[hasanmehmeti]

GAFAT E RADHËS TË LIDERSHIPIT TË KOSOVËS

(ky shkrim është botuar në të përditshmen “Koha Ditore” në Prishtinë më 28 gusht 2008, f. 11)
Se vërtet udhëheqja kosovare ka dështuar nëpolitikën e jashtmepër t’i bindur shtetet dhe qeveritë e vendeve të huaj që ta njohin Kosovën, kjo tashmë nuk është një çështje e panjohur. Mirëpo është për të të ardhur keq që qeveritarët kosovarë ende bëjnë politikë për konsum të brendshëm të udhëhequr nga interesa të vogla e meskine, duke dëmtuar rënd interesat strategjike të Kosovës.
Kjo më së miri u pa edhe këto ditë kur me iniciativën e shoqërisë civile në Prishtinë u mbajt konferenca “Kosova dhe Bota Arabe”, ku intelektualë arab dhe shqiptarë diskutuan për raportet dhe marrëdhëniet në mes shqiptarëve dhe shteteve arabe dhe për sensibilizimin e opinionit arab për njohjen e shtetësisë së Kosovës.
Ajo që ra në sy në këtë konferencë është sjellja e papërgjegjshme dhe pa kurrfarë bontoni e lidershipit të Kosovës, duke filluar që nga presidenti Sejdiu, ministri i punëve të jashtme Skënder Hyseni dhe për të përfunduar tek deklarata skandaloze e shefit të ekzekutivit të Kosovës –kryeministrit Hashim Thaçi, i cili madje nuk denjoi që të merrte pjesë fare në këtë konferencë.
Të shohim radhazi:
Në hapje të konferencës së sipërpërmendur qe i pranishëm edhe presidenti i Kosovës Fatmir Sejdiu i shoqëruar nga ministri i punëve të jashtme Skënder Hyseni, gjë kjo që është për t’u vlerësuar. Por ajo që është shqetësuese është paraqitja anemike dhe me një fjalim të zbehtë dhe jo adekuat me konferencën që mbahej e presidentit Sejdiu.
Ngjashëm si ai, po thuaj, u paraqit edhe ministri i jashtëm Skënder Hyseni, por ajo që ra në sy në paraqitje e dy liderëve tanë në këtë konferencë qe injorimi që iu bë pjesëmarrësve dhe panelistëve të konferencës, kur me të përfunduar fjalimet e tyre edhe presidenti e edhe ministri i jashtëm u larguan nga salla ku mbahej konferenca, pa treguar kurrfarë respekti për pjesëmarrësit. Do të ishte e udhës, të paktën për arsye kulturore dhe për shkak të bontonit diplomatik që presidenti dhe ministri i jashtëm të dëgjonin, të paktën, një nga panelistët arab. Këtë nuk e bëri as presidenti dhe as ministri i jashtëm i Kosovës. Sa kohë që, për koincidencë, shtypi i Prishtinës në të njëjtën ditë kishte botuar një pjesë nga intervista e presidentit Sejdiu dhënë të përditshmes prestigjioze gjitharabe “Al-Hayat”, ku presidenti ynë shprehte zhgënjimin e tij për mosnjohjen e Kosovës nga ana e shteteve arabe.
Mirëpo, këtë sjellje injoruese dhe pa sens diplomatik, sikur e la nën hije deklarata skandaloze dhe e papërgjegjshme, të cilën një ditë pas përfundimit të konferencës e tha kryeministri i vendit, Hashim Thaçi, i cili, - mbase “i nxehur” nga temperaturat e larta të betonit gjatë vënies së gurthemelit të ndërtesë së Ministrisë së Punëve të Brendshme dhe i pyetur nga gazetarët për kritikat e publicistit Surroi në adresë të politikës së jashtme, - në mënyrë të pamatur dhe super emocionale vendet arabe, kryeministri ynë, i quajti “adresa të dyshimta”.
Një deklaratë e tillë nga shefi i ekzekutivit të vendit është sa e papërgjegjshme aq edhe e dëmshme, sepse ofendon dhe etiketon qeveritë legale dhe të pranuar ndërkombëtarisht të Botës Arabe, ndërsa në anën tjetër pret dhe kërkon njohje nga ato qeveri.
