[GjIlAnAsI_cSi]

Fabio Kapelo shpëtoi me barazimin e arritur në “Vicente Calderon” nga një tjetër “match point”, falë gjyqtarit të ndeshjes dhe lojës së Antonio Kasanos, një na të “mallkuarit” e skuadrës së tij. Sulmuesi italian, i falur nga tekniku madrilen, është rikthyer 132 ditë pas aktivizimit të tij të fundit dhe ishte deçiziv në golin e barazimit, kundër Atletikos, të shënuar nga Higuain. Përpara kësaj ndeshje, një tjetër lojtar i padëshiruar nga Kapelo, Devid Bekam, i dha fitoren skuadrës madrilene 2?1 në “Anoeta”, përballë Sociedadit. Ndërsa Ivan Helgera, një tjetër i padëshiruar nga trajneri italian, është kthyer në një nga pikat më të forta të mbrojtjes madrilene. Pak nga pak Kapelo po lëshon terren kundrejt lojtarëve që më parë i cilësonte si të padobishëm për skuadrën e tij. I pari ishte Helgera, i cili në fazën përgatitore mendohej që do të largohej nga Reali i Madridit dhe ardhja e Kanavaros i vështirësoi edhe më shumë gjërat për të. Por, gjendja jo e mirë e mbrojtësit italian, bëri që Kapelo të veprojë kundër dëshirës së tij dhe të rikthej përsëri Ivan Helgeran, duke i besuar atij postin e titullarit. Presionet e pjesës tjetër të skuadrës në adresë së Kapelos për të falur Bekamin dhe Kasanon, ishin shumë vendimtare. Pasi mesfushori anglez firmosi kontratën e tij me Los Anxheles Galaksi, trajneri italian tha se Bekam nuk do të luaj më për Realin e Madridit. Ndëshkimi zgjati 34 ditë, derisa Bekam u rikthye në ndeshjen kundër Sociedadit dhe ku ndihmoi skuadrën madrilene në fitoren 2?1 duke shënuar golin e barazimit dhe duke i shpëtuar pankinën Fabio Kapelos. Në të njëjtën formën ka përfunduar edhe incidenti i krijuar me Antonio Kasanon. Talenti italian u aktivizua të shtunën në derbin madrilen pas presioneve të bëra nga pjesa tjetër e skuadrës. I futur në pjesën e dytë, Kasano dha një asis për argjentinasin Higuain i cili shënoi duke i dhënë barazim Realit të Madridit në “Vicente Calderon”. Ishte një derbi në të cilën Kapelo, ashtu siç parashikohej, nuk ndëshkoi të besuarin e tij Emersonin, i cili nuk pranoi të luante në minutat e fundit kundër Bajernit të Mynihut. Mesfushori brazilian luajti si titullar kundër Atletikos, njësoj si Rejesi, i cili përpara disa ditësh kritikoi skemat mbrojtëse të trajnerit italian.