[Llapjani_HH]

Llapjanët kërkojnë informatë zyrtare se kah do t’i bie autostrada

Kuvendarët llapjanë kanë votuar të martën vetëm propozimin e këshilltarit komunal nga radhët e Partisë Demokratike të Kosovës, Naim Çunakut, që të kërkohet informacion zyrtar nga Ministria e Transportit dhe Post Telekomunikacionit dhe Qeveria se kah do t’i bie autostrada që ishte planifikuar të ndërtohej deri në Merdar.

Por, në këtë mbledhje të KK-së së Podujevës nuk është hedhur në votim edhe propozimi i asambleistit nga Aleanca për Ardhmërinë e Kosovës, Ismail Abdullahut, që t’i dërgohet Kuvendit të Kosovës një deklaratë me të cilën do të kundërshtohej ndryshimi i trasesë së kësaj rruge.

Naim Çunaku (PDK), ka thënë se ata janë që t’i mbrojmë interesat e qytetarëve, por sipas tij deri tash ka vetëm prononcime dhe deklarata se kah do t’i bie atotistrada, por jo edhe diçka në letër.

“Mendoj që Kuvendi Komunal të merr vendim që institucionet qendrore të na e japin një informacion zyrtar se çka do të bëhet me autostradën dhe pastaj të shohim se çka mund të bëjmë ne, protestë demokratike, apo diçka tjetër”, ka thënë Çunaku.

Ndërkohë, Ismail Abdullahu, i cili kishte kërkuar këtë diskutim për projektin e autostradës, ka thënë se transparenca nga Ministria e Transportit dhe Post Telekomunikacionit dhe Qeveria për autostradën Vërmicë-Merdar është nën çdo nivel.

Sipas tij, disa thonë se kjo autostradë do të ndërtohet Vërmicë-Merdar e disa thonë se kjo do të vijë vetëm deri në Besi.

Abdullahu ka kërkuar të dihet se a ka projekt që autostrada të kalojë nëpër Orllat, sepse sipas tij, edhe nëse ndërtohet një rrugë e katundit duhet të ketë projekt “e lëre më për autostradë”.

“Arsyeja që po shkurtohet kjo rrugë për 25 km është se për kaq kilometra ajo është zgjatur pas ndryshimit të saj. Ku mbesin Ferizaj, e Gjilani që nuk do të mund asnjëherë të kyçen në këtë rrugë”, ka thënë ai.

Debati për projektin e autostradës është zhvilluar kryesisht ndërmjet AAK-së dhe PDK-së.

Nebi Behluli (PDK), ka thënë se kryeministri ka deklaruar se rruga do të shkojë deri në Merdar.

“Ne si Kuvend Komunal jemi të papeshë që të ndryshojmë këtë projekt, por kemi edhe deputetë llapjanë në Parlament që mund ta përfaqësojnë komunën atje. Ne nuk dëshirojmë që të bëhemi avokat të dikujt pse nuk u shkon kjo rrugë, sepse secila komunë duhet të kërkojë për vete”, është shprehur ai.

Ndërsa, Ismail Abdullahu, ka theksuar se kontrata parasheh që kjo rrugë të ndërtohet në gjatësi prej 102 km, e siç thotë ai, pas ndryshimit të saj i bie që të ndërtohet vetëm deri në Besi.

“Pra 99 për qind jam i sigurt se kjo do të ndërtohet deri në Besi. Unë propozoj që me një deklaratë të kundërshtohet ky propozim që autostrada të ndërtohet vetëm deri në Besi”, ka thënë ai.

Ndërkohë, këshilltari Ismet Mahmuti nga radhët e PDK-së, ka përmendur një marrëveshje e nënshkruar në kohën sa ka qenë ministër i Transportit, Zef Morina, e cila parasheh që domosdo kjo rrugë të përfshijë një zonë gjeografike me Serbinë.

“Nëse kjo ndalet në Lipjan, atëherë kjo do të shkojë kah Gjilani, nëse vjen deri në Besi, atëherë kjo patjetër do të vjen deri në Merdar”, ka thënë Mahmuti.

Në këtë debat më të heshturit kanë qenë këshilltarët komunalë nga radhët e partisë më të madhe në Podujevë, LDK-së.

Përpos kryesuesit të Kuvendit Komunal, Hazir Raçi, e që vjen nga kjo parti, askush tjetër nga LDK-ja nuk ka diskutuar për çështjen e autostradës.

Raçi ka thënë se arsyeja e mungesës së mjeteve për mospërfshirje të autostradës edhe pjesën e Llapit është e gabim.

“Ky nuk është projekt për 5 e as për 10 vjet. Prandaj është gabim që mos të vije deri në Merdar”, ka thënë ai.

Sipas tij, pasi të shohin informacionit zyrtar për ndërtimin e kësaj autostradës, sipas nevojës do të marrin edhe vendime tjera.
Koha.net