por me gabime sa më pak që është e mundur”, ka theksuar Sopjani, teksa u ka bërë thirrje edhe institucioneve të tjera arsimore të marrin këso iniciative.

Profesori i gjuhës shqipe në Fakultetin e Edukimit në Prizren, Xheladin Zymberi, i cili është angazhuar që të mbajë trajnimet për gjuhën shqipe për stafin administrativ, iniciativën e Sopjanit e ka cilësuar të qëlluar dhe shumë të nevojshme. Ai ka pohuar se në ditën e parë i është përgjigjur pozitivisht trajnimit i gjithë stafi që aktualisht është në punë.

“Me gjithë dëshirë, i gjithë stafi, me përjashtim të atyre që janë në pushim, janë përgjigjur. Kanë qenë shumë kureshtarë dhe e panë që është shumë i favorshëm”, ka pohuar ai, duke shtuar se e ka parë që është e nevojshme mbajtja e këtyre trajnimeve.

“Ata kanë nevojë të përsosin gjuhën për të hartuar raporte të ndryshme, kërkesa, ankese dhe do t’u ndihmojë atyre shumë. Sidomos kur është çështja e drejtshkrimit, shkrimit akademik dhe kulturës së gjuhës”, ka theksuar ai. Ai ka shtuar se në Fakultetin e Edukimit është futur në plan programe edhe gjuha shqipe si lëndë, ndërsa ka thënë se edhe në Universitetin e Prizrenit do ta bëjnë të njëjtën gjë.


http://www.gazetaexpress.com/?cid=1,98,60392


Diteve ne vijim, pritet shtim i madhe i te regjistruarve ne kete forum, te gjithe me ip nga Universiteti i Prizrenit.
Baza e shkrim-leximit fillon ne bangat e fillores. Kjo vlen edhe per personelin e Universitet prizrenas.

Gjuha shqipe ka te ardhme te shkelqyer !