Hajra

Konfliktet me thika pergjakin Tiranen

9 August 2011 - Aktualitet - 345 shikime
Sherret me thika gjatë fundjavës kanë sjellë dy të plagosur në kryeqytet, ndërsa babai i një vajze i ka shpëtuar vrasjes nga dy të rinj. Nga konfliktet e regjistruara, një person është plagosur rëndë, pasi është goditur disa herë me thikë dhe ndodhet në gjendje të rëndë. Bëhet fjalë për një konflikt të ndodhur të dielën, ku ka mbetur i plagosur një 45-vjeçar. Specialistë të Seksionit Kundër Krimeve ndaj Jetës dhe Shëndetit, bënë të mundur arrestimin në flagrancë të shtetasit A. Barjamaj, 34 vjeç, lindur në Patos, Fier, dhe banues në Tiranë, sepse dyshohet se ka goditur disa herë me thikë në pjesë të ndryshme të trupit Ilir Selim Bokën. Sipas të dhënave hetimore, Barjamaj dhe Boka janë zënë për një femër. Barjamaj ka pretenduar se ajo ishte e dashura e tij dhe nuk e ka duruar faktin se qëndronte me Bokën. Në këto kushte, në prezencë të vajzës së re, ata janë zënë, fillimisht duke u ofenduar dhe më pas Barjamaj ka nxjerrë thikën, duke e goditur disa herë Bokën. I dëmtuari është dërguar në spital, ndërsa autori është kapur disa minuta më vonë nga policia. Por policia nuk e ka të panjohur emrin e Ilir Bokës. Më 30 maj 2005, Ilir Selim Boka me banim në Tiranë, atëherë 40 vjeç, u gjet me armë që e mbante pa leje. Policia evidenton se nga kontrolli në banesë, Bokës iu gjetën e bllokuan dy pistoleta, me disa fishekë dhe nga Komisariati i Policisë Nr. 3 u procedua penalisht për këtë armëmbajtje.
Ndërkaq, episodi tjetër ka ndodhur në Shkozë. Nga një konflikt i momentit ka mbetur i plagosur Albino Roland Lami, 21 vjeç. Edhe ky është goditur me thikë nga një adoleshent 17-vjeçar. Ngjarja ka ndodhur të premten në drekë, ndërsa forcat e Komisariatit nr. 1 kanë bërë ndalimin e adoleshentit, me iniciale E. K. Ndërsa ngjarja e tretë është regjistruar të premten në mbrëmje. Sipas të dhënave, dy të rinj, që tashmë janë identifikuar dhe shpallur në kërkim nga policia, kanë ngacmuar një vajzë te rruga “Zef Jubani”, pranë shkollës së mesme të përgjithshme “Petro Nini Luarasi”. Në këto kushte, vajza i ka treguar babait të saj, G. L. se çfarë kishte ndodhur, duke i identifikuar edhe dy personat shqetësues. Sipas të dhënave policore, prindi i vajzës ka takuar të rinjtë Doriano Çela dhe Erald Rexhepi për t’u kërkuar që të mos ta shqetësonin më vajzën e tij. Por ata e kanë kërcënuar dhe me një thikë kanë tentuar ta vrasin. Babai i adoleshentes ka njoftuar policinë, ndërkohë që dy të rinjtë janë shpallur në kërkim.

Burimi: Gazeta Shqip