Deklarata e kryeministrit Thaçi është shokuese, e pamatur dhe e dëmshme për imazhin e Kosovës dhe për diplomacinë e saj, andaj është në të mirë të vet kryeministrit dhe të qeverisë së Kosovës që të sqaroj atë deklaratë para gazetarëve në Prishtinë.
Kryeministri ynë duhet që të ketë kujdes se çka deklaron, sepse ai tashmë është shef i ekzekutivit të një vendi të pranuar nga 46 shtete dhe që kërkon dhe i duhen njohje edhe nga shtete të tjera.
Kryeministri edhe më herët kishte bërë gafe të tilla, duke i ndarë shtetet në kualitative dhe numerike.
I nderuari kryeministër, duhet ta keni shumë të qartë se disa qeveri e shtete që ju i quani adresa të dyshimta, janë aleate dhe mike të ShBA-ve dhe botës perëndimore.
Zotni kryeministër, ju dhe këshilltarët që ju rrethojnë, a jeni të vetëdijshëm se nuk kalon muaj e që në Xheda të Arabisë Saudite, në Kajro të Egjiptit, në Doha të Emirateve, në Kuvajt..., e që të mos zbresin udhëheqës të lartë të ShBA-ve dhe të vendeve perëndimore.
Ne jemi shume të vetëdijshme se Kosova vërtet nuk ka kapacitet që kanë shtetet si SHBA-të, Anglia, Franca, por habitemi me idenë tuaj që t’i ndani shtetet në kualitative dhe numerike, dhe duam ta dimë se ku e mbështetni teorinë tuaj që këto qeveri legale e të njohura ndërkombëtarisht t’i quani “adresa të dyshimta” dhe me çfarë kuti i matni qeveritë në “kualitative” dhe “jokaulitative” .
Zotni kryeministër, a jeni në dijeni se diplomacia amerikane, turke dhe ajo e Tiranës zyrtare janë duke lobuar në shtetet e Konferencës Islamike për njohjen e Kosovës, dhe a mund të na thoni ju, presidenti i vendit dhe ministri i punëve të jashtme se çfarë keni bërë deri më tash. Hiç këtu një letër të cilën e keni dërguar pas 17 shkurtit dhe me të cilën keni kërkuar njohjen e pavarësisë së Kosovës. Por, a thua vallë, kjo është e mjaftueshme? !
Zotni kryeministër, nuk e keni ju as fuqinë ekonomike, as politike, dhe as diplomatike që të ndani shtetet në "kualitative” dhe “numerike”, ju dhe Kosova nuk e ka këtë komoditet që të përcaktoni shtetet: “të dyshimta” dhe “jo të dyshimta” . Ne jemi shtet i vogël dhe në formim e sipër, ndaj dhe sot më shumë se kurrë na duhet një diplomaci e mirëfilltë që ndjekë me urtësi e diplomaci interesat e Kosovës dhe aleateve tanë, para së gjithash të SHBA-ve, e jo të bëjmë një politik konfliktuoze e refuzuese me shtetet që kanë të gjitha potencialet që shumë lehtë mund të jenë përkrahëse dhe miq tanë.
Është me hile dhe krejt për konsum të brendshëm e për kapricio personale, fshehja parapa emrave të mëdhenj si Uashingtoni e Brukseli, kur dihet që jo vetëm Kosova, por të gjithë shqiptarët e kanë çështje kombëtare dhe parim numër një integrimin në BE, NATO dhe miqësinë e ngushtë me SHBA, por në të njëjtën kohë nuk duhet lënë anash as marrëdhëniet e mira me shtete e tjera.
Zotni kryeministër, integrimin në NATO dhe BE, qeveria juaj mund ta ketë prioritet numër një, madje dhe për këtë çështje mund të themeloni ministrinë e integrimit, por, krahas kësaj, duhet që të siguroni sa më shumë njohje të Kosovës nga shtet e tjera, që të krijoni sa më shumë miq dhe lidhje politike e ekonomike për shtetin që po e themelojmë për çdo ditë me shumë mund e sakrifica.


vazhdon poshte...