[Zero Cool]

Ngrihet aktakuza kundër Limajt dhe të tjerëve


Burime nga Prokuroria kanë bërë të ditur se të hënë pasdite se prokurori italian Maorizio Salustro ka ngritur aktakuzë kundër Fatmir Limajt për krime lufte kundër popullatës civile dhe krime kundër të burgosurve të luftës.
Mbi nënkryetarin e Partisë Demokratike të Kosovës rëndojnë pesë pika të aktakuzës, dy për krime lufte kundër popullatës civile dhe tri për krime lufte kundër të burgosurve të luftës, që përfshin edhe vrasjen.

Prokurori ka ngritur aktakuzë kundër gjithë grupit të Limajt prej 10 personash, shkruan gazeta Koha Ditore.

Ai pretendon se ka gjetur prova kundër deputetit Limaj, Nexhmi Krasniqit, Naser Krasniqit, Naser Shalës, Sabit Shalës, Refi Mazfrekut, Arben Krasniqit, Shaban Shalës, Behlul Limajt dhe Besim Shurdhajt.

Prokurori special i ngarkon ata me akuza për krime lufte të kryera në fshatin Kleçkë të Lypjanit në vitin 1999 në dy të të ashtuquajtura burgje të UÇK-së. Ndonëse nuk i prin listës së të akuzuarve, Limaj tashmë akuzohet për krime lufte për herë të dytë. Në Hagë ai qe gjykuar dhe shpallur i pafajshëm për krime në Llapushnik, ndërsa për rastin e Kleçkës ai pritet të gjykohet në Kosovë.

Njëri nga ish-komandantët më në zë të Ushtrisë Çlirimtare të Kosovës, i njohur me nofkën e luftës “Çeliku”, akuzohet se ka urdhëruar dhe ka marrë pjesë në torturimin çnjerëzor të civilëve serbë e shqiptarë të paraburgosur në një kamp në fshatin Kleçkë në Komunën e Lipjanit. Shumica prej tyre qenë arrestuar në mars të këtij viti, ndërsa Limaj ishte intervistuar por jo arrestuar, për shkak të imunitetit të deputetit.