[Zero Cool]

Një negociator në Bruksel, 65 mijë euro shpenzime



Delegacioni i kryeministrit, Hashim Thaçi, dhe zëvendëskryeministres, Edita Tahiri, nga më shumë se 780 mijë euro shpenzime të bëra gjatë vitit 2013 në kuadër të bisedimeve me palën serbe në Bruksel, mbi 153 mijë euro i kanë shpenzuar vetëm nga kredit-kartelat shtetërore.

Sipas të dhënave zyrtare që ka siguruar gazeta “Zëri” nga Zyra e Kryeministrit, nga janari e deri në dhjetor të vitit që lamë pas, delegacioni i kryeministrit, Hashim Thaçi dhe i zëvendëskryeministres Edita Tahiri, kanë shpenzuar qindra mijëra euro nga buxheti i Kosovës në emër të akomodimit dhe mëditjeve, shpenzimet nga kredit-kartelat shtetërore dhe për aviobileta.

Delegacioni pesë anëtarësh i të parit të Qeverisë, ku përfshihet kryeministri Hashim Thaçi, Bekim Qollaku, Abelard Tahiri, Blerim Shala dhe Edi Sejdiu, për akomodim dhe mëditje gjatë vitit të kaluar kanë shpenzuar më shumë se 106 mijë euro, ndërsa nga kredit-kartelat shtetërore kanë shpenzuar rreth 95 mijë euro.

Delegacioni shtatanëtarësh i zëvendëskryeministres Edita Tahiri, ku përfshihet kjo e fundit, Gazmir Raci, Arjeta Rexhaj, Dren Zeka, Elona Cecelia, Visar Xani dhe Qemajl Marmullakaj, kanë shpenzuar rreth 1445 mijë euro për akomodim dhe mëditje dhe rreth 60 mijë euro të tjera shpenzime nga kredit-kartelat shtetërore.

Delegacioni i kryeministrit Thaçi dhe zëvendëskryeministres Tahiri kanë shpenzuar rreth 378 mijë euro në emër të aviobiletave.
Sipas një kalkulimi të thjeshtë, çdo anëtarë i delegacionit qeveritar shpenzimet vjetore në emër të akomodimit-mëditjeve, kredit-kartelave dhe aviobiletave, i ka pasur jo më pak se 65 mijë euro.

Shpenzime gjysmake

Ndonëse, gazeta “Zëri” mbështetur në Ligjin për Qasjen në Dokumentet Zyrtare Nr. 03/L-215 ka kërkuar nga Zyra e kryeministrit të Kosovës që të sigurojë të gjitha shpenzimet e bëra të delegacionit politik dhe atij teknik nga fillimi i dialogut me 8 mars të vitit 2011 e deri në përfundim të vitit të 2013, një gjë e tillë nuk ka ndodhur, përveç se janë dërguar shpenzimet e bëra nga delegacioni i Thaçit dhe Tahirit për vitin 2013, përjashtuar këtu edhe harxhimet e grupeve punuese.

Para bukur të majme shpenzohen edhe grupet punuese bashkë me stafin e tyre përcjellës që prej gati tri vitesh dialogojnë me palën serbe për gjetjen e zgjedhjeve për çështjen e energjisë, drejtësisë, lirisë së qarkullimit, sigurimet kufitare, çështja e tregtisë, por edhe organizimin e zgjedhjeve lokale që u mbajtën muaj më parë.

Drejtori i Institutit Riinvest, Lumir Abdixhiku kujton se qeveritë evropiane të cilat dëshirojnë ta kursejnë paranë e shtetit gjejnë mënyra për ta kursyer, derisa ka theksuar se qeveritarët tanë kanë dëshmuar deri më tani se nuk e kursejnë paranë publike.

“Nëse shpenzimet në Bruksel janë bërë me stilin e shpenzimeve që i bëjnë qeveritarët tanë në Kosovë, atëherë them se kanë mundur të harxhojnë më pak, edhe pse parimisht nuk mund të them në është shpenzuar shumë apo pak, pasi që nuk dihet nëse kanë zgjedhur hotelin më të lirë apo më të shtrenjtë, kanë ngrënë dreka të shtrenjta apo më të lira?.

Por, ajo çka mund të them është nëse kanë shpenzuar mes stilin e shpenzimeve sikurse në Kosovë, them se zakonisht paraja e shtetit nuk kursehet dhe ka pak shpresa që delegacioni i Kosovës e kanë kursyer buxhetin e Kosovës në Bruksel”, ka thënë ai. Sipas tij, Qeveria e Kosovës lëre më që nuk e ka kursyer paranë publike, por në këtë drejtim përvojat na ka treguar se nuk pa pasur as vullnet për ta një gjë të tillë, kur vijnë në shprehje shpenzimet për luksin e tyre.

Kërkohet më shumë transparencë

Ndërsa, Merita Mustafa, menaxhere e programit Transparenca dhe Anti-Korrupsioni në KDI, e ka quajtur shqetësuese shifrën e shpenzimeve të krijuara nga delegacioni i kryeministrit Thaçi dhe i Edita Tahirit.

“Nëse kjo shifër është e saktë, atëherë kjo pa dyshim se duhet të jetë një fakt shumë shqetësues, sepse Kosova ende konsiderohet si shteti më i varfër në Evropë dhe se zyrtarët tanë nuk duhet ta kenë luksin e shpenzimeve tejet të larta. Është me të vërtetë zhgënjyese për qytetarët kur dëgjojnë se zyrtarët tanë shumë shpesh janë më të fokusuar në shpenzimet e tyre luksoze që do t’i bëjnë, se sa në rezultatet që duhet t’i japin apo obligimet që duhet t’i kryejnë”, ka thënë ajo.

Sipas saj, është koha e fundit që të ketë një transparencë më të madhe, ku secili shpenzim i parasë publike duhet të publikohet dhe të shfrytëzohet në mënyrë sa më racionale, e që se bashku me këto duhet të vijnë edhe rezultatet apo benefitet për qytetarët.