[Guri i madh]

Në trafikim të njerëzve, të përfshirë edhe zyrtarë qeveritarë







Publikuar: 22.06.2013 - 09:38Prishtinë, 22 qershor - Komisioni i sigurisë i Kuvendit të Kosovës ka shprehur shqetësime për raportet ndërkombëtare, të cilat e paraqesin Kosovën si vend të trafikimit dhe të krimit të organizuar. Kreu i këtij komisioni, Ahmet Isufi, duke iu referuar Raportit të Departamentit Amerikan të Shtetit dhe atij të “Freedom House”, ka thënë të jetë i shqetësuar që raportet përfshijnë edhe zyrtarët qeveritarë, sidomos në trafikimin e qenieve njerëzore. Për këtë, Isufi ka sugjeruar që Komisioni të kërkojë informata shtesë nga Ministria e Brendshme për trafikimin e drogave, trafikimin e njerëzve dhe krimin e organizuar, raporton KTV.

Ndërkaq, anëtari i Komisionit nga radhët e PDK-së, Fatmir Xhelili ka kërkuar t’i referohet Gjyqësorit dhe Prokurorisë për të rritur dënimet, pasi, sipas tij, njerëzve që fitojnë miliona euro sikur po u konvenon që të marrin tre vjet burgim e pastaj të vazhdojnë prapë veprimtarinë e trafikimit. Por, me këtë nuk është pajtuar Rexhep Selimi, i cili ka thënë se si Komision mund të kërkojnë përgjegjësi vetëm nga institucionet që i mbikëqyrin, e jo të ndërhyjnë në pushtetet e tjera